1 Corintio 14:6 - Tachi Ak'õre Pedea

⁶ Mãɨ k'orea ũpẽarã, mɨ mãramá wãk'ari tachia ũrinak'apɨ́ pedeade pedeaipɨra, ¿mãra sãmaasã́ k'aripaima? K'aripaiwẽma. Maamina tachia ũripataɨ pedeade Tachi Ak'õrepa mɨá unupida jaraipɨra, wa Tachi Ak'õre k'ɨ̃risiadepa pedeaipɨra, wa Tachi Ak'õre pari pedeaipɨra, wa Tachi Ak'õre pedea jarateaipɨra mãɨpa ãarea p'ue k'aripaipɨ.

1 Corintio 14:6 ပူးပေါင်းရင်းမြစ်များ

Mateo 11:25

Mãɨ ewaride Jesupa jarasima: «Ak'õre, pɨ pajãnepema Chiparipɨ mãɨnepa nãɨ ĩjũanepema Chiparipɨ. Pɨa ne atua berã́ mɨa jarateada k'awapida pẽra mɨa pɨá pia pedeaipɨ. Mãɨt'u chi minachia k'awa berã́ pɨa k'awapié pasima.

Mateo 16:17

Jesupa jarasima: —Pɨ sõpia bɨma, Simón, Joná warra. Ẽpẽra abaɨ pida pɨá mãɨ k'awapié pasima, mãɨpari mɨ Ak'õre pajãne bɨpa mãɨ k'awapisima.

Mateo 16:26

Ẽpẽra nãɨ ĩjũane ne ãarea uru bɨde piuipɨra, ¿ichia uru bɨpa k'aripaik'ãra? ¿Jõmasã́ teai bɨma, ichi piuemaapa?

Hecho 2:42

Chi Jesupa peedaɨrãpa jaratea p'anɨt'a ãchia minachia ũripachidama. Ará tuanapachidama, nek'opachidama mãɨnepa Tachi Ak'õrea ɨt'aa chiidi p'anapachidama.

Romano 15:14

Ũpẽarã, mɨa k'awa bɨma mãrapa piarã pia oo p'anɨt'a mãɨnepa minachia k'awa p'anɨ pẽra machit'u p'ue chi jaratea p'ananait'a.

Romano 16:17

Ũpẽarã, mɨa mãrá chichupuria idiruma jĩrak'aua p'ananamẽrá. Chi eda waapẽarãpa ũpẽarã́ ne awara awará k'ɨ̃risiapipatama. Chi mãrapa piarã pedea k'awadada ãchia k'ĩra awara jarateapatama. Mãɨ ẽpẽrarã ome ará p'anarãt'ɨ.

Romano 6:17

Naena mãra nemietá pae pari mimiapataɨrã pasima. Maamina jõma Tachi Ak'õre k'orea jarateadada sõnepa oo p'anɨ pẽra mɨa Tachi Ak'õrea sõpia bɨade aparima.

1 Corintio 10:33

Ara mãɨ jĩra mɨa oo bɨdepa jõmãɨrã́ pia k'ɨ̃risiapi k'ɨ̃ria bɨma. Mɨt'a pia bai k'oreapuru jɨrɨk'ama, mãɨpari ẽpẽrarã chok'ará pia p'ananamẽrá jɨrɨparima. Mãɨya mɨa oo bɨdepa ãchia Cristode ĩjãanaipɨ Tachi Ak'õrepa k'aripamẽrá.

1 Corintio 14:1

Waapẽarã k'ɨ̃ria p'anapariet'ɨ, mãɨnepa Tachi Ak'õre Jaorepa oopi bɨ jõma oo k'ɨ̃riat'ɨ. Maamina Tachi Ak'õre pari pedeadai atepe k'ɨ̃riat'ɨ.

1 Corintio 14:7

Ara mãɨ jĩra abaɨpa siru wa arpa chaaipɨra maamina pia chaawẽpɨra, jĩk'ua bɨmina tachia k'awadaiwẽma k'ãre chaa bɨt'a.

2 Corintio 11:6

Mɨ pedea pia bɨdepa pedeak'amina, piarã pedea minachia k'awa bɨma. Mãɨ piarã pedea taipa ne ãareaɨnepa mãrá minachia k'awapisidama.

2 Corintio 12:1

Mãicha ara mɨchi k'orea pia pedeaipɨ, mãɨpa waapẽarã k'aripak'amina. Tachi Chiparipa mɨá k'ãmok'araa jĩra unupida mãɨnepa k'awapida mɨa jararuma.

2 Corintio 12:7

Tachi Ak'õrepa mɨá pajãne unupida minachia atepe piipará basima. Maamina ara mɨchi k'orea minachia pia k'ɨ̃risiapiemaapa mɨ p'uapisima, ɨɨrɨpa su nɨbɨ jĩra. Tiorepa peedapa mãɨya ooparima.

Ep'esio 1:17

Mɨa Tachi Chipari Jesucristo Ak'õrea, chi tachi Pajãnepema Ak'õre pia bɨa ɨt'aa chiidiparima ichi Jaoredepa mãrá pia k'ɨ̃risiapimẽrá mãɨnepa ichi k'orea k'awapimẽrá. Mãɨya mãrapa ichi minachia k'awadaipɨ.

Ep'esio 3:4

Nãɨ k'art'a eda jara p'anɨne mãrapa k'awadaipɨ Tachi Ak'õrepa Cristo k'orea k'awapiwẽa bada mɨa k'awa bɨt'a.

P'ilipense 3:15

Jõma tachi Cristo minachia k'awa berãpa mãɨ jĩra k'ɨ̃risiadai p'anɨma. Mãrapa k'ĩra awara k'ɨ̃risia p'anɨpɨra, Tachi Ak'õrepa sãmaasã́ k'ɨ̃risiadai p'anɨt'a k'awapiipɨ.

2 Timoteo 2:14

Jõma mãɨ tachi ũpẽarã́ k'ɨ̃risiapi base. Tachi Ak'õre k'ĩrari ũraase ãchi piawẽa be k'orea k'ĩruu pedea p'ananaiwẽa p'anɨ. Mãɨ k'ĩruu pedeapa tachi k'aripak'ama, mãɨpari chi ũri berã́ k'ɨ̃risia mietá k'ɨ̃risiapiparima.

2 Timoteo 3:10

Maamina pɨa nãɨ ãarea jõma minachia k'awa bɨma: mɨa jaratea bɨt'a, mɨ nipaparit'a, mɨa oo k'ɨ̃ria bɨt'a, mɨa Cristode ĩjãa bɨt'a, mɨa jõmãɨrã ome choa bɨt'a, mɨa waapẽarã k'ɨ̃ria uru bɨt'a, mɨ ne ãareane sẽwẽa choa bɨt'a,

2 Timoteo 3:16

Tachi Ak'õrepa jõma Ichi Pedea bɨpisima. Jõma mãɨ pia bɨma jarateai k'orea, nemietá oo berã ɨtɨai k'orea, piawẽa oo berã jĩp'a oo k'awapii k'orea, mãɨnepa sãmaasã́ k'ĩra jĩp'a nipadai k'awapii k'orea.

2 Timoteo 4:2

Tachi Ak'õre Pedea jaratea base. Ẽpẽrarãpa ũri k'ɨ̃ria p'anɨne mãɨnepa ũri k'ɨ̃riawẽa p'anɨne jarateai k'orea base. Piawẽa oo be jĩp'a oo k'awapise. Nemietá oo be ɨtɨase. Mãɨnepa ũpẽarã k'aripase pia ĩjãanamẽrá. Jõma choa bɨdepa, jĩrak'aua jaratea bɨdepa mãɨya oose.

Tito 3:8

Mãɨ pedea piarã arí bɨ pẽra, mãɨne ĩjãanai p'anɨma. Mɨa k'ɨ̃ria bɨma pɨa mãɨ minachia jaratea bai Tachi Ak'õrene ĩjãa berãpa nejõma pia oo wãnamẽrá. Mãɨ pedea minachia pia bɨma. Jõmãɨrã k'aripaparima.

Hebreo 13:9

Maamina chi eda waapẽarãpa ne wawaria piawẽa jarateapatama. Ãchirã́ itu seapirãt'ɨ. Mãrapa ne wawaria k'o p'anɨnepa wa nek'odawẽa p'anɨnepa k'aripak'ama. Chi mãɨya oo p'anɨrã pia p'anɨwẽma. Mãɨpari Tachi Ak'õrepa ichi sõpiadepa k'aripa bɨma mãrapa pia sõnepa ĩjãanamẽrá.

2 Pedro 1:5

Mãɨpuru Cristode ĩjãa p'anɨ pẽra jĩp'a nipadai k'orea minachia jɨrɨt'ɨ; jĩp'a nipa p'anɨne k'ɨ̃risia k'awaa p'ananai k'orea jɨrɨt'ɨ;

2 Pedro 3:18

Jesucristo Tachi Chipari mãɨnepa Tachi K'aripaparí ewaricha pia k'awapariet'ɨ. Ichi sõpiadepa warit'ɨ. Idi mãɨnepa ewaricha ichiá pia pedeadai p'anɨma. Mãɨya beese.

2 Juan 1:9

Abaɨpa Cristopa jarateada k'aepẽra ichi k'ɨ̃risiadepa ne awara jaratea nipaipɨra, wa mãɨyawẽa Cristopa jarateada itu bɨipɨra, mãɨ Tachi Ak'õre newẽa bɨma. Maamina abaɨpa Cristopa jarateada ĩjãa baipɨra, chi Ak'õre mãɨnepa chi Warra sida uru bɨma.