Colosense 1:12 - Tachi Ak'õre Pedea

¹² Mãɨya arapá p'anɨnepa Tachi Pajãnepema Ak'õrea sõpia p'anɨane adaipɨ. Mãra jõma ichi ẽpẽrarã ome ɨnaane pia bɨsima ichia uru bɨdepema jitadamẽrá.

Colosense 1:12 ပူးပေါင်းရင်းမြစ်များ

Mateo 25:34

Maapae mɨ, chi Minachia k'awa bɨpa juaraari p'anɨrã́ nãɨya jaraipɨ: “Mãra, mɨ Ak'õrepa pia beepidaɨrã, chet'ɨ. Ichi p'uurude pia p'anat'ɨ. Nãɨ ĩjũa oosiedapema mãɨ p'uuru mãra pae oo basima.

Juan 14:6

Mãɨne Jesupa jarasima: —Mãɨ o mɨpɨ. Mɨnepa Tachi Ak'õre piarã k'awa p'anɨma mãɨnepa chok'ae bai uru p'anɨma. Mɨnepa wãnaepɨra aba pida mɨ Ak'õremá p'ue chedaiwẽma.

Juan 20:17

Jesupa jarasima: —Mɨ jitarãse mɨ Ak'õremá waidi wãwẽa bɨ pẽra. Mɨ ũpẽarãmá wãk'ari jarase mɨ Ak'õremá wãrut'a. Ichi mãra Ak'õrepɨ. Mãɨ mɨ Tachi Ak'õrepɨ mãɨnepa mãra Tachi Ak'õrepɨ.

Juan 4:23

Maamina ewari chei bada chesima. Idiapae Tachi Ak'õrepa k'ɨ̃ria bɨma ẽpẽerãpa ãchi bemãɨpa pia pedeadait'a ichi Jaoredepa mãɨnepa piarã k'awa p'anɨnepa. Aba mãɨya ichiá arí pia pedeadaipɨ.

Hecho 20:32

»Naapae, mɨa mãra Tachi Ak'õre juade bɨipɨ. Ichi sõpiadepa tachi k'aripa bɨ k'orea pedea k'ɨ̃risiat'ɨ. Ichi sõpiadepa jua chaarea teaparima mãrapa pia ĩjãanamẽrá. Chi ichia teai jaradat'a ichi sõpiadepa mãrapa mãɨnepa ãarea chi ichi pae pia bɨdarãpa mãɨ jitadaipɨ.

Romano 11:17

Chi eda waapẽarã judiorã Tachi Ak'õre awara p'aneesidama olivo pak'uru jua t'ɨat'upataɨ jĩra. Mãra judiorãwẽ Tachi Ak'õre newẽa p'anasidama olivo pak'uru chi ichi tuaba mẽa warida jĩra. Maamina mãra Tachi Ak'õrene ẽpẽrarã p'aneesidama, pak'uru jua chi t'ɨat'udade ara mãɨ juade wãa nɨbɨda jĩra. Mãɨya naapae Tachi Ak'õrepa mãra sida k'aripa bɨma judiorã k'aripa bada jĩra.

Romano 15:27

Mãɨ ũpẽarã judiorãwẽpa mãɨ erreara ũpẽarã judiorã pae arapá jɨrɨp'esidama. Piarã mãɨya oodai p'anasidama judiorã́ tee pará p'anɨ jĩra. Judiorãwẽpa nejõma pia Tachi Ak'õre k'orea judiorãnepa jitadada pẽra, ũpẽarã judiorã́ nepia nãɨ ĩjũanepema teadai p'anɨma.

Romano 8:17

Ichi warrarã pẽra Cristo ome ichia uru bɨdepema jitadaipɨ. Tachi piarã Cristo minachia mĩana jĩra minachia mĩa p'ananaipɨra, Tachi Ak'õrepa Cristo ome ará minachia pia bɨipɨ.

Romano 9:23

Mãɨya choasima ichi pia bɨ waibɨa bɨdepema ichia k'ĩra chupuria bɨ ẽpẽrarã́ k'awapii k'orea. Ãchi ichia naena jɨrɨ atasima ichi pia bɨdepema uru p'ananamẽrá.

1 Corintio 8:6

Maamina tachimá, Tachi Ak'õre abapuru bɨpɨ. Ichi tachi Pajãnepema Ak'õrepɨ. Ichiapuru nejõma oosima. Tachi ichi pae chok'ae p'anɨma. Mãɨnepa Tachi Chipari Jesucristo abapuru bɨma. Ichidepa Tachi Ak'õrepa nejõma oosima. Ichidepa tachi chok'ae p'anɨma.

1 Corintio 9:23

Mɨa jõma mãɨ jĩra ooparima chi pedea pia Cristo k'orea k'awapii k'orea. Mãɨya mɨa pida Tachi Ak'õrenepa nepia jitaipɨ.

2 Corintio 11:14

Jãɨrã k'orea mãrapa k'awa k'ɨ̃risiadawẽa p'anɨwẽma. Tiore sida Tachi Ak'õrepa ɨt'aripa peeda ɨnaanepema jĩra cheparima.

2 Corintio 5:5

Piarã Tachi Ak'õrepa tachi mãɨ k'orea oosima. Ichi Jaore tachiá teasima k'awadamẽrá jõma ichia teai jarada piarã atadait'a.

Ep'esio 1:11

Tachi Ak'õrepa nejõma ichia oo k'ɨ̃ria bɨt'a oopari jĩra, Cristodepa tachi jɨrɨ atasima, naenaena k'ɨ̃risia bada jĩra.

Ep'esio 1:18

Mãɨnepa ɨt'aa chiidiparima Tachi Ak'õrepa mãrá k'ɨ̃risia teamẽrá. Mãɨya mãrapa k'awadaipɨ k'ãre ichidepa jitadai k'orea nɨ p'anɨt'a, mãɨ jitadamẽrá t'ɨ̃na pẽra. Mãɨne mãrapa k'awadaipɨ ichi ẽpẽrarãpa minachia pia bɨ jitadait'a.

Ep'esio 2:18

Cristodepa tachi umeepa abarik'a tachi Pajãnepema Ak'õremá naa p'ue chedaipɨ, ichi Jaore aba bɨdepa.

Ep'esio 3:6

Ichia k'awapiwẽa bada nãɨt'a: judiorãwẽpa pedea pia Cristo k'orea ĩjãa p'anɨnepa judiorã ome ará Tachi Ak'õrepa teaidepema jitadaipɨ, abarik'a k'ak'uade p'anɨma, mãɨnepa Tachi Ak'õrepa Jesucristodepa teai jarada ará uru p'anɨma.

Ep'esio 4:6

Tachi Ak'õre abapuru bɨma. Ichi jõmãɨrã Ak'õrepɨ, jõmãɨrã Chiparipɨ. Jõmãɨrã sõne bɨma mãɨnepa jõmãɨrãnepa ichia oo k'ɨ̃ria bɨt'a ooparima.

Ep'esio 5:11

P'ãrionenemarãpa nemietá oopatadepa nepia be chek'ama. Mãɨpuru abarik'a oorãt'ɨ, mãɨpari k'awapit'ɨ ãchia nemietá oopataɨ.

Ep'esio 5:20

Tachi Chipari Jesucristo t'ɨ̃nepa ewaricha tachi Pajãnepema Ak'õrea nejõma k'orea sõpia bɨade at'ɨ.

Ep'esio 5:4

Pedea mietá, nepɨra piawẽa, mãɨnepa pedea mietaadepa nepɨrɨrãtɨ, mãɨya pedeait'a pia bɨwẽ pẽra. Mãɨpari Tachi Ak'õrea sõpia bɨade at'ɨ.

Ep'esio 5:8

Naena mãra p'ãrionepema pasima, maamina idiapae Tachi Chipari ome p'anɨ pẽra mãra ɨnaanepemarãpɨ. Mãɨpuru ɨnaanepema warrarã jĩra nipat'ɨ.

Colosense 2:2

Mɨa k'ɨ̃ria bɨma jõmãɨrã sõpiapiit'a, k'ɨ̃ria p'anɨnepa ará pia p'ananai, mãɨnepa piarã k'ɨ̃risia k'awa uru p'anɨnepa pia p'ananai. Mãɨya Tachi Ak'õrepa naena k'awapiwẽa bada k'awadaipɨ. Mãɨ Cristopɨ.

Colosense 3:15

Tachi Ak'õrepa mãra t'ɨ̃sima k'ak'ua aba bɨ jĩra p'ananamẽrá. Cristopa nek'ĩramariwẽa p'anapi bɨma, mãra sõne. Mãɨpa k'awapiipɨ k'ãre oodai p'anɨ. Mãɨya p'anat'ɨ. Mãɨnepa Tachi Ak'õrea sõpia p'anɨane at'ɨ.

Colosense 3:17

Mãra pedeautade mãɨnepa ne ooutade jõma oot'ɨ Tachi Chipari Jesupa k'ɨ̃ria bɨ jĩra. Ichidepa Tachi Pajãnepema Ak'õrea sõpia bɨade at'ɨ.

Tito 2:14

Tachi k'orea Jesucristopa ara ichi itu peapisima ãarea nemietaadepema k'aripai k'orea. Tachi ara ichi pae pia bɨsima ichi p'uurude p'ananamẽrá mãɨnepa nejõma pia oo k'ɨ̃ria p'ananamẽrá.

Hebreo 12:23

Mãra Tachi Ak'õre warrarã ãarea ará nɨbɨmá chesidama. Tachi Ak'õremá, ãareaɨrã warrarã naapemarãpɨ. Pajãnepemarã pẽra ãchi t'ɨ̃ bɨ bɨma. Mãra chi ãarea tachi nepɨra ak'ɨparimá chesidama. Chi ẽpẽerã jaore jĩp'a ɨt'ari be Tachi Ak'õrepa pia bɨdamá chesidama.

Hebreo 3:1

Ũpẽarã, mãra ẽpẽerã Tachi Ak'õrenepemarã pẽra mãɨnepa ichia mãra t'ɨ̃na pẽra, Jesucristo k'orea minachia jĩrak'aua k'ɨ̃risiat'ɨ. Tachia piarã ĩjãa p'anɨane apatama Ichi Tachi Ak'õrepa peedapɨ mãɨnepa P'aare minachia k'awa bɨpɨ.

Hebreo 3:14

Tachia naa ĩjãanaananepa aba piuutadea Cristode ĩjãa p'ananaipɨra, ichi ome p'ananaipɨ.

Santiago 3:9

Tachi k'ĩramepa Tachi Chiparia pia pedeapatama, mãɨnepa ara mãɨ k'ĩramepa ẽpẽrarã́ k'achia pedeapatama, Tachi Ak'õrepa ara ichi jĩra oodamina.

1 Pedro 5:1

Mãra ũpẽarã ak'ɨpataɨrã́ mɨa chichupuria idiruma, mɨ sida ũpẽarã ak'ɨparí pẽra. Cristo minachia mĩana mɨa unusima. Mãɨnepa Tachi Ak'õrepa Cristo chi atepe bɨ unupirude mɨ sida ichi ome baipɨ. Mãɨpuru nãɨya chichupuria idiruma:

1 Juan 1:3

Taipa ununana mãɨnepa ũrinana mãrá jara p'anɨma mãra sida tai ome ará Tachi Pajãnepema Ak'õre ome mãɨnepa ichi Warra Jesucristo ome pia p'ananamẽrá.

Apocalipsi 21:23

Ɨmata mãɨnepa jedek'o newẽa mãɨ p'uuru ɨnaa baparima, Tachi Ak'õre achiterreapa mãɨ ɨnaa bapipari pẽra, mãɨnepa chi Oveja Chak'epa jẽrat'ĩu bapipari pẽra.

Apocalipsi 22:14

»Minachia pia p'anɨma chi neet'á pia sɨɨ uru bet'a. Ãchi p'uurude eda wãnai p'anɨma nejõ tachi chok'ae p'anapiparí jõnai k'orea.

Apocalipsi 22:5

Mãma waa k'iu baiwẽma. Tachi Ak'õre Chiparipa ɨnaapii bɨ pẽra, ĩpirawẽa mãɨnepa ɨmatawẽa ẽpẽerã pia p'ananaipɨ. Ewaricha ãchi ichi ome ará chi poro jũra jɨ̃parí jɨ̃ p'anɨrã p'ananaipɨ.