1 Corintio 5:11 - Tachi Ak'õre Pedea

¹¹ Mãɨpari mɨa mãrá bɨsima parituapa ara ichi ũpẽaane aipɨra, maamina awaraɨ ome k'ãipataɨde nipaipɨra, erreara awaa baipɨra, juapa oodada sãdo k'ĩrari ɨt'aa chiidi baipɨra, seadepa waapẽarã k'orea k'achia pedea baipɨra, piu nipaipɨra, wa nechɨaparí baipɨra, makɨɨ ẽpẽra ome ará p'ananaiwẽa p'anɨ mãɨnepa ará nek'odaiwẽa p'anɨ.

1 Corintio 5:11 ပူးပေါင်းရင်းမြစ်များ

Mateo 18:17

Wapida ãchia jarauta ichia ũri k'ɨ̃riawẽpɨra, Tachi Ak'õrene ĩjãapataɨrã́ ãarea ará t'ɨ̃k'ari, ãchiá mãɨ nepɨra jarase. Maamina Tachi Ak'õrene ĩjãapataɨrãpa jarauta ũri k'ɨ̃riawẽpɨra, ichi Tachi Ak'õre atua bɨ jĩra wa Romanepema pae erreara jɨrɨp'eparí jĩra itu bɨse.

Mateo 23:25

»¡Mãra p'ariseorã, Moisepa bɨda jarateapataɨrã, chi pia jĩra berã, chupuri p'anɨma Tachi Ak'õrepa ɨtɨai pẽra! Mãrapa pasu mãɨnepa p'arat'u ɨ̃rɨpema pia sɨɨpatama, maamina eda mietá bɨma. Ara mãɨ jĩra mãra sõne ne ãarea ara machi pae ata k'ɨ̃riapatama mãɨnepa chi mãrapa k'ɨ̃ria oodat'a mãɨt'u oopatama.

Luca 18:11

P'ariseo bai nɨbɨpa ara ichia nãɨya ɨt'aa chiidisima: “Tachi Ak'õre, mɨ sõpia bɨade pɨá aipɨ mɨ waapẽarã jĩra bak'a pẽra. Ãchi nechɨapatama, nemietá oopatama, wẽra awaraɨ ome k'ãipatama. Ichiaba mɨ jãɨ Romanepema pae erreara jɨrɨp'eparí jĩra bɨwẽma.

Luca 21:34

»Jĩrak'aua p'anat'ɨ Tachi Ak'õre itu bɨdaemaapa. It'ua to p'anarãt'ɨ, ne k'ɨ̃risiawẽa p'anat'ɨ mãɨnepa tachi k'ak'uapa oo k'ɨ̃ria bɨ oorãt'ɨ. Jĩrak'aua p'ananaepɨra, ãnimara k'idap'ede baepari jĩra, mãɨ jĩra mãra atua p'anɨne mɨ mãicha cheipɨ. Mãɨ ewari cherude nãɨ ĩjũanepemarã ãarea sõ pará p'ananaipɨ.

Hecho 1:15

Mãɨya p'anɨne ewariaba Pedro chi ũpẽarã esa bai nɨbeesima chi ẽpẽerã́ pedeai k'orea. Ãchi 120 p'anasidama. Mãɨne jarasima:

Hecho 9:17

Ara mãɨne Anania Saulo bɨmá wãsima. Chi tede eda wãk'ari ichi jua Saulo ɨ̃rɨ bɨk'ari jarasima: «Ũpẽa Saulo, Tachi Chipari Jesú chi pɨmá ode unupidapa mɨ chepisima mãicha pɨ taupa unumẽrá mãɨnepa Tachi Ak'õre Jaoredepa beemẽrá».

Romano 13:13

Tachi jĩp'a nipadai p'anɨma ãst'á nipapata jĩra. Arapá oopataɨ tiidá it'ua tode wãnaiwẽa p'anɨma, tachi k'ak'uadepa nemietá oo p'ananaiwẽa p'anɨma, k'ĩruu pedea p'ananaiwẽa p'anɨma, mãɨnepa abaɨpa uru bɨ k'orea piawẽa k'ɨ̃risiadaiwẽa p'anɨma.

Romano 16:17

Ũpẽarã, mɨa mãrá chichupuria idiruma jĩrak'aua p'ananamẽrá. Chi eda waapẽarãpa ũpẽarã́ ne awara awará k'ɨ̃risiapipatama. Chi mãrapa piarã pedea k'awadada ãchia k'ĩra awara jarateapatama. Mãɨ ẽpẽrarã ome ará p'anarãt'ɨ.

1 Corintio 10:14

Mãɨpuru mɨ ũpẽarã mɨa k'ɨ̃ria bɨma chi juapa oodada sãdo itu bɨt'ɨ.

1 Corintio 11:21

Jõmãɨrã chedai naena machicha chi chik'o k'opatama. Mãɨne waapẽarã jarra nɨbeeparima mãɨnepa waapẽarã piu nɨbeeparima.

1 Corintio 6:6

Maawẽapuru ũpẽa abaɨ chi ũpẽa ome k'ĩruu pedeadak'ari chi nãɨ ĩjũanepema nepɨra ak'ɨpataɨrãmá wãpatama. Piarã mãɨya oodaiwẽa p'anɨma, chi Tachi Ak'õrene ĩjãanak'apɨɨrã k'ĩrari k'ĩruu pedeapata pẽra.

1 Corintio 6:9

¿Mãrapa atua p'anɨk'ãra chi nemietá oopataɨrã Tachi Ak'õre juade p'ananaiwẽt'a, ichidirã paara? ¡Ara machi tuaba searãt'ɨ! Chi k'ak'uadepa nemietá oopataɨrã, juapa oodada sãdo k'ĩrari ɨt'aa chiidi berã, k'ima awaraɨ ome k'ãipataɨrã, ɨmɨk'ĩra wẽra jĩra beapataɨrã, ɨmɨk'ĩra abarik'aɨ ome beapataɨrã, nechɨapataɨrã, erreara awaa berã, piu nipapataɨrã, seadepa waapẽarã k'orea k'achia pedeapataɨrã mãɨnepa waapẽarã seapataɨrã sida Tachi Ak'õre p'uurude p'ananaiwẽma.

1 Corintio 7:12

Waapẽarã ũpẽarã́ mɨa nãɨ jararuma (Tachi Chipari Jesupa mɨá nãɨ jarateapiwẽma): ũpẽa aba bɨpa chi k'ima Jesude ĩjãawẽa bɨ uru bɨpɨra, mãɨnepa mãɨ wẽra ichi ome ba k'ɨ̃ria bɨpɨra, mãɨ ũpẽapa ichi amaaiwẽa bɨma.

1 Corintio 7:15

Maamina chi Jesude ĩjãawẽa bɨpa ichi k'imak'aapema ãyá wã k'ɨ̃ria bɨpɨra, mãɨya wãrãapadade adai pia bɨwẽma. Mãɨya chi ĩjãa bɨ, chi ãyá wãna k'ima ome beeiwẽa bɨma. Tachi Ak'õrepa tachi t'ɨ̃sima ne k'ɨ̃risiawẽa p'ananamẽrá.

1 Corintio 8:11

Mãɨya chi nejõma k'oi bɨ k'awa bɨpa chi minachia atua bɨ ũpẽa, chi mãɨ k'orea Cristo piusit'a, ichide ĩjãa bɨ itu bɨpiipɨ.

Gálata 2:12

Nãɨya piawẽa oosima: chi eda waapẽarã ũpẽarã judiorã Santiago bɨmãɨpa Antioquía p'uurudea wãsidama. Ãchi chedai naena Pedro ũpẽarã judiorãwẽ ome nek'opachima, maamina mãɨ ũpẽarã judiorã chedak'ari ichi waa ũpẽarã judiorãwẽ ome nek'oé pasima. Mãɨpari awara beesima. Wap'easima chi jarapachidapa chi judiorãwẽ k'ak'ua tauchaadai p'anɨane a p'anana k'orea.

Ep'esio 5:18

It'uapa piu niparãt'ɨ. Mãɨpa nemietá atepe oopiparima. Piu nipadai k'aepẽra Tachi Ak'õre Jaoredepa p'anat'ɨ.

Ep'esio 5:5

Mãrapa k'awa p'anɨma k'ima awaraɨ ome k'ãipataɨ, k'ĩra p'erapiparide nipapataɨ mãɨnepa nejõma k'ɨ̃riapataɨ chi Cristo mãɨnepa Tachi Ak'õrepa teadayade adada p'ue jitadaiwẽma. Nejõma k'ɨ̃ria bait'a, juapa oodada sãdode ĩjãa bɨ jĩra bɨma, Tachi Ak'õre k'aepẽra, chi ichia k'ɨ̃ria bɨt'a atepe ĩjãa bɨ pẽra.

Colosense 3:5

Mãɨpuru jõma nãɨ ĩjũanepema k'ɨ̃risia mãra sõne bɨ itu bɨt'ɨ. Awaraɨ ome k'ãirãt'ɨ, ne k'ĩra p'era oorãt'ɨ, mãra k'ak'uapa nemietá ooyá bɨ oorãt'ɨ, k'ɨ̃risia k'achia k'ɨ̃risiarãt'ɨ, mãɨnepa ne minachia uru p'ananai k'ɨ̃ria p'anarãt'ɨ. Chi ne minachia k'ɨ̃ria uru bɨt'a juapa oodada sãdo ĩjãa bɨ jĩra bɨma.

2 Tesalonicense 3:14

Taipa nãɨ k'art'ade jarateadada abaɨ pida ĩjãaepɨra, jõmãɨrã́ k'awapit'ɨ piawẽa oo bɨt'a. Ichi ome ará p'anarãt'ɨ p'eramẽrá.

2 Tesalonicense 3:6

Ũpẽarã, Tachi Chipari Jesucristo t'ɨ̃nepa taipa mãrá jara peeutama ũpẽarã k'oa be ome ará p'anapidaemaapa. Jãɨrãpa taipa jarateadada jĩra oodak'ama.

1 Timoteo 3:3

It'uapa piu nipawẽa bai bɨma. K'ĩruuyá baiwẽa bɨma, mãɨpari awaraɨrã ome sõpia bai bɨma. Jõmãɨrã ome ne k'ɨ̃risiawẽa bai bɨma. Erreara awaa baiwẽa bɨma.

1 Timoteo 6:5

Mãɨ ẽpẽrarã k'ɨ̃risia mietá p'anɨ mãɨnepa chi piarã pedea atua p'anɨ paritua k'ĩruu pedeapatama. Ãchia k'ɨ̃risiapatama Tachi Ak'õrene ĩjãa bɨdepa erreara ununait'a.

2 Juan 1:10

Chi ẽpẽra mãramá wãrune Cristopa jarateada jĩra jarateawẽpɨra, mãɨ mãra tede eda chepirãt'ɨ mãɨnepa «sõpia p'anɨane pɨ cheda k'orea» arãt'ɨ.

Apocalipsi 2:14

Maamina mɨa mãra k'orea ne ãpia jarai bɨma. Eda waapẽarã mãranepemarãpa Balaampa jarateada ũri p'anɨma. Balaampa Balác jarateasima sãmaasã́ israel ĩjũanepemarã nemietaade baepiit'a. Juapa oodada sãdorã́ ne k'iuru teada k'opipachima mãɨnepa chi k'ak'uadepa nemietá oopipachima.

Apocalipsi 2:20

Maamina mɨa mãra k'orea ne ãpia jarai bɨma. Chi wẽra Jezabel apataɨpa sea jaratea bɨt'a mãrapa mãɨa itu jarateapi p'anɨma. Ara ichia Tachi Ak'õre pari pedeapariade aparima. Maamina ichia jaratea bɨdepa chi mɨ pae pari mimiapataɨrã seaparima k'ak'uadepa nemietaade nipadamẽrá mãɨnepa ne k'iuru juapa oodada sãdorã́ teada k'odamẽrá.

Apocalipsi 21:8

Maamina chi mɨ ome wãnai k'orea wap'eapataɨrã, chi mɨne ĩjãanak'apɨɨrã, chi mɨa k'ɨ̃riak'at'a oopataɨrã, chi mĩa peapataɨrã, chi k'ĩranejasia oopataɨrã, chi ẽpẽra nɨɨpataɨrã, chi juapa oodada sãdode ĩjãapataɨrã mãɨnepa chi seajarapataɨrã azup're t'ɨpɨ urua nɨbɨde minachia mĩa p'ananaipɨ. Mãɨ chi bari k'ak'o ume piusiade apatama».

Apocalipsi 22:15

Maamina chi nemietá oopataɨrã, chi ẽpẽra nɨɨpataɨrã, chi k'ĩranejasia oopataɨrã, chi mĩa peapataɨrã, chi juapa oodada sãdode ĩjãapataɨrã, mãɨnepa seajarapataɨrã ãarea awara tuaneenaipɨ.