2 Pedro 2:1 - Tachi Ak'õre Pedea

¹ Israel ĩjũanepemarã t'ãena Tachi Ak'õre pari pedeapataɨrã sea jarateapataɨrã pasima. Mãra t'ãena pida sea jarateapataɨrã pará p'ananaipɨ. Seadepa ãchia tachi o ãyá wãpiparii k'ɨ̃risiat'a, Tachi Ak'õre pedea jĩra jarateadaipɨ. Tachi Chipari Jesupa ãchi k'aripa bada waa k'aripawẽa beesiade adaipɨ. Mãɨ k'orea Tachi Ak'õrepa isapea ɨtɨaipɨ.

2 Pedro 2:1 ပူးပေါင်းရင်းမြစ်များ

Mateo 10:33

Ara mãɨ jĩra abaɨ pida ẽpẽrarã k'ĩrari mɨ atua bɨade aipɨra, mɨa pida mɨ Ak'õre pajãne bɨ k'ĩrari ichi atua bɨade aipɨ.

Mateo 24:11

Tachi Ak'õre pari pedeapataɨ chi piarãwẽa berã chedaipɨ. Mãɨrãpa ẽpẽrarã chok'ará seadaipɨ.

Mateo 24:24

Mãɨ ewaride waapẽarãpa ara ãchi Tachi Ak'õrepa Tachi K'aripaparí teai jaradaade a jaradaipɨ. Ichiaba waapẽarãpa sea jaradaipɨ ãchi Tachi Ak'õre pari pedeapataɨade adaipɨ. Mãɨrãpa ẽpẽrarãpa ne p'ue oodak'apɨ́ waibɨa be oodaipɨ ẽpẽrarã seadai k'orea. Tachi Ak'õrepa jɨrɨ atadaɨrã sida p'ue seadaipara, ãchi sida seadai pasima.

Mateo 24:5

Chok'araɨrãpa jaradaipɨ: “Mɨ Tachi Ak'õrepa Tachi K'aripaparí teai jara bada”. Mãɨya ẽpẽerã minachia ãarea seadaipɨ.

Mateo 7:15

»Jĩrak'aua p'anat'ɨ sea Tachi Ak'õre pari pedeapataɨrãane apataɨrã paara. Ãchia piarã jĩra jarateapatama maamina mãɨya p'anɨma ẽpẽrarãpa Tachi Ak'õre pedea ĩjãapidaemaapa.

Marco 13:22

Mãɨ ewaride waapẽarãpa ara ãchi Tachi Ak'õrepa Tachi K'aripaparí teai jaradaade a jaradaipɨ. Ichiaba waapẽarãpa sea jaradaipɨ ãchi Tachi Ak'õre pari pedeapataɨade adaipɨ. Mãɨrãpa ẽpẽerãpa ne p'ue oodak'apɨ́ waibɨa be oodaipɨ ẽpẽerã seadai k'orea. Tachi Ak'õrepa jɨrɨ atadaɨrã p'ue seadaipara, ãchi sida seadai pasima.

Luca 12:9

Ara mãɨ jĩra abaɨpa ẽpẽrarã k'ĩrari mɨ atua bɨade aipɨra, Tachi Ak'õre pajãnepema peedarã k'ĩrari mɨa ichi atua bɨade aipɨ.

Luca 21:8

Jesupa p'anoosima: —Jĩrak'aua nipat'ɨ abaɨa pida mãra seapiemaapa. Chok'araɨrãpa jaradaipɨ “mɨ Tachi Ak'õrepa Tachi K'aripaparí teai jara bada”. Mãɨ awara chi ewari arí payade adaipɨ. Maamina ãchi ome wãrãt'ɨ.

Luca 6:26

Chupuri p'ananaipɨ ẽpẽrarãpa mãra k'orea pia jaradaipɨra. Mãra chõarãenapemarãpa ẽpẽrarã Tachi Ak'õre t'ɨ̃nepa seat'a jarateapataɨrã sida ara mãɨya pia jarapachidama”.

Romano 16:18

Ãchia Tachi Chipari Jesucristopa k'ɨ̃ria bɨ oo p'anɨwẽma, mãɨpari ãchia k'ɨ̃ria p'anɨt'a oo p'anɨma. Ãchi pedea pia bɨdepa chi k'ɨ̃risiadawẽa berã seapatama.

1 Corintio 11:19

Piarã mãra k'ɨ̃risia awara awará p'anɨnepa unupiipɨ k'airã Tachi Ak'õrepa pia unu bɨ.

1 Corintio 6:20

Tachi Ak'õrepa mãra atasima. Tachi Ak'õrené pẽra mãra k'ak'uade mãɨnepa jaorede k'ĩra jĩp'a p'anat'ɨ.

1 Corintio 7:23

Cristopa ne p'aadadepa mãra atasima. Mãɨ k'orea waapẽarã pae pari mimiapataɨrã p'anarãt'ɨ.

Gálata 2:4

Mãɨnepema pedeasidama chi eda waapẽarã ũpẽarã piarãwẽpa jarapachida pẽra. Mãɨrã ũpẽarã jĩra p'ananapa ak'ɨ p'anapachidama tachi chi Moisepa bɨdadepema ãyá wãsida k'awa. Jesucristode ĩjãanai k'aepẽra, chi Moisepa bɨdat'a mãicha oopi k'ɨ̃ria p'anasidama, chi mãɨ bɨda pae pari mimiapataɨrã jĩra p'anasi pẽra.

Gálata 3:13

Moisepa bɨ bada jĩra oo p'anɨwẽ pẽra, nepɨra pará p'anɨane aima. Mãɨnepema Jesucristopa tachi k'aripasima. Ichit'a Tachi Ak'õrepa tachi k'ak'ua k'orea nepɨra paraapisima. Moisepa bɨdade nãɨya bɨ bɨma: «Chi pak'urude jira bɨdada, Tachi Ak'õrepa mãɨ nepɨra pará bɨade aipɨ».

Gálata 4:17

Mãra t'ãena chi piawẽa jarateapataɨrãpa nejõma oo p'anɨma mãrapa ãchi pedea ĩjãanamẽrá. Maamina ãchia mãɨya oodak'ama mãra k'aripadai k'orea. Mãra taidepa ãyá atee k'ɨ̃ria p'anɨma sõnepa ãchi ome p'ananamẽrá.

Gálata 5:20

juapa oodada sãdoa ɨt'aa chiidipataɨ, jaipanarãpa oopataɨ, waapẽarã unuemaapataɨ, k'ĩruu pedeapataɨ, waapẽarãné uru p'ananai k'ɨ̃riapataɨ, ɨ̃apachia k'ĩruupataɨ, waapẽarã k'aepẽra atepe pia p'ananayá jɨrɨpataɨ, ãchi k'ɨ̃risia k'ak'awá k'ɨ̃risia p'anapataɨ, Tachi Ak'õre pedea k'ĩra awara jaratea p'anɨnepa awara wãpataɨ,

Ep'esio 1:7

Ichi Warra oa ãrinanepa Tachi Ak'õrepa tachi nemietaadepema k'aripasima. Ichi minachia sõpia bɨdepa tachia nemietá oodada ãarea k'ɨ̃risia atuasima.

Ep'esio 4:14

Mãɨyara waa warra chak'e jĩra p'ananaiwẽma. Warra chak'epa paritua pedeauta ĩjãaparima. Mãɨ awara ẽpẽrarã sea k'awa berãpa jaratea p'anɨnepa seade ĩjãapipatama nãupa japa ãyá ateeru jĩra. Maamina tachi mãɨ japa jĩra p'ananaiwẽma.

P'ilipense 3:19

Mãɨpuru piuutade Tachi Ak'õrepa ãchi minachia ɨtɨaipɨ. Ãchi k'ak'uapa k'ɨ̃ria bɨt'a chi ãchi ak'õrepɨ. K'ĩra p'era oo p'anɨ k'orea pia pedeapatama. Abapuru nãɨ ĩjũanepema k'ɨ̃risiapatama.

Colosense 2:18

Mãɨ k'orea abaɨ pida mãrapa nepia pajãne atadaiwẽane adaipɨra, ĩjãarãt'ɨ. Chi mãɨya pedeapataɨrã sea nipapatama waapẽarã k'aepẽra k'aepe be jĩra. Ãchia Tachi Ak'õrepa ɨt'aripa peedaɨrã minachia k'ɨ̃riapatama. K'ãmok'araa jĩra ununana minachia jarateapatama. Tachi k'ak'uapa ne piawẽa ooyá bɨdepa ẽpẽra minachia k'awa bɨ jĩra paritua k'ɨ̃risiapatama.

Colosense 2:8

Jĩrak'aua p'anat'ɨ mi abaɨa pida mãra seapidaemaapa chi pari k'ɨ̃risiapiparidepa mãɨnepa seaparí k'ɨ̃risiadepa. Jõma makɨɨ chõarãenapema k'ɨ̃risiat'a jaore chaarearã nãɨ ĩjũanepemapɨ. Mãɨ pedea Cristo k'oreawẽpɨ.

1 Timoteo 5:8

Abaɨpa ara ichi ẽpẽrarã mãɨnepa ichi tedepemarã sida k'aripak'á baipɨra, Tachi Ak'õre pedea itu bɨ bɨma. Cristode ĩjãanak'apɨɨrã k'aepẽra piawẽa oo bɨma.

2 Timoteo 4:3

Ewari parude ẽpẽrarãpa chi piarã pedea ũri k'ɨ̃rianawẽa p'ananaipɨ. Mãɨpari ãchia k'ɨ̃ria p'anɨnea wãnaipɨ. Mãɨpuru jarateapataɨrã chok'ará jɨrɨdaipɨ ãchia ũri k'ɨ̃ria p'anɨt'a jarateadamẽrá.

Tito 1:11

Ãchia jarateaiwẽa bɨ jaratea p'anɨnepa techa ẽpẽrarã́ piawẽa k'ɨ̃risiapipatama. Aba errearadeepuru jarateapatama. Mãɨrã́ jarateapirãse.

Tito 3:10

Abaɨpa ũpẽarã́ k'ĩruu pedeapisira, ichi ɨtɨase waa mãɨya oopiemaapa. Ichia ĩjãawẽpɨra, mãicha ɨtɨase. Mãɨne waidi ĩjãawẽpɨra, ichi ome barãse.

Hebreo 10:29

Mãɨpa ¿sãmaasã́ k'ɨ̃risia p'anɨma? ¿Tachi Ak'õrepa chi ichi Warra itu bɨpataɨ atepe ɨtɨaiwẽk'ãra? Tachi Ak'õrepa ichi Warra oadepa pedea chiwidi ausima tachi ichi pae pia bɨi k'orea. Mãɨyara chi Tachi Ak'õre Warra oa ãrina piawẽa bɨade apataɨrã ¿ichia atepe ɨtɨaiwẽk'ãra? Mãɨ awara Tachi Ak'õre Jaorepa ichi sõpiadepa tachi k'aripa bɨma. Mãɨyara chi Tachi Ak'õre Jaore k'orea mietá bɨade apataɨrã ¿ichia atepe ɨtɨaiwẽk'ãra?

1 Pedro 1:8

Mãrapa ununak'amina Jesucristo k'ɨ̃ria p'anɨma. Nãɨena ununawẽa p'anɨmina ichide ĩjãa p'anɨma. Ichi k'orea minachia arapá p'anɨma. Jãɨya arapá p'anɨ pẽra mãɨ arapá sãmaasã́ bɨ k'orea p'ue k'awa jaradawẽma.

2 Pedro 2:3

Erreara k'ɨ̃ria p'anɨ pẽra, mãra erreara atadai k'orea ara ãchi k'ɨ̃risiadepa sea jarateadaipɨ. Minachia tãaraaenapema Tachi Ak'õrepa ãchi nepɨra ak'ɨi k'orea bɨma, mãɨnepa tãaraawẽa bɨde ãchi piarã ɨtɨaipɨ.

1 Juan 2:26

Mɨa mãɨ bɨsima waapẽarãpa mãra sea k'ɨ̃ria p'anɨ pẽra.

1 Juan 4:1

Ũpẽarã, Tachi Ak'õre Jaoredepa pedea p'anɨane apataɨrã jõma ĩjãarãt'ɨ, mãɨpari jĩrak'aua ak'ɨt'ɨ ãchia piarã Tachi Ak'õre Jaoredepa wa waapẽarãnepa pedea p'anɨ k'awadai k'orea. Mãɨya oot'ɨ chi seapataɨrã nãɨ ĩjũane minachia p'anɨ pẽra.

Juda 1:18

Mãrá nãɨya jarasidama: «K'aadeapema ewaride ẽpẽerã Tachi Ak'õre oo uru p'anapataɨrã pará p'ananaipɨ. Tachi Ak'õre k'ɨ̃rianak'a pẽra ãchi k'ak'uapa oo k'ɨ̃ria bɨt'a oo p'ananaipɨ».

Juda 1:4

Mãɨya mɨa nãɨ bɨruma chi eda waapẽarã ũpẽarã jĩra berã chedak'ari mãra t'ãena eda p'anɨ pẽra. Mãɨ ẽpẽrarãpa seadepa jarateapatama Tachi Ak'õrepa ichi sõpiadepa tachi k'aripada pẽra tachi k'ak'uapa nemietá minachia oo k'ɨ̃ria bɨt'a p'ue oodai p'anɨt'a. Ãchia Tachi Chipari aba bɨ Jesucristot'a itu bɨpatama. Tãaraaenapemat'u eda bɨ basima Tachi Ak'õrepa ãchi ɨtɨait'a.

Apocalipsi 13:14

Tachi Ak'õrepa mãɨ ĩjũanepa ochiadá ne p'ue oodak'apɨɨt'a itu oopisima chi mãɨ p'usadepa cheda t'ɨ̃ne. Mãɨya chi nãɨ ĩjũanepa ochiadapa chi nãɨ ĩjũanepemarã seasima. Ichia ẽpẽerã́ sãdo jĩra oopisima chi naapema ãnimara k'ĩra jĩra, chi nek'opa k'õ bada mãɨ wapida piuwẽa bɨ jĩra.

Apocalipsi 2:13

»Mãrapa oo p'anɨt'a mɨa k'awa bɨma. Mãɨnepa k'awa bɨma ara mãra p'anapatamá tiore chi ichi suak'a beeparí auk'ará bɨde suak'abari bɨt'a. Maamina mãra mɨ paara wapida p'anɨma. Maamina chi tioredepemarãpa ũpẽa Antipa peasidaɨde mɨ k'orea piarã pedeada pẽra, mɨne ĩjãa p'anɨt'a itu bɨdaé pasima.

Apocalipsi 2:9

»Mãrapa oo p'anɨt'a mɨa k'awa bɨma. Mãra mĩa p'anɨt'a mãɨnepa nenea k'edet'a k'awa bɨma. Mãɨya p'anɨmina Tachi Ak'õrenepa ɨbɨa p'anɨma. Mɨa k'awa bɨma chi ara ãchi judiorãane apataɨrãpa mãra k'orea k'achia pedeapatat'a. Ãchi Tachi Ak'õrené ẽpẽerãane apatamina tioredé ẽpẽerãpɨ.

Apocalipsi 3:8

Nãɨya jara bɨma: »Mãrapa oo p'anɨt'a mɨa k'awa bɨma. ¡Ũrit'ɨ! Eda wãpataɨ mɨa mãra naa ewa nɨbɨsima. Mãɨ abaɨ pida p'ue serraiwẽma. Mãra ãpia chaareawẽa p'anɨmina mɨ pedea minachia ĩjãa p'anɨma. Mɨ itu bɨdawẽa p'anɨma.

Apocalipsi 5:9

Chi chõarã veinticuatro p'anɨpa mãɨnepa chi ẽpẽra jĩra chok'ae berãpa nãɨ k'ari chiwidit'a k'arisidama: «Pɨ pia bɨma mãɨ k'art'a jitak'ari chi k'ara nɨbɨ oet'ait'a, pɨ peasida pẽra. Chi mãɨ oa pɨa ãrisidepa ẽpẽerã Tachi Ak'õre pae atasima. Ẽpẽerã awaraɨcha, pedeacha, p'uurucha mãɨnepa ĩjũacha mãɨrãnepema eda waapẽarã atasima.

Apocalipsi 6:10

Nãɨya ɨbɨa jarasidama: «Jõmãɨrã Chipari, pɨ minachia pia bɨma, mãɨnepa pɨ pedea piarãpẽapɨ. ¿Sãapae pɨa chi jãɨ ĩjũanepemarã nepɨra ak'ɨk'ari maapae ɨtɨaima, tai peadada k'orea?»