Apocalipsi 13:16 - Tachi Ak'õre Pedea

¹⁶ Mãɨ awara chi ãnimara ĩjũanepa chedapa ãarea ãchi juaraari wa ãchi tau bɨɨrɨde tauchaapik'oasima. Chi ẽpẽerã minachia k'awa be, chi ẽpẽra ɨbɨwẽa be, mãɨnepa chi erreara minachia uru be, chi erreara nea be, chi chipari pae pari mimiapataɨrã, mãɨnepa chi chipari pae pari mimianak'apɨɨrã ãchi juaraari wa tau bɨɨrɨde tauchaapipadaade asima.

Apocalipsi 13:16 ပူးပေါင်းရင်းမြစ်များ

Hecho 26:22

Maamina Tachi Ak'õrepa mãɨ ewaridepa mɨ k'aripa bɨ pẽra mɨa chi minachia k'awa p'anɨa mãɨnepa chi minachia k'awawẽa p'anɨa wapida Jesú k'orea pedea bɨma. Tachi Ak'õre pari pedeapataɨrãpa mãɨnepa Moisepa k'ãre baeit'a jarasidama. Mãɨt'a mɨa jara bɨma.

1 Corintio 12:13

Chi eda tachidiidepemarã tachi judiorãpɨ, chi eda tachidiidepemarã judiorãwẽpɨ, chi eda tachidiidepemarã chi chipari pae pari mimiapataɨrãpɨ, chi eda tachidiidepemarã chi chipari pae pari mimiapataɨrãwẽpɨ. Maamina chi ara Tachi Ak'õre Jaore aba bɨpa tachi jõmãɨrã k'ak'ua aba bɨde bɨsima. Jõma tachia chi Jaore abarik'a bɨ jitasidama.

Gálata 3:28

Mãɨ jara bɨma judio griego ome abarik'a p'anɨma, chi chipari pae pari mimiaparí mãɨnepa chi chipari pae pari mimiak'apɨ́ ome abarik'a p'anɨma, mãɨnepa ɨmɨk'ĩra wẽra ome abarik'a p'anɨma. Jõma mãra ẽpẽra aba bɨ jĩra p'anɨma, Jesucristo ome ará p'anɨ pẽra.

Gálata 6:17

Chi Jesudepema pedea jaratea bɨ k'orea ẽpẽrarãpa mɨ piawẽa oosidama. Mɨ k'ak'ua k'õk'oadada pada ya anik'ari uru bɨma mãɨya unupii k'orea mɨ ichidit'a. Mãɨpuru idiipa waa mɨa k'ɨ̃riawẽma abaɨ pida mɨ waa ooit'a.

Ep'esio 6:8

Mãrapa k'awa p'anɨma chi chipari pae pari mimiaparipɨra wa chipari pae pari mimiapariwẽpɨra, Tachi Chiparipa tachicha teaipɨ tachia oodada jĩra.

Colosense 3:11

Tachi Ak'õrepa mãɨya ooda pẽra ichi k'ĩrari griego judio ome abarik'a p'anɨma. K'ak'ua tauchaa bɨ k'ak'ua tauchaawẽa bɨ ome abarik'a p'anɨma. Tua awaraɨdepema, ne atua bɨ ẽpẽra ome abarik'a p'anɨma. Chi chipari pae pari mimiaparí, mãɨ chi chipari pae pari mimiak'apɨ́ ome abarik'a p'anɨma. Cristo chi atepe piipará bɨma. Ichi jõmãɨrã sõne bɨma.

2 Timoteo 3:8

Jãɨrã ẽpẽrarãpa chi piarã pedea itu bɨpatama. Jane apataɨ mãɨnepa Jambre apataɨ jĩra oopatama, chi Moisé pedea itu bɨsidaɨt'a. Ãchi k'ɨ̃risia k'achia k'ɨ̃risiapatama mãɨnepa Cristode piarã ĩjãanak'ama.

Apocalipsi 11:18

Tuachapemarã pɨ ome k'ĩruusidama. Maamina pɨa ɨtɨai ewari chesima. Naapae pɨa piudaadarã ɨtɨaipɨ. Mãɨne chi pɨ pae pari mimiapataɨrã, chi pɨ pari pedeapataɨrã́, pɨ ẽpẽerã́, pɨ wap'ea be chi atepe berã́ mãɨnepa k'aepea berã́ pida pɨa nepia teaipɨ ãchia oodada jĩra. Maamina chi nãɨ ĩjũane nemietá oodada pɨa k'enaipɨ».

Apocalipsi 15:2

Mãɨ awara mɨa p'usa jĩra p'ap'ãrá tot'á bɨ urua nɨbɨt'a unusima. Mãɨ lawari ãarea chi ãnimara p'uedaadat'a bai nɨp'anasidama. Ãchia mãɨ ãnimará mãɨnepa ara ichi jĩra juapa oodada sãdoa pia pedeadaé pasima mãɨnepa ichi t'ɨ̃ chi número bɨpidaé pasima. Ãchia chi Tachi Ak'õrepa teadat'a arpa juade uru p'anasima.

Apocalipsi 19:18

Mãma k'odaipɨ poro jũra jɨ̃parí jɨ̃ bɨ piudaadarã, papaká berã chi minachia k'awa p'anɨrã piudaadarã, chi jua chaarea berã piudaadarã, mũra k'iuru mãɨnepa chi mũra ɨ̃rɨ wãpataɨ piudaadarã. Ãarea ẽpẽerã piudaadarã k'odaipɨ: chi chipari newẽa mimiapataɨrã piudaadarã, chi chipari pae pari mimiapataɨrã piudaadarã, chi k'aepe k'ede piudaadarã, mãɨnepa chi atepe berã piudaadarã k'odaipɨ».

Apocalipsi 19:20

K'ĩruutade chi mũra ɨ̃rɨ suak'abari bɨpa chi ãnimara mietá bɨ mãɨnepa chi Tachi Ak'õre pari pedeaparí chi piarãpẽawẽma bɨt'a jitasima. Mãɨ chi piarã Tachi Ak'õre pari pedeapariwẽpa chi ãnimara mietá bɨ t'ɨ̃nepa ẽpẽerãpa ne p'ue oodak'apɨ́ waibɨa bet'a oopachima. Mãɨya chi ẽpẽerãpa chi ãnimara mietá bɨa itu tauchaapidaadarã ãarea seapachima. Ichiaba chi mãɨ ãnimara jĩra bɨ juapa oodada sãdo minachia k'ɨ̃rianaanat'a seapachima. Chi mũra ɨ̃rɨ suak'abari bɨpa mãɨ ãnimara mietá bɨ mãɨnepa chi Tachi Ak'õre pari pedeaparí chi piarãpẽawẽma bɨt'a chok'ae p'anɨ senia azup're paara t'ɨpɨ urua bɨdea jirat'aasima.

Apocalipsi 19:5

Mãɨnepa mɨa ũrisima Tachi Ak'õre suak'a beeparí auk'ará bɨdepa abaɨpa nãɨya pedearut'a: «¡Jõma chi Tachi Ak'õre pae pari mimiapataɨrãpa, Tachi Ak'õrea pia pedeat'ɨ! ¡Machi, chi Tachi Ak'õre wap'ea berãpa, ichiá pia pedeat'ɨ! ¡Chi atepe berãpa mãɨnepa chi k'aepea berã pida pia pedeat'ɨ!»

Apocalipsi 20:12

Ichiaba chi piudaadarã chi atepe berã mãɨnepa chi k'aepea k'ede sida Tachi Ak'õre k'ĩrari bai nɨp'anɨt'a mɨa unusima. Mãɨne k'art'a ewak'oasima. Mãɨ k'art'ade jõma ẽpẽerãpa ne oodada bɨ nɨbasima. Abaɨ k'art'a sida ewasima. Mãɨne chi ewaricha chok'ae p'ananai k'art'ade ẽpẽerã t'ɨ̃ bɨ nɨbasima. Jõma piudaadarã Tachi Ak'õrepa ɨtɨasima ãchia oodada jĩra. Ãchia oodada ãarea k'art'ade bɨ nɨbasima.

Apocalipsi 20:4

Maapae mɨa chi suak'a beeparí auk'ará p'anɨ chok'ará unusima. Chi mãɨ ɨ̃rɨ suak'abari berã Cristo ome Tachi Ak'õrepa bɨsima chi minachia k'awa p'anɨrãt'a, mãɨrãpa ẽpẽerã nepɨra ak'ɨdai k'orea. Mãɨnepa mɨa ẽpẽerã poro t'ɨat'udada jaore unusima. Mãɨya poro t'ɨat'usidama Jesupa jarateada ĩjãa p'anɨ k'orea mãɨnepa Tachi Ak'õre pedea jaratea p'anɨ k'orea. Ãchia chi ãnimara mietá bɨt'a mãɨnepa chi ichi jĩra bɨ juapa oodada sãdo k'ɨ̃rianaé pasima. Ichi tauchaada ãchi tau bɨɨrɨde mãɨnepa juade pida itu bɨpidaé pasima. Ãchi chok'ae p'irabaridak'ari mil ãyo Cristo ome poro jũra jɨ̃parí jɨ̃ p'anɨrã jĩra p'aneesidama.

Apocalipsi 6:15

Maapae chi nãɨ ĩjũanepema chi poro jũra jɨ̃parí jɨ̃ be, chi ãchieri be, chi papaká be, chi ɨbɨa be, chi chaarea be, chi chipari pae pari mimiapataɨrã mãɨnepa chi chipari pae pari mimianak'á be eya uria bɨde mãɨnepa p'ẽya uria be t'ãena mĩrusidama.

Apocalipsi 7:3

«Nãɨ ĩjũa ãrirãt'ɨ, chi p'usa sida, ni pak'uru sida mãɨ taipa chi Tachi Ak'õre pae mimiapataɨrã ãarea ãchi tau bɨɨrɨde tauchaautadea».