1 Pedro 2:12 - Tachi Ak'õre Pedea

¹² Tachi Ak'õrene ĩjãanak'apɨɨrã t'ãena jĩp'a nipat'ɨ. Mãɨya ãchia mãra nemietá oopataade a p'anɨmina, mãrapa pia oo p'anɨt'a unu p'anɨma. Maapae Tachi Ak'õre cherude mãra k'orea ichiá pia pedeadaipɨ.

1 Pedro 2:12 ပူးပေါင်းရင်းမြစ်များ

Mateo 5:11

Mɨ k'orea k'achia pedeadaipɨra, mĩapii p'anɨpɨra mãɨnepa wawaria seadepa k'achia pedeadaipɨra, mãra pia p'anɨma.

Mateo 5:16

Ara mãɨ jĩra ẽpẽrarã k'ĩrari pia oo p'anat'ɨ ãchia Tachi Ak'õre pajãne bɨa pia pedeadamẽrá.

Mateo 9:8

Mãɨ unusidaɨde chi mãma p'anana ne wap'easidama. Maamina Tachi Ak'õrea pia pedeasidama ichi jua chaareadepema ẽpẽrá teada, k'ak'ua piawẽa bee jɨpa beepimẽrá.

Luca 1:68

«¡Israel p'uuru Tachi Ak'õre minachia pia bɨma, ichi ẽpẽrarã k'aripai k'orea chesideepuru!

Luca 19:44

Pɨ te oodada t'erap'et'autade pɨ ẽpẽrarã sida ãarea k'enanaipɨ. Ãchia aba pida mawara abaɨ ɨ̃rɨ ameenaiwẽma. Mãɨya oodaipɨ Tachi Ak'õrepa peeda k'aripaparí pɨa k'awaé pasi pẽra».

Luca 6:22

»Pia p'anɨma ẽpẽrarãpa mɨ, chi Ẽpẽra Warra k'orea mãra unuemaautade, itu bɨutade, k'achia pedeautade mãɨnepa mãra sõk'achiade autade.

Juan 13:31

Juda wãk'ari Jesupa jarasima: —Naapae Tachi Ak'õrepa unupiipɨ mɨ, chi Ẽpẽra Warra chi choma bɨt'a. Mãɨ awara mɨnepa Tachi Ak'õrepa unupiipɨ ara ichi chi choma bɨt'a.

Hecho 15:14

Simonpa tachiá nepɨrɨsima Tachi Ak'õrepa chi judiorãwẽ k'orea k'ɨ̃risia bɨdepa naapae ãchi jɨrɨ atasit'a ichi p'uuru padamẽrá.

Hecho 24:13

Nãɨ ẽpẽerãpa p'ue k'awapidawẽma chi ãchia jara p'anɨ piarãt'a.

Hecho 25:7

Pablo ateewãsidaɨde judiorã Jerusalenepa chedaadapa ichi adu ãarea jũrasidama. Mãɨne ichia nemietá minachia oosiade a jarasidama, maamina p'ue k'awapidaé pasima chi ãchia jara p'anɨ piarãpẽat'a.

Hecho 28:22

Maamina taipa k'awa p'anɨma ãarea tuacha jãɨ k'ɨ̃risia chiwidi k'orea piawẽa pedea p'anɨt'a. Mãɨpuru ũri k'ɨ̃ria p'anɨma pɨa sãmaasã́ k'ɨ̃risia bɨt'a.

Romano 12:17

Abaɨ pida mãra piawẽa ooipɨra, ara mãɨya oorãt'ɨ. Jõmãɨrã k'ĩrari pia oot'ɨ.

Romano 13:13

Tachi jĩp'a nipadai p'anɨma ãst'á nipapata jĩra. Arapá oopataɨ tiidá it'ua tode wãnaiwẽa p'anɨma, tachi k'ak'uadepa nemietá oo p'ananaiwẽa p'anɨma, k'ĩruu pedea p'ananaiwẽa p'anɨma, mãɨnepa abaɨpa uru bɨ k'orea piawẽa k'ɨ̃risiadaiwẽa p'anɨma.

Romano 14:18

Chi mãɨya Cristo pae mimiapataɨrã Tachi Ak'õrepa pia unu bɨma. Ẽpẽrarã pida pia unupatama.

Romano 15:9

Mãɨnepa Cristo chesima judiorãwẽpa Tachi Ak'õrea pia pedeadamẽrá ãchi k'ĩra chupuriada pẽra. Mãɨnepema Tachi Ak'õre pedeade nãɨya bɨ bɨma: «Mɨa judiorãwẽ t'ãena pɨá pia pedeaipɨ. Mɨa pɨá pia k'ariipɨ».

1 Corintio 14:25

Ichi sõne mẽra uru bada pia k'awaipɨ. Mãɨne sĩraporode k'obeek'ari Tachi Ak'õrea pia pedeaipɨ mãɨnepa «Tachi Ak'õre piarã mãra ome bɨade» aipɨ.

2 Corintio 1:12

Nãɨ k'orea arapá p'anɨma: taipa k'awa p'anɨma sõ jĩp'a p'anɨnepa, k'ɨ̃risia piadepa nãɨ ĩjũanepemarã t'ãena mãɨnepa mãra t'ãena pia nipadada. Mãɨ sõ jĩp'a bai mãɨnepa k'ɨ̃risia pia Tachi Ak'õrenepemapɨ. Tai nãɨ ĩjũanepema k'ɨ̃risiadepa mãɨya nipadak'ama, mãɨpari Tachi Ak'õrepa ichi sõpiadepa k'aripa bɨ pẽra mãɨya nipapatama.

2 Corintio 13:7

Taipa Tachi Ak'õrea idi p'anɨma mãrá nemietá oopidaemaapa. Maamina mãɨya idi p'anɨwẽma ak'ɨpidai k'orea tai Jesucristopa peedaɨrãt'a. Mãɨpari idi p'anɨma mãrapa jõma pia oodamẽrá, tai Jesucristopa peedaɨrãt'a k'ɨ̃risiadawẽa p'anɨmina.

2 Corintio 8:21

Piarã taipa Tachi Chipari k'ĩrari mãɨnepa ẽpẽrarã k'ĩrari jĩp'a oo k'ɨ̃ria p'anɨma.

Ep'esio 2:3

Naena jõma tachi ãchi jĩra p'ɨrrɨasidama chi nãɨ k'ak'uapa nemietá ooyá bɨt'a oo p'anana pẽra. Nãɨ k'ak'uapa nemietá oo k'ɨ̃ria bɨt'a mãɨnepa tachia nemietá ooyá k'ɨ̃risia bɨt'a oo p'anasidama. Mãɨ nemietá pẽra Tachi Ak'õrepa ichi k'ĩruupidepa tachi ɨtɨai basima ãarea nemietá oopataɨrã ɨtɨapari jĩra.

Ep'esio 4:22

Ãchia jarateadada nãɨpɨ: Mãrapa naena oo p'anana jĩra waa niparãt'ɨ. Tachi k'ak'ua nemietá ooyá bɨpa sea bɨdepa tachi piawẽa p'aneepiparima. Mãɨ itu bɨt'ɨ, neet'á sore wẽapata jĩra.

P'ilipense 1:27

Jĩp'a nipat'ɨ chi pedea pia Cristo k'orea jara bɨ jĩra. Mãɨyara mɨa mãra ak'ɨde wãipɨra, wa mãra ome bɨwẽne mãra k'orea ũriipɨra, k'awaipɨ mãrapa abarik'a k'ɨ̃risiadepa ará minachia ĩjãa p'anɨt'a mãɨnepa ará minachia mimia p'anɨt'a mãɨ pedea pia k'awapidai k'orea.

P'ilipense 4:8

Mãɨ awara ũpẽarã, jõma piarãnepema, nejõma tachia pia bɨt'a unupataɨdepema, jõma jĩp'a bɨdepema, jõma nemietaawẽa bɨdepema, jõmãɨrãpa k'ɨ̃riapataɨdepema, jõma chi piipará bayade a p'anɨnepema, nejõma piadepema mãɨnepa nejõma tachia pia jarapataɨdepema k'ɨ̃risia p'anat'ɨ.

1 Tesalonicense 4:12

Mãɨya p'anɨpɨra, mãrapa nɨnaiwẽa p'ananaipɨ awaraɨrãpa mãrá ne teadait'a. Ichiaba Jesude ĩjãanak'apɨɨrãpa mãra pia ununaipɨ.

1 Timoteo 2:2

Jõma nãɨ ĩjũanepema minachia k'awa berã k'orea mãɨnepa chi poro chaarearã be k'orea Tachi Ak'õrea ɨt'aa chiididai p'anɨma tachi ne k'ɨ̃risiadawẽa p'ananai k'orea, Tachi Ak'õre wap'ea p'ananai k'orea, mãɨnepa ne ãareaɨne jĩp'a p'ananai k'orea.

1 Timoteo 4:12

Pɨ k'ũtã́ bɨmina abaɨa itu k'aepe bɨ jĩra k'ɨ̃risiapirãse. Mãɨpari pɨa pedearudepa, ne oo bɨdepa, awaraɨrã piarã k'ɨ̃ria bɨdepa, k'ĩra jĩp'a bɨdepa mãɨnepa Cristode ĩjãa bɨdepa ũpẽarã́ unupise sãmaasã́ p'ananai p'anɨt'a.

1 Timoteo 5:10

Ãchia pia oodada k'orea t'ɨ̃ p'oa p'ananai p'anɨma. Ãchi warrarã pia taup'ãepachidapɨra, ãchi tedea chedaadarã́ pia pedeapachidapɨra, ũpẽarã jĩru sɨɨpachidapɨra, chi mĩa k'ede k'aripapachidapɨra mãɨnepa nejõma pia oopachidapɨra, mãɨ p'ẽtã́ t'ɨ̃ k'art'ade bɨdai p'anɨma.

Hebreo 13:18

Tai k'orea Tachi Ak'õrea ɨt'aa chiidit'ɨ. Tai ne ãareaɨne jĩp'a nipadai k'ɨ̃ria p'anɨma mãɨnepa k'awa p'anɨma nemietá oodawẽa p'anɨt'a.

Hebreo 13:5

Erreara k'ɨ̃ria p'anarãt'ɨ. Mãɨpari ara machia uru p'anɨnepa sõpia p'anat'ɨ Tachi Ak'õrepa nãɨya jarada pẽra: «Mɨa pɨ ameeiwẽma mãɨnepa pɨ tuaba bɨiwẽma».

Santiago 3:13

Mãra k'ɨ̃risia k'awa berã mãɨnepa ne k'awa berã k'ɨ̃risia p'anɨpɨra, pia nipapataɨdepa unupit'ɨ piarã mãɨya bet'a. Chi atepe k'ɨ̃risiadawẽa k'ɨ̃risiadepa pia oodai p'anɨma.

1 Pedro 2:15

Tachi Ak'õrepa k'ɨ̃ria bɨma mãrapa pia oo p'ananait'a. Mãɨya mãrapa chi pia k'ɨ̃risiawẽa berã k'ĩup'eapidaipɨ, atua p'anɨnepa mãra k'orea k'achia pedeapataɨ pẽra.

1 Pedro 3:16

Ara machi tuaba k'awa p'anat'ɨ nemietá oodawẽa p'anɨt'a. Mãɨya mãra Cristodepa pia nipada k'orea chi piawẽa pedeapataɨrã p'eradaipɨ.

1 Pedro 4:11

Abaɨpa ne jarateaipɨra, Tachi Ak'õre pedea jaratea bɨ pẽra jĩrak'aua jarateai bɨma. Abaɨpa waapẽarã k'aripaipɨra, Tachi Ak'õre jua chaareadepa k'aripai bɨma. Nejõma oot'ɨ jõmãɨrãpa Jesucristodepa Tachi Ak'õrea pia pedeadamẽrá. Ichiaapuru ewaricha pia pedeadai p'anɨma. Pia bɨma nejõma ichi juade uru bait'a. Minachia pia bɨma mãɨya bait'a.

2 Pedro 3:11

Nejõma jõi pẽra Tachi Ak'õrepa k'ɨ̃ria bɨ jĩra, mãra jĩp'a mãɨnepa nemietá newẽa nipadai p'anɨma.