2 Corintio 3:18 - Tachi Ak'õre Pedea

¹⁸ Tachia Cristode ĩjãa p'anɨ pẽra tachi k'ĩra neet'apa mẽra pɨra uru p'anɨ jĩra p'anɨwẽma. Mãɨpuru tachidepa waapẽarãpa Tachi Chipari k'ĩrawãrea unu p'anɨma k'ĩra ak'ɨpataɨde ak'ɨ p'anɨ jĩra. Mãɨne Tachi Chipari Jaorepa tachi ewaricha pia oopodo bɨma Tachi Chipari jĩra p'ananamẽrá.

2 Corintio 3:18 ပူးပေါင်းရင်းမြစ်များ

Juan 1:14

Chi Pedea apataɨ ẽpẽra k'ak'uade t'õk'ari tachi t'ãena bapachima. Ichi sõpiadepa tachi minachia k'aripasima. Ichia tachiá pia k'awapisima Tachi Ak'õre piarã sãmaasã́ bɨt'a. Mãɨne taipa ichi ãarea pia bɨt'a unusidama, Tachi Ak'õre Warrat'u mãɨya bɨ pẽra.

Juan 12:41

Isaíapa ichi k'art'ade mãɨya bɨsima Jesú chi Choma bɨ ununa pẽra. Mãɨ k'orea pedeasima.

Juan 17:22

Pɨa mɨ ateewãsima tachi ará p'ananamẽrá. Mãɨya mɨ chi choma bɨsima. Ara mãɨ jĩra mɨa ãchi chi choma bɨsima tachi ome k'ak'ua aba bɨ jĩra p'ananamẽrá.

Juan 17:24

»Ak'õre, pɨa nãɨ ĩjũa ooi naena mɨ k'ɨ̃ria basima. Mãɨpuru pajãne mɨ chi choma bɨsima. Mɨa k'ɨ̃ria bɨma ãarea pɨa mɨá teadaɨrã mãma mɨ ome ará p'ananait'a, pɨa mɨ chi choma bɨda ununamẽrá.

Romano 12:2

Chi nãɨ ĩjũanepemarãpa oopataɨ jĩra niparãt'ɨ, mãɨpari k'ɨ̃risia chiwidi Tachi Ak'õrepa tea bɨdepa jĩp'a nipat'ɨ. Mãɨya Tachi Ak'õrepa k'ɨ̃ria bɨt'a mãrapa k'awadaipɨ. Jõma ichia k'ɨ̃ria bɨt'a pia bɨma, jĩp'a bɨma mãɨnepa ichia pia unu bɨma.

Romano 13:14

Mãɨpari Tachi Chipari Jesucristo nipada jĩra nipat'ɨ. Nãɨ k'ak'uapa nemietá oo k'ɨ̃ria bɨt'a oodai k'ɨ̃risiarãt'ɨ.

Romano 8:29

Mãɨ mãɨya bɨma, ichia naenaena k'awa basi pẽra k'airã ichidirã pait'a. Ãchi bɨsima ichi Warra Jesú jĩra p'ananamẽrá. Mãɨya ichi Warra Jesú ũpẽarã chok'ará p'anɨnepema chi naapemapɨ.

Romano 8:4

Ichia mãɨya oosima tachia p'ue jĩp'a oodamẽrá Moisepa bɨdade jara bɨ jĩra. Naapae tachi jĩp'a nipadaipɨ nãɨ k'ak'uapa oo k'ɨ̃ria bɨdepa nipadawẽ pẽra, mãɨpari Tachi Ak'õre Jaoredepa nipapata pẽra.

Romano 8:7

Nãɨ k'ak'uapa oo k'ɨ̃ria bɨt'a k'ɨ̃risia baipɨra, Tachi Ak'õre ome chi nek'ĩramaapɨ. Moisepa bɨda jĩra ooi k'ɨ̃riak'ama; mi ãpia pida p'ue ook'ama.

1 Corintio 13:12

Ara nãɨena tachia Tachi Ak'õre k'orea tau t'aua bɨ jĩra unu p'anɨma chi k'ĩra ak'ɨpataɨde. Maamina ewariaba tachia jõma sãmaasã́ bɨt'a pia ununaipɨ. Ara nãɨena mɨa ãpia k'awa bɨma, maamina ewariaba ne ãarea k'awaipɨ Tachi Ak'õrepa mɨ k'awa bɨ jĩra.

1 Corintio 15:49

Tachi chi naapema ẽpẽra yooro k'ak'ua ooda jĩra p'anɨma mãɨnepa pajãnepa cheda ẽpẽra Cristo jĩra p'ananaipɨ.

2 Corintio 3:17

«Tachi Chipariade» arude «Tachi Ak'õre Jaore» jara bɨma. Tachi Chipari Jaoredepa nipautade, ichia nemietaade mãɨnepa Moisepa bɨdade jɨ̃ uru p'anana jĩra bɨdepema k'ẽet'aapiparima.

2 Corintio 4:4

Tachi Ak'õrene ĩjãanak'apɨɨrãmá chi mãɨ pia ũrinak'ama. Nãɨ ĩjũane tiore ãchi chiparipɨ. Ãchirã́ chi piarã pedea pia Cristo k'orea itu k'awapiwẽa bɨma tau p'ãrio oo bɨ jĩra. Mãɨya ãchia Cristo pia bɨ k'orea p'ue k'awadaiwẽma. Cristo Tachi Ak'õre pẽra mãɨya pia bɨma.

2 Corintio 4:6

Nãɨ ĩjũa jõma p'ãrio nɨbada Tachi Ak'õrepa ɨnaapisima. Ara mãɨ jĩra ichi ɨnaa bɨt'a tachi sõne ɨnaapisima. Mãɨpa jara bɨma ichi k'ĩrawãrea Cristodepa tachiá k'awapisit'a.

2 Corintio 5:17

Piarã abaɨ Cristo ome bɨpɨra, ichi naena bada jĩra bɨwẽma mãɨpari ichi ẽpẽra chiwidi jĩra bɨma.

Gálata 6:15

Tachi Ak'õremá k'ak'ua tauchaa bai wa k'ak'ua tauchaawẽa bait'a pia bɨwẽma. Ichimá, ẽpẽra chiwidi oodat'u mãɨ pia bɨma.

Colosense 3:10

Neet'á chiwidi jɨ̃uta jĩra mãra chiwidi p'aneesidama ara Tachi Ak'õre jĩra p'ananamẽrá. Mãɨ awara mãra pia oopodoutama ichi jĩra p'aneenamẽrá mãɨnepa ichi pia k'awadamẽrá.

1 Timoteo 1:11

Tachia chi Tachi Ak'õre k'orea pedea pi-ia jarateautade, mãɨ ãarea k'awapidaipɨ. Tachi Ak'õre pia bɨpa mãɨ mɨá teasima jaratea bamẽrá.

Tito 3:5

Mãɨpa tachi k'aripasima. Tachia pia oodada k'orea k'aripaé pasima, mãɨpari ichi k'ĩra chupuria bɨdepa k'aripasima. Tachi nemietá k'ɨ̃risia atuasima neet'á t'õna jĩra p'aneenamẽrá mãɨnepa chiwidi jĩra p'aneenamẽrá. Ichiaba Tachi Ak'õre Jaorepa tachiá mãicha chok'ae p'anapisima.

Santiago 1:23

Tachi Ak'õre pedea ũri bɨpa mãɨ oowẽpɨra, ẽpẽrapa k'ĩra ak'ɨpataɨde ichi k'ĩra ak'ɨru jĩra bɨma.

1 Juan 3:2

Ũpẽarã, tachi Tachi Ak'õre warrarãpɨ. Tachi Ak'õrepa wapida k'awapiwẽa bɨma tachi sãmaasã́ p'ananait'a. Maamina k'awa p'anɨma Cristo cherude ichi jĩra p'ananait'a, mãɨ ewaride ichi sãmaasã́ bɨ ununai pẽra.