2 Pedro 2:2 - Tachi Ak'õre Pedea

² Ãchia waapẽarã taade minachia k'ĩra p'era oopataɨt'a, chok'araɨrãpa ara mãɨya oodaipɨ. Ãchi k'orea ẽpẽrarãpa chi piarã pedea k'orea piawẽa pedeadaipɨ.

2 Pedro 2:2 ပူးပေါင်းရင်းမြစ်များ

Mateo 22:16

Mãɨ k'orea p'ariseorãpa ãchi ome p'ɨrrɨapataɨrã mãɨnepa Herode lawari p'anɨrã Jesumá peesidama. Mãɨrãpa Jesua jarasidama: —Jarateaparí, taipa k'awa p'anɨma pɨ ẽpẽra jĩp'a bɨt'a. Abaɨ pida pɨá awara k'ɨ̃risiapik'ama, pɨa ẽpẽrarã ãarea abarik'a unupariideepuru. Mãɨpari Tachi Ak'õre o k'orea piarã jarateaparima.

Mateo 24:24

Mãɨ ewaride waapẽarãpa ara ãchi Tachi Ak'õrepa Tachi K'aripaparí teai jaradaade a jaradaipɨ. Ichiaba waapẽarãpa sea jaradaipɨ ãchi Tachi Ak'õre pari pedeapataɨade adaipɨ. Mãɨrãpa ẽpẽrarãpa ne p'ue oodak'apɨ́ waibɨa be oodaipɨ ẽpẽrarã seadai k'orea. Tachi Ak'õrepa jɨrɨ atadaɨrã sida p'ue seadaipara, ãchi sida seadai pasima.

Marco 12:14

Chedak'ari jarasidama: —Jarateaparí, taipa k'awa p'anɨma pɨ ẽpẽra jĩp'a bɨt'a. Abaɨ pida pɨá awara k'ɨ̃risiapik'ama, pɨa ẽpẽerã ãarea abarik'a unupariideepuru. Mãɨpari Tachi Ak'õre o k'orea piarã jarateaparima. Romanepema pae erreara jɨrɨp'epataɨ ¿tachi judiorãpa p'aadai pia bɨk'ãra wa mãɨyawẽ?

Marco 13:22

Mãɨ ewaride waapẽarãpa ara ãchi Tachi Ak'õrepa Tachi K'aripaparí teai jaradaade a jaradaipɨ. Ichiaba waapẽarãpa sea jaradaipɨ ãchi Tachi Ak'õre pari pedeapataɨade adaipɨ. Mãɨrãpa ẽpẽerãpa ne p'ue oodak'apɨ́ waibɨa be oodaipɨ ẽpẽerã seadai k'orea. Tachi Ak'õrepa jɨrɨ atadaɨrã p'ue seadaipara, ãchi sida seadai pasima.

Juan 14:6

Mãɨne Jesupa jarasima: —Mãɨ o mɨpɨ. Mɨnepa Tachi Ak'õre piarã k'awa p'anɨma mãɨnepa chok'ae bai uru p'anɨma. Mɨnepa wãnaepɨra aba pida mɨ Ak'õremá p'ue chedaiwẽma.

Hecho 13:10

—¡Tiore warra, pɨa ne ãarea jĩp'a bɨt'a k'ɨ̃riak'ama! ¡Nemietá ooyá bɨma mãɨnepa chi sea bɨma! ¿K'ãre k'orea ara pɨchia Tachi Chipari pedea seaade a bɨma?

Hecho 14:2

Maamina chi judiorã Jesude ĩjãawẽa bepa mãɨ judiorãwẽpa chi ũpẽarã k'orea piawẽa k'ɨ̃risiapisidama.

Hecho 16:17

Mãɨ ãwẽra Pablo tai ome k'aadea cherude jĩk'ua jarapachima: —¡Nãɨ ẽpẽerã Tachi Ak'õre chi Choma bɨ pae pari mimiapataɨrãpɨ! Ãchia mãrá jara p'anɨma sãmaasã́ mãɨ Tachi Ak'õrepa tachi k'aripaparit'a.

Hecho 18:26

Mãɨne Apolopa judiorã ará pedeapataɨ tede ne wap'eawẽa jaratea basima. Ichia jaratea bɨt'a Aquilapa mãɨnepa Priscilapa ũrisidama. Mãɨpuru ichi ãyá ateewãnak'ari Tachi Ak'õre O k'orea atepe jarateasidama.

Hecho 19:9

Maamina chi eda waapẽarã sõ chaarea p'anasidepa ĩjãanaé pasima. Ẽpẽerã k'ĩrari chi Jesú O k'orea k'achia pedeapachidama. Mãɨpuru Pablo ãyá wãsima. Ichia chi Jesude ĩjãapataɨrã jarateapataɨ tedea ateewãsima. Mãɨ te Tiranodé pasima. Mãma ewaricha Pablopa jaratea beesima.

Hecho 22:4

Mãɨpa mɨa chi O Chiwidide ĩjãapataɨrã ẽp'ẽ bapachima, ãchi mĩapii k'orea. Ɨmɨk'ĩrarã mãɨnepa wẽrarã chi jɨ̃a nɨbɨpataɨ tede eda jɨ̃a nɨbɨpisima. Mãɨnepa chi eda waapẽarã peapisima.

Hecho 24:14

Maamina mɨa pɨá nãɨ jararuma: mɨa tai chõarãenapemarã Tachi Ak'õrene ĩjãa bɨpɨ. Mɨ chi O Chiwidi apataɨdepemapɨ. Ãchia mãɨ O Chiwidi seade apatama maamina mɨa Moisepa bɨda mãɨnepa Tachi Ak'õre pari pedeapataɨrãpa bɨdada ãarea ĩjãa bɨma.

Romano 2:24

Mãɨpuru Tachi Ak'õre pedeade nãɨya bɨ bɨma: «Judiorãwẽpa Tachi Ak'õre k'orea k'achia pedeapatama mãra judiorãpa piawẽa oopata k'orea».

1 Timoteo 5:14

Mãɨ k'orea mɨa k'ɨ̃ria bɨma p'ẽtã́ wapida warra be k'ima atadait'a, warra t'õnait'a, mãɨnepa ãchi te sida pia ak'ɨdait'a. Mãɨya tachi nek'ĩramaapa p'ue piawẽa pedeaiwẽma.

Tito 2:8

Piarã pedea jaratea base mi ãpia pida pɨ k'orea k'achia pedeapidaemaapa. Mãɨya jaratea baipɨra, pɨchi nek'ĩramaarã k'ĩranejasiadaipɨ. Ãchia mi ãpia pida tachi k'orea p'ue k'achia pedeadaiwẽma.

1 Pedro 2:12

Tachi Ak'õrene ĩjãanak'apɨɨrã t'ãena jĩp'a nipat'ɨ. Mãɨya ãchia mãra nemietá oopataade a p'anɨmina, mãrapa pia oo p'anɨt'a unu p'anɨma. Maapae Tachi Ak'õre cherude mãra k'orea ichiá pia pedeadaipɨ.

2 Pedro 2:12

Maamina sea jarateapataɨrãpa ãchia ne atua p'anɨnepema piawẽa pedeapatama. Ãnimara jĩra k'ɨ̃risiawẽa p'anɨma. Aba ãchi k'ak'uapa k'ɨ̃ria bɨt'a oopatama. Ãnimara t'õpatama ẽpẽrarãpa jitadak'ari peadamẽrá. Ara mãɨ jĩra sea jarateapataɨrã piudaipɨ.

2 Pedro 2:15

Tachi Ak'õre o jĩp'a bɨ itu bɨdak'ari o ãyá wãsidama. Beor warra Balaampa ooda jĩra oopatama. Balaam erreara awaa bada pẽra erreara k'orea nemietá ooi k'ɨ̃risiasima.

2 Pedro 2:18

Ãchia pedea auk'ará jarateapatamina, mãɨpa tachi k'aripak'ama. Ãchia jarateapatama nãɨ k'ak'uapa nemietá oo k'ɨ̃ria bɨ oodai p'anɨ. Mãɨya chi tãaraawẽa nemietaadepema wãnana berã ãchia seapatama mãicha nemietá oodamẽrá.

2 Pedro 2:21

Mãɨpuru Tachi Ak'õre pedea k'awadada itu bɨdai k'aepẽra, pia bɨma Tachi Ak'õrepa oo jĩp'a bɨt'a k'awadaadawẽpara.

2 Pedro 2:7

Maamina ẽpẽra jĩp'a bɨt'a Lot apataɨt'a Tachi Ak'õrepa Sodoma paa peeidepema k'aripasima. Lot sõp'ua bapachima mãɨ p'uurudepemarãpa nejõma nemietá oo p'anɨ k'orea.

Juda 1:10

Maamina mãɨ ẽpẽrarã mãra t'ãena chedaadapa ãchia ũrinawẽa p'anɨ k'orea piawẽa pedeapatama. Ãnimararã k'ɨ̃risiapata jĩra k'ɨ̃risiapatama. Ãnimara abapuru ichi k'ak'uapa k'ɨ̃ria bɨ jĩra mãɨya oopatama. Mãɨ k'orea Tachi Ak'õrepa ɨtɨaipɨ.

Juda 1:4

Mãɨya mɨa nãɨ bɨruma chi eda waapẽarã ũpẽarã jĩra berã chedak'ari mãra t'ãena eda p'anɨ pẽra. Mãɨ ẽpẽrarãpa seadepa jarateapatama Tachi Ak'õrepa ichi sõpiadepa tachi k'aripada pẽra tachi k'ak'uapa nemietá minachia oo k'ɨ̃ria bɨt'a p'ue oodai p'anɨt'a. Ãchia Tachi Chipari aba bɨ Jesucristot'a itu bɨpatama. Tãaraaenapemat'u eda bɨ basima Tachi Ak'õrepa ãchi ɨtɨait'a.

Juda 1:7

Ara mãɨ jĩra Tachi Ak'õrepa Sodomanepemarã, Gomorradepemarã, mãɨnepa ãchi k'ait'a be p'uurudepemarã sida ɨtɨasima. Mãɨ ẽpẽrarãpa k'ĩranejasia oopachidama. Nejõma nemietá tachi k'ak'uapa ooiwẽa bɨt'a oopachidama. Mãɨpuru Tachi Ak'õrepa ãchi t'ɨpɨ urua k'iik'ade ewaricha minachia mĩa uru bɨma. Mãɨpa k'awapi bɨma nemietá oopataɨrã ãarea mãɨya minachia mĩa p'ananait'a.

Apocalipsi 12:9

Mãɨne chi je waibɨa bɨ mãɨnepa chi ichi lawari p'anana ãarea nãɨ ĩjũanea bat'a peesidama. Mãɨ je waibɨa bɨ mãɨt'u chi chõarãenapema taamapɨ. Chi t'ɨ̃ Tiore mãɨnepa Ãnimara apatama. Ichia chi nãɨ ĩjũane be ãarea sea uru baparima.

Apocalipsi 13:14

Tachi Ak'õrepa mãɨ ĩjũanepa ochiadá ne p'ue oodak'apɨɨt'a itu oopisima chi mãɨ p'usadepa cheda t'ɨ̃ne. Mãɨya chi nãɨ ĩjũanepa ochiadapa chi nãɨ ĩjũanepemarã seasima. Ichia ẽpẽerã́ sãdo jĩra oopisima chi naapema ãnimara k'ĩra jĩra, chi nek'opa k'õ bada mãɨ wapida piuwẽa bɨ jĩra.

Apocalipsi 13:8

Mãɨne chi nãɨ ĩjũane ãareaɨrãpa mãɨ ãnimara minachia k'ɨ̃riasidama. Nãɨ ĩjũa ooi naena ãchi t'ɨ̃ chi Oveja Chak'e k'art'ade eda bɨ baé pasima. Mãɨ chi ewaricha chok'ae p'ananai k'art'ade ãchi t'ɨ̃ ãarea eda bɨ bɨma.