Apocalipsi 6:4 - Tachi Ak'õre Pedea

⁴ Mãɨ mãmá ak'ɨside mũra p'urea bɨt'a unusima. Abaɨpa k'ĩruuparí nek'o waibɨa bɨt'a teasima chi mũra ɨ̃rɨ suak'abari bɨa. Tachi Ak'õrepa ichiá chi nãɨ ĩjũane ẽpẽerã ará sõpia p'anɨrã nemietá itu oopisima ara ãstu chi jõ nɨbamẽrá mãɨ k'ĩruupik'a nɨbɨdepa.

Apocalipsi 6:4 ပူးပေါင်းရင်းမြစ်များ

Mateo 10:34

»Mɨ nãɨ ĩjũanea chesiade a k'ɨ̃risiarãt'ɨ ẽpẽerã ne k'ɨ̃risiadawẽa p'anapii k'orea. Mɨ mãɨ k'orea chewẽa bɨma, mãɨpari che bɨma ẽpẽrarã tausia k'ĩruu p'ananamẽrá.

Mateo 24:6

P'uuru aba bɨ awaraɨ ome k'ĩruupik'a nɨbɨ mãɨnepa mãɨ k'ĩruupik'a nɨbɨ ũriutade, p'erarãt'ɨ. Mãɨ jõma mãɨyai bɨma. Maamina nãɨ ewari waidi paiwẽma.

Juan 19:11

Mãɨne Jesupa p'anoosima: —Tachi Ak'õrepa pɨ bɨdaépara pɨa mɨ mi ãpia pida ooiwẽ pasima. Mãɨpuru chi mɨ pɨ juade teadapa pɨ k'aepẽra nemietá atepe oosima.

Apocalipsi 12:3

Maapae mãicha pajãne ne jara k'ɨ̃ria bet'a unupisima. Mɨa je p'urea minachia bɨt'a unusima. Mãɨ jepa poro siete uru basima mãɨnepa k'achu diez uru basima. Poro jũra jɨ̃parí porocha jɨ̃ basima.

Apocalipsi 13:10

«Chi p'uek'oada eda serra bɨde ateewãnai bɨt'a, mãɨ piarã ateewãnait'a. Chi k'ĩruuparí nek'odepa piui bɨ piarã nek'odepa piuipɨ». Mãɨ k'orea Tachi Ak'õre ẽpẽerãpa minachia ĩjãa p'anɨnepa minachia choadai p'anɨma.

Apocalipsi 17:3

Ara mãɨne Tachi Ak'õre Jaoredepa bɨde Tachi Ak'õrepa ɨt'aripa peedapa mɨ ĩjũa pania newẽa bɨdea ateesima. Mãma mɨa unusima wẽra ãnimara mietá mãɨnepa p'urea bɨ ɨ̃rɨ suak'abari bɨt'a. Chi ãnimara k'ak'uade t'ɨ̃ miak'ãe bɨ basima. Mãɨpa Tachi Ak'õre k'orea k'achia pedea basima. Poro siete mãɨnepa k'achu diez uru basima.

Apocalipsi 17:6

Mãɨ ak'ɨside k'awasima mãɨ wẽra ẽpẽerã Tachi Ak'õreneerã oa torudepa piu basit'a, chi Jesude ĩjãapataɨrã peadada oapa. Mɨa mãɨ wẽra unuk'ari, waa k'awa k'ɨ̃risiawẽa beesima.