2 Corintio 1:17 - Tachi Ak'õre Pedea

¹⁷ Maamina mɨa k'ɨ̃risia bada jĩra oodawẽ pẽra ¿mãramá mɨa awara awará jarasik'ãra? ¿Mãramá mɨa ooyade ada mãicha oowẽane aparik'ãra mɨa oo k'ɨ̃ria bɨ jĩra ooi k'orea?

2 Corintio 1:17 ပူးပေါင်းရင်းမြစ်များ

Mateo 1:19

Chi k'ima José ẽpẽra jĩp'a basima. Mãɨpuru María k'ĩup'ea amaai pasima, waapẽarã́ k'achia pedeapidaemaapa.

Mateo 5:37

Mãrapa ne oodayade adaipɨra, oot'ɨ. Ichiaba oodawẽane adaipɨra, oorãt'ɨ. Mãɨ paritua t'ɨ̃ne piarã ne ooyade a jarasira mãɨ pedea nemietaadepa che bɨma.

Juan 8:15

Mãrapa nãɨ ĩjũanepema k'ɨ̃risiadepa mɨ ak'ɨ p'anɨma. Mɨa aba pida mãra jĩra mãɨya ak'ɨk'ama.

2 Corintio 1:12

Nãɨ k'orea arapá p'anɨma: taipa k'awa p'anɨma sõ jĩp'a p'anɨnepa, k'ɨ̃risia piadepa nãɨ ĩjũanepemarã t'ãena mãɨnepa mãra t'ãena pia nipadada. Mãɨ sõ jĩp'a bai mãɨnepa k'ɨ̃risia pia Tachi Ak'õrenepemapɨ. Tai nãɨ ĩjũanepema k'ɨ̃risiadepa mãɨya nipadak'ama, mãɨpari Tachi Ak'õrepa ichi sõpiadepa k'aripa bɨ pẽra mãɨya nipapatama.

2 Corintio 11:18

Chok'araɨrãpa ara ãchi k'orea pia pedeapatama nãɨ ĩjũanepemarãpa oopata jĩra. Mãɨpuru mɨa pida ara mɨ k'orea pia pedeaipɨ.

Gálata 1:16

ichi Warra mɨá k'awapisima judiorãwẽa ichi k'orea jaramẽrá. Mãɨne mɨa abaɨmá pida idié pasima sãmaasã́ ooi bɨ k'awai k'orea.

Gálata 2:2

Mɨ wãsima Tachi Ak'õrepa k'awapida pẽra mãmá wãi bɨt'a. Mãma bɨde mɨa abapuru ũpẽarã chi atepe k'awapataɨrã́ jarasima chi pedea pia Cristo k'orea mɨa judiorãwẽmá sãmaasã́ jaratea bɨt'a. Mãɨya oosima mɨa oo bɨt'a ãchia pia unu p'anɨ k'awai k'orea.

Santiago 5:12

Mãɨ awara ũpẽarã, abaɨ t'ɨ̃ne piarã ne oodayade arãt'ɨ. Pajãnepema t'ɨ̃ne, nãɨ ĩjũanepema t'ɨ̃ne wa mi ãpia pida parituadepa piarã ne oodayade arãt'ɨ. Ne oodayade adaipɨra, piarã oot'ɨ. Mãɨnepa oodaiwẽane adaipɨra, piarã oorãt'ɨ, Tachi Ak'õrea nepɨra ak'ɨpidaemaapa.