Apocalipsi 5:8 - Tachi Ak'õre Pedea

⁸ Mãɨ k'art'a jitak'ari chi ẽpẽra jĩra k'ĩmari chok'ae berã mãɨnepa chi chõarã veinticuatro berã ichi naa sĩraporode bari k'op'aneesidama. Ãchi k'ak'awá arpa uru p'anasima mãɨnepa p'arat'u jãjoa bɨ nee ooda uru p'anasima. Chi p'arat'u jãjoa bɨ ãchia incienso k'era ipiru uru p'anasima. Chi incienso k'era jara k'ɨ̃ria bɨma chi ẽpẽerã Tachi Ak'õrenerãpa ichiá ɨt'aa chiidi p'anɨt'a.

Apocalipsi 5:8 ပူးပေါင်းရင်းမြစ်များ

Juan 1:29

Mãɨ norema Juanpa Jesú ichimá cheru unuk'ari, ya jarasima: «¡Ak'ɨt'ɨ! Jãɨt'a Tachi Ak'õre oveja chak'epɨ. Ichidepa Tachi Ak'õrepa nãɨ ĩjũanepemarãpa nemietá oopataɨ k'ɨ̃risia atuaipɨ.

Juan 5:23

Mãɨya ãareaɨrãpa mɨ Ak'õre wap'ea p'anɨ jĩra mɨ sida wap'eadaipɨ. Chi mɨ wap'eawẽa bɨpa mɨ Ak'õre sida wap'eawẽa bɨma, mɨ Ak'õrepa mɨ nãɨ ĩjũanea peeda pẽra.

Hebreo 1:6

Mãɨ awara Tachi Ak'õrepa ichi Warra aba bɨt'a nãɨ ĩjũanea peeside nãɨya jarasima: «Ãarea Tachi Pajãnepema Ak'õrepa ɨt'aripa peedaɨrãpa ichiá pia pedeadai p'anɨma».

Apocalipsi 13:8

Mãɨne chi nãɨ ĩjũane ãareaɨrãpa mãɨ ãnimara minachia k'ɨ̃riasidama. Nãɨ ĩjũa ooi naena ãchi t'ɨ̃ chi Oveja Chak'e k'art'ade eda bɨ baé pasima. Mãɨ chi ewaricha chok'ae p'ananai k'art'ade ãchi t'ɨ̃ ãarea eda bɨ bɨma.

Apocalipsi 15:2

Mãɨ awara mɨa p'usa jĩra p'ap'ãrá tot'á bɨ urua nɨbɨt'a unusima. Mãɨ lawari ãarea chi ãnimara p'uedaadat'a bai nɨp'anasidama. Ãchia mãɨ ãnimará mãɨnepa ara ichi jĩra juapa oodada sãdoa pia pedeadaé pasima mãɨnepa ichi t'ɨ̃ chi número bɨpidaé pasima. Ãchia chi Tachi Ak'õrepa teadat'a arpa juade uru p'anasima.

Apocalipsi 15:7

Mãɨne ẽpẽra jĩra k'ĩmari chok'ae p'anɨnepema abaɨpa chi Tachi Ak'õrepa ɨt'aripa peedaɨrã́ ãchicha p'arat'u jãjoa bɨ nee ooda teasima. Mãɨ p'arat'ut'a chi Tachi Ak'õre ewaricha chok'ae baparí k'ĩruu bɨ k'awapi bɨma.

Apocalipsi 19:4

Mãɨne chi veinticuatro chõarã mãɨnepa ẽpẽra jĩra k'ĩmari chok'ae p'anɨ sĩraporode bari k'op'aneesidama Tachi Ak'õre k'ɨ̃rianai k'orea. Tachi Ak'õre ichi suak'a beeparí auk'ará bɨde suak'abari bɨde ãchia nãɨya pia pedeasidama: «¡Mãɨya beese! ¡Tachi Chiparia pia pedeadai p'anɨma!»

Apocalipsi 4:4

Mãɨnepa veinticuatro suak'a beeparí auk'ará p'anɨt'a jũra p'anasima. Chi mãɨ ɨ̃rɨ suak'a p'anasima chi chõarã 24 p'anɨt'a. Ãchi neet'á t'ot'oa beasima. Mãɨnepa poro jũra jɨ̃parí nee ooda jɨ̃ p'anasima.

Apocalipsi 4:6

Mãɨ chi suak'a beeparí auk'ará bɨ naa p'usa jĩra p'ap'ãrá basima. Mãɨ tot'á vidrio jĩra basima. Chi suak'a beeparí juaraari, juawieri, ãpɨtea, mãɨnepa ichi k'ĩrari ẽpẽra jĩra k'ĩmari chok'ae p'anɨt'a p'anasima. Ãchi tau k'ak'ua ãarea bae beasima, ãchi p'echude mãɨnepa ep'alatade.

Apocalipsi 4:8

Chi mãɨrã ãchi k'ak'awá ĩk'arra sei uru beasima. Ãchi k'ak'ua ãarea tau pará beasima. Chi ĩk'arra ek'ari pida tau ãarea beasima. Ãst'á mãɨnepa teamasi pida sẽnawẽa pedeadepa nãɨya jarapachidama: «Minachia pia bɨma, minachia pia bɨma, minachia pia bɨma Tachi Chipari, chi Ne Ãarea P'ue Bɨ Tachi Ak'õre». Ichipɨ, ichi naena basima mãɨnepa ichi chei bɨpɨ.

Apocalipsi 5:11

Mãɨya bɨde mɨa chi Tachi Ak'õrepa peedaɨrã ɨt'aripema k'ari p'anɨ ũrisima. Minachia p'anɨẽra mɨa p'ue joisiaé pasima. Ãchi chi Tachi Ak'õre suak'a beeparí auk'ará bɨt'a, chi ẽpẽra jĩra chok'ae berã mãɨnepa chi veinticuatro chõarã p'anɨt'a jũra p'anasima.

Apocalipsi 5:12

Nãɨya jĩk'ua k'ari p'anasidama: «¡Chi Oveja Chak'e peadada minachia pia bɨma! Ãareaɨrãpa pia pedeadai p'anɨma ichit'a mãɨ ichia ãarea jõma p'ue bɨẽra, mãɨnepa ãarea uru bɨẽra, mãɨnepa ãarea k'awa bɨẽra mãɨnepa jua chaarea bɨẽra. Ichit'u chi atepe bɨade a jaradai p'anɨma mãɨnepa chi piipará bɨade a jaradai p'anɨma».

Apocalipsi 5:14

Maapae chi ẽpẽra jĩra k'ĩmari chok'ae berãpa nãɨya jarasidama: «Pia bɨma mãɨya bait'a». Ara mãɨne chi chõarã veinticuatro p'anɨ sĩraporode k'op'aneenak'ari chi ewaricha chok'ae bɨa pia pedeasidama.

Apocalipsi 5:6

Mãɨne chi suak'a beeparí auk'ará bɨ taade, chi ẽpẽra jĩra k'ĩmari chok'ae p'anɨ mãɨnepa chi chõarã cuatro p'anɨ estarik'a mɨa Oveja Chak'e bai nɨbɨt'a unusima. Ichi chi peasida jĩra basima. K'achu siete uru basima. Mãɨnepa tau siete uru bɨma. Mãɨ tau siete p'anɨpa jara k'ɨ̃ria p'anɨma chi Tachi Ak'õre naa jaore k'ak'o siete p'anɨt'a. Tachi Ak'õrepa ãchi ãarea nãɨ ĩjũane p'ueparima.

Apocalipsi 6:1

Mãɨne mɨa unusima chi Oveja Chak'epa chi k'art'ade k'ara bada aba oet'asit'a. Mãɨnepa chi ẽpẽra jĩra chok'ae be k'ĩmari p'anɨnepema chi abaɨpa nãɨya jara bɨt'a ũrisima: «¡Chese!» Chi pedea pa pedea jĩra basima.