Colosense 2:15 - Tachi Ak'õre Pedea

¹⁵ Mãɨpuru Tachi Ak'õrepa jõma tachia ununak'aɨ chi jua chaarea berã p'uesima. Mãɨ ooda ichia jõmãɨrã́ k'awapisima.

Colosense 2:15 ပူးပေါင်းရင်းမြစ်များ

Mateo 12:29

Ẽpẽra jua chaarea bɨ naa jɨ̃ nɨbɨdaepɨra, ¿sãmaasã́ ichi tede eda nechɨade wãnaima? Aba mãɨya jɨ̃ nɨbɨsidara p'ue ichidí neet'á chɨadai p'anɨma.

Luca 10:18

Mãɨ k'orea Jesupa ãchiá jarasima: —Ãjã, mɨa unu basima tiore ɨt'aripa pa baepari jĩra baesit'a.

Luca 11:22

Maamina ichi k'aepẽra ẽpẽra atepe chaarea bɨ chek'ari ichi p'ueipɨra, ichi k'ĩruuparí nek'o ẽemariipɨ. Maapae ãarea ichia uru bada ẽemarik'ari chi k'õp'ãerorã ome jedak'oaipɨ.

Juan 16:11

Mãɨnepa Tachi Ak'õre Jaorepa k'awapiipɨ nãɨ ĩjũanepemarã nepɨra pará p'anɨane ait'a, Tachi Ak'õrepa chi nãɨ ĩjũanepema chipari nepɨra pará bɨade ada pẽra.

Juan 19:30

Jesupa mãɨ uvaba jɨjɨyá tok'ari jarasima: —Mɨa ooi pada ãarea oosima. Maapae ichi poro edá jaabarik'ari k'ĩrawẽasima.

1 Corintio 15:24

K'aadeapema ewaride Cristopa jaore mietá chiparirã, jaore mietá atepe k'awa p'anɨrã, jaore mietá jua chaarea be sida ãarea p'ueipɨ. Maapae ichidirã ichi juade p'anɨrã Tachi Pajãnepema Ak'õrea teaipɨ.

2 Corintio 2:14

Tachi Ak'õrea sõpia bɨade adai p'anɨma. Jesucristopa jõma p'uek'ari tai jõmãɨrã k'ĩrari p'uurujãnea ateewãruma mãɨnepa taidepa tuacha ichi k'orea k'awapi bɨma. Cristo k'orea jaratea p'anɨne Tachi Ak'õre k'ĩrari tai k'era jĩra p'iumá p'anɨma. Mãɨnepa tachia ichi k'orea k'awadait'a k'era jĩra bɨma. Mãɨ k'era chi k'aripai p'anɨ ẽpẽrarãpa mãɨnepa chi atuadai p'anɨ ẽpẽrarãpa ɨ̃patama.

2 Corintio 4:4

Tachi Ak'õrene ĩjãanak'apɨɨrãmá chi mãɨ pia ũrinak'ama. Nãɨ ĩjũane tiore ãchi chiparipɨ. Ãchirã́ chi piarã pedea pia Cristo k'orea itu k'awapiwẽa bɨma tau p'ãrio oo bɨ jĩra. Mãɨya ãchia Cristo pia bɨ k'orea p'ue k'awadaiwẽma. Cristo Tachi Ak'õre pẽra mãɨya pia bɨma.

Ep'esio 3:10

Naapae ẽpẽrarã Tachi Ak'õrenepemarãnepa Ichia ichi ne ãareaɨne minachia ne k'awa bɨt'a k'awapisima chi jua chaarea berã́ mãɨnepa chi pajãnepema chi atepe k'awa berã́.

Ep'esio 4:8

Tachi Ak'õre pedeade nãɨya bɨ bɨma: «Ichi ɨt'aa wãside ichi nek'ĩramá p'uek'oada eda serra bɨde ateesima. Maapae nepia be teasima ẽpẽrarã́».

Ep'esio 6:12

Tachi ẽpẽrarã paara chõo p'anɨwẽma. Mãɨ k'aepẽra jaore mietaarã nãɨ ĩjũa p'ãrionepemarã paara chõo p'anɨma. Ãchi chi tachia ununak'apɨ́ chi jua chaarea berãpɨ, chi ɨt'aripema jaore mietaarãnepema poro chaarearãpɨ.

Colosense 1:16

Ichidepa Tachi Ak'õrepa nejõma oosima. Pajãne be, nãɨ ĩjũane be, tachia unupataɨt'a mãɨnepa tachia ununak'aɨt'a ãarea oosima. Jõma ununak'aɨ minachia berã, chi atepe k'awa p'anɨrã mãɨnepa chi jua chaarea be oosima. Tachi Ak'õrepa nejõma Cristodepa oosima mãɨnepa Cristo pae oosima.

Colosense 2:10

Mãra Cristo ẽpẽrarã pẽra ichidepa nejõma uru p'anɨma Tachi Ak'õre ome pia p'ananai k'orea. Ichi chi chaarea berã chi Poro Chaareapɨ.

Hebreo 2:14

Mãɨ warrarã k'ak'ua pará mãɨnepa oa pará ooda pẽra Jesú sida abarik'a basima ichi piudadepa tiore p'uei k'orea. Mãɨ tiorepa tachi piudai p'anɨ ichi juade uru bɨma.

Apocalipsi 12:9

Mãɨne chi je waibɨa bɨ mãɨnepa chi ichi lawari p'anana ãarea nãɨ ĩjũanea bat'a peesidama. Mãɨ je waibɨa bɨ mãɨt'u chi chõarãenapema taamapɨ. Chi t'ɨ̃ Tiore mãɨnepa Ãnimara apatama. Ichia chi nãɨ ĩjũane be ãarea sea uru baparima.

Apocalipsi 20:10

Mãɨya nak'ari Tachi Ak'õrepa tiore chi ẽpẽerã sea uru bada azup're t'ɨpɨ urua nɨbɨdea jirat'aaipɨ. Naena Tachi Ak'õrepa chi ãnimara mietá bɨ mãɨnepa chi piarã Tachi Ak'õre pari pedeapariwẽ mãɨ t'ɨpɨ uruade jirat'aa basima. Mãma tiore ãchi paara ewaricha ãst'á mãɨnepa teamasi minachia mĩa p'ananaipɨ.