1 Corintio 1:30 - Tachi Ak'õre Pedea

³⁰ Mãawẽa Tachi Ak'õrepa mãra Jesucristo ome ará bɨsima. Mãɨya Cristodepa Tachi Ak'õrepa ichi k'ɨ̃risia tachiá k'awapisima. Ichia tachi jĩp'a bɨsima, ara ichi pae pia bɨsima, mãɨnepa nemietaadepema k'aripasima.

1 Corintio 1:30 ပူးပေါင်းရင်းမြစ်များ

Mateo 1:21

Mariapa warra t'õipɨ. Mãɨ warrapa ichi p'uurudepemarã ãchi nemietaadepema k'aripaipɨ. Mãɨpuru ichi t'ɨ̃ bɨse Jesú».

Luca 11:49

Mãɨ k'orea Tachi Ak'õrepa ichi k'ɨ̃risiadepa nãɨya jarasima: “Mɨ pari pedeapataɨrã mãɨnepa mɨa peedarã sida mãra israel ĩjũanepemarãmá wãpiipɨ. Mãɨne chi eda waapẽarã peadaipɨ mãɨnepa chi eda waapẽarã ẽp'ẽnaipɨ”.

Luca 21:15

Mɨapuru mãrá k'ɨ̃risia teaipɨ pia pedeadamẽrá. Mãɨpuru mãrapa jarautat'a mãra unuemaa p'anɨpa mi ãpia pida p'ue k'achia pedeadaiwẽma.

Juan 1:18

Abaɨ pida Tachi Ak'õre ununak'ama. Maamina chi Warra aba bɨt'a Tachi Ak'õre pẽra mãɨnepa chi Ak'õre ome abarik'a bɨ pẽra, tachiá k'awapisima Tachi Ak'õre piarã sãmaasã́ bɨt'a.

Juan 14:6

Mãɨne Jesupa jarasima: —Mãɨ o mɨpɨ. Mɨnepa Tachi Ak'õre piarã k'awa p'anɨma mãɨnepa chok'ae bai uru p'anɨma. Mɨnepa wãnaepɨra aba pida mɨ Ak'õremá p'ue chedaiwẽma.

Juan 17:26

Mɨa ãchiá pɨ k'awapisima. Mãɨ awara wapida atepe k'awapi baipɨ pɨa mɨ k'ɨ̃ria bɨ jĩra ãchi sida chi k'ɨ̃ria p'ananamẽrá mãɨnepa mɨ ãchi sõne uru p'ananamẽrá».

Juan 17:8

Pɨa mɨá jarada mɨa ãchiá jarateasima. Ãchia mãɨ pedea ĩjãasidama. Mãɨpuru k'awa p'anɨma piarã mɨ pɨmãɨpa chesit'a. Piarã ĩjãa p'anɨma pɨa mɨ peesit'a.

Juan 8:12

Mãɨya nak'ari Jesupa ẽpẽerã́ mãicha jarasima: —Mɨ nãɨ ĩjũanepemarã pae ɨnaa bɨ jĩra bɨma. Parituapa mɨ k'aade wãipɨra p'ãrione nipaiwẽma, mãɨpari ɨnaane bɨ pẽra chok'ae baipɨ.

Romano 1:17

Mãɨ pedea piadepa Tachi Ak'õrepa k'awapi bɨma tachi k'aripait'a, ichia jara bɨ jĩra. Jesucristode ĩjãautarã mãɨya baipɨ. Tachi Ak'õre pedeade nãɨya bɨ bɨma: «Chi jĩp'a bɨt'a, Tachi Ak'õrene ĩjãa bɨdepa chok'ae baipɨ».

Romano 11:36

Tachi Ak'õrepuru nejõma oosima. Nejõma ichidepa bɨma mãɨnepa ichi pae bɨma. Tachia ewaricha ichiá pia pedeadai p'anɨma. Mãɨya beese.

Romano 12:5

Ara mãɨ jĩra tachi chok'ará p'anɨmina, Cristo ome p'anɨ pẽra k'ak'ua aba bɨ jĩra p'anɨma. Mãɨya tachi jõmãɨrã k'ak'ua abaɨde ará p'anɨma.

Romano 16:11

Mɨ ũpẽa judio Herodioná pia bapade a jara peet'ɨ. Narciso ẽpẽrarã Tachi Chipari ĩjãa berã́ pia p'anapadade a jara peet'ɨ.

Romano 16:7

Mɨ ũpẽarã judiorã Andronicoa mãɨnepa Juniá ara mãɨ jĩra jarat'ɨ. Waapẽarãpa pia k'awa p'anɨma ãchi Cristopa peedaɨrãt'a. Mɨ ome ará eda serra p'anasidama. Mɨa Cristode ĩjãai naena ãchia ĩjãa p'anasima.

Romano 4:25

Ichia Jesú bɨsima tachi nemietá k'orea piumẽrá. Maapae piu badadepa chok'ae p'irabaripisima tachi chi ichidirã jĩp'a berã paara bɨi k'orea.

Romano 4:6

Ara mãɨ jĩra Davipa jarasima: Tachi Ak'õrepa chi mãɨ ne oowẽa bɨt'a chi ichidirã jĩp'a berã paara bɨipɨra minachia pia baipɨ.

Romano 5:19

Piarã ẽpẽra aba bɨpa Tachi Ak'õrepa jarada oodawẽ pẽra chok'ará ẽpẽrarã nemietá oopataɨrã p'aneesidama. Mãɨnepa ẽpẽra abaɨpa Ichia jarada jõma ũrisi pẽra chok'ará ẽpẽrarã Tachi Ak'õrepa jĩp'a p'anɨane aipɨ.

Romano 5:21

Piarã ẽpẽrarãpa nemietá oopata pẽra piupatama. Maamina Tachi Ak'õrepa ichi sõpiadepa ẽpẽrarã chi ichidirã jĩp'a berã paara bɨparima Tachi Chipari Jesucristodepa ewaricha ichi ome chok'ae p'ananamẽrá.

Romano 8:1

Naapae tachi Cristo Jesú ome p'anɨ pẽra nepɨra mi ãpia pida pará p'anɨane a bɨwẽma.

Romano 8:23

Mãɨnepa tachia pida p'ua bɨdepa isapea chepii nɨ p'anɨma, Tachi Ak'õrepa tachi k'ak'ua pia bɨmẽrá. Ichi warrarã atarude mãɨya ooipɨ. Ichi Jaore tachiá naa teasima ichi warrarã piarã k'awadamẽrá.

Romano 8:9

Maamina Tachi Ak'õre Jaore piarã mãra sõne bɨ pẽra, ichidepa nipapatama. Nãɨ k'ak'uapa oo k'ɨ̃ria bɨdepa nipadak'ama. Piarã chi Cristo Jaore nea bɨt'a Cristodewẽma.

1 Corintio 1:2

Mɨa nãɨ k'art'a bɨruma chi ẽpẽrarã Tachi Ak'õrenepemarã Corinto p'uurudepema pae. Jesucristodepa Tachi Ak'õrepa mãra awara bɨsima ichi pae pia p'ananamẽrá. Ara mãɨ jĩra ichia tuacha jõma Tachi Chipari Jesucristoa ɨt'aa chiidipataɨrã awara bɨsima. Ichi ãchi Chiparipɨ mãɨnepa Tachi Chiparipɨ.

1 Corintio 1:24

Maamina Tachi Ak'õrepa judiorã mãɨnepa judiorãwẽ t'ɨ̃sima Cristodepa k'aripai k'orea. Mãɨrãpa k'awa p'anɨma Tachi Ak'õrepa Cristodepa ichi jua chaarea mãɨnepa k'ɨ̃risiat'a unupisit'a.

1 Corintio 12:18

Tachi Ak'õrepa tachi k'ak'uade nejõma bɨsima ichia k'ɨ̃ria bada jĩra.

1 Corintio 12:27

Ara mãɨ jĩra mãra jõma ara Cristo k'ak'ua jĩra p'anɨma. Mãra ichi k'ak'uadepemarãpɨ.

1 Corintio 12:8

Tachi Ak'õre Jaorepa chi eda tachidiidepemarã́ tea bɨma ichi k'ɨ̃risiadepa p'ue pedeadamẽrá. Ara Tachi Ak'õre Jaore aba bɨpa chi eda tachidiidepemarã́ tea bɨma ichidepa k'awadada p'ue jarateadamẽrá.

1 Corintio 4:15

Mãrapa Cristo k'orea jarateapataɨrã chok'ará uru p'anɨpara wapida ak'õre aba uru p'ananai pasima. Mɨnepa mãrapa chi Jesú k'orea pedea pia ĩjãanana pẽra ichidepa mɨ mãra ak'õrepɨ.

1 Corintio 6:11

Naena, mãranepema chi está mãɨya p'anapachidama. Maamina mãrapa nemietá oodada Tachi Ak'õrepa sɨɨsima, ichi pae pia bɨsima mãɨnepa nepɨra newẽa bɨade asima Tachi Chipari Jesucristodepa mãɨnepa ichi Jaoredepa.

2 Corintio 12:2

Mɨa Cristode ĩjãaparí ẽpẽra aba k'awa bɨma. Catorce ãyo pa baside Tachi Ak'õrepa mãɨ ũpẽa pajãnea ichi bɨmá ateewãsima. Mɨa atua bɨma Tachi Ak'õrepa ichi k'ak'uat'u ateewã basit'a wa abapuru ichi jaoret'a ateewã basit'a. Tachi Ak'õrepuru mãɨ k'awa bɨma.

2 Corintio 4:6

Nãɨ ĩjũa jõma p'ãrio nɨbada Tachi Ak'õrepa ɨnaapisima. Ara mãɨ jĩra ichi ɨnaa bɨt'a tachi sõne ɨnaapisima. Mãɨpa jara bɨma ichi k'ĩrawãrea Cristodepa tachiá k'awapisit'a.

Gálata 1:4

Chi mãɨ Jesucristopa ara ichi tachi nemietá k'orea itu peapisima nãɨ ewari mietaadepema k'aripai k'orea. Mãɨya oosima Tachi Pajãnepema Ak'õrepa k'ɨ̃riana pẽra.

Gálata 3:13

Moisepa bɨ bada jĩra oo p'anɨwẽ pẽra, nepɨra pará p'anɨane aima. Mãɨnepema Jesucristopa tachi k'aripasima. Ichit'a Tachi Ak'õrepa tachi k'ak'ua k'orea nepɨra paraapisima. Moisepa bɨdade nãɨya bɨ bɨma: «Chi pak'urude jira bɨdada, Tachi Ak'õrepa mãɨ nepɨra pará bɨade aipɨ».

Ep'esio 1:10

ichia bɨda ewaride nãɨya ãarea ooipɨ: mãɨ ewaride ne ãarea pajãnepema mãɨnepa nãɨ ĩjũanepema Cristo juade bɨipɨ.

Ep'esio 1:14

Tachi Ak'õre Jaore jitatadada pẽra tachia k'awa p'anɨma jõma Tachi Ak'õrepa teai jarada piarã jitadait'a chi ichidirã ãarea pia bɨi ewaride. Mãɨ k'orea ichi pia bɨ k'orea pia pedeadai p'anɨma.

Ep'esio 1:7

Ichi Warra oa ãrinanepa Tachi Ak'õrepa tachi nemietaadepema k'aripasima. Ichi minachia sõpia bɨdepa tachia nemietá oodada ãarea k'ɨ̃risia atuasima.

Ep'esio 2:10

Tachi Ak'õrepa tachi Jesucristodepa chiwidi oosima nepia oo p'ananamẽrá. Mãɨ nepia ichia naena bɨsima tachia oodamẽrá.

Ep'esio 4:30

Nemietá oo p'anɨpa Tachi Ak'õre Jaore sõp'uapirãt'ɨ. Tachi Ak'õrepa ichi mãrá teasima ichidirã k'awadamẽrá. Ichi Jaore mãra ome baipɨ aba Tachi Ak'õrepa ichi ẽpẽrarã jõma pia bɨi ewaridea.

Ep'esio 5:26

Ichia mãɨya oosima tachi Tachi Ak'õre pae pia bɨi k'orea. Ichi pedeapa tachi nemietá sɨɨsima paniapa sɨɨda jĩra.

P'ilipense 3:9

mãɨnepa ichi ome bai k'orea. Mɨ ichi ome bɨwẽma chi Moisepa bɨdadepa, mãɨpari mãɨya bɨma Cristopa ichi Ak'õre pedea ook'ari, tachi k'orea piuda pẽra. Mɨa Cristode ĩjãa bɨ pẽra, Tachi Ak'õrepa mɨ ichi ome uru bɨma.

Colosense 1:14

Ichi Warradepa Tachi Ak'õrepa tachi nemietaadepema k'aripasima. Tachia nemietá oodada ãarea k'ɨ̃risia atuasima.

Colosense 3:16

Pedea Cristo k'orea mãra sõne uru p'anat'ɨ. Jõma Tachi Ak'õre k'ɨ̃risiadepa chi jarateat'ɨ mãɨnepa chi k'aripat'ɨ pia ĩjãanai k'orea. Tachi Ak'õre pedeade bɨ bɨt'a k'arit'ɨ, ũpẽarãpa k'aripataɨ mãɨnepa Tachi Ak'õre Jaorepa k'aripiparí Tachi Ak'õrea k'arit'ɨ. Sõnepa Tachi Ak'õrea sõpia p'anɨane a p'anɨnepa k'arit'ɨ.

1 Tesalonicense 5:23

Mɨa k'ɨ̃ria bɨma Tachi Ak'õrepa mãra ichi pae ãarea pia p'anapimẽrá. Ichia tachi ne k'ɨ̃risiawẽa p'anapiparima. Mɨa k'ɨ̃ria bɨma Tachi Ak'õrepa mãra jaore, mãra k'ɨ̃risia mãɨnepa mãra k'ak'ua ãarea pia ak'ɨmẽrá. Mãɨya Tachi Chipari Jesucristo cherude, waapẽarãpa mãra mi ãpia pida nemietaade p'anɨane a jaradawẽa p'ananaipɨ.

Tito 2:14

Tachi k'orea Jesucristopa ara ichi itu peapisima ãarea nemietaadepema k'aripai k'orea. Tachi ara ichi pae pia bɨsima ichi p'uurude p'ananamẽrá mãɨnepa nejõma pia oo k'ɨ̃ria p'ananamẽrá.

Hebreo 9:12

Mãma Cristo «Tachi Ak'õre pae k'ɨda jẽesa chi atepe piipará bɨde» barimama eda wãsima. Mãmá wãside chivo mãɨnepa p'ak'a warra oa Tachi Ak'õre k'ĩrari jĩp'oi k'orea ateewãé pasima. Mãɨpari ara ichi oa ateewãsima. Bari k'ak'o aba mãɨya oodapa tachi k'aripasima ewaricha nepɨrawẽa p'ananamẽrá.

Santiago 1:5

Mãranepemapa k'ɨ̃risia newẽa bɨpɨra, Tachi Ak'õrea ɨt'aa chiidii bɨma. Mãɨne Tachi Ak'õrepa teaipɨ. Ichiá ɨt'aa chiidisidara ɨtɨawẽa jõmãɨrã́ sõpia, wãak'awẽa teaparima.

1 Pedro 1:2

Tachi Pajãnepema Ak'õrepa mãra jɨrɨ atasima ichia naenaena k'ɨ̃risia bada jĩra. Tachi Ak'õre Jaorepa mãra ichi pae bɨsima Jesucristode ĩjãanamẽrá mãɨnepa ichi oadepa Tachi Ak'õre k'ĩrari nemietá newẽa p'ananamẽrá. Mɨa k'ɨ̃ria bɨma Tachi Ak'õrepa ichi sõpiadepa mãra k'aripa bait'a mãɨnepa ne k'ɨ̃risiawẽa bapiit'a.

2 Pedro 1:1

Mɨ Simón Pedropɨ, Jesucristo pae pari mimiaparipɨ mãɨnepa ichia peedapɨ. Mɨa nãɨ k'art'a bɨruma chi Tachi Ak'õrene mãɨnepa Tachi K'aripaparí Jesucristode ĩjãapataɨrã pae. Ichi jĩp'a bɨ pẽra, mãra tai ome abarik'a pia ĩjãa p'anɨma.

1 Juan 5:6

Mãɨ Jesucristo, chi nãɨ ĩjũanea chek'ari paniane porochoadapɨ mãɨnepa ichi oa k'urusude ãrinapɨ. Nãɨ ĩjũanea chek'ari abapuru paniane porochoaé pasima, mãɨpari ichi oa sida k'urusude ãrisima. Tachi Ak'õre Jaorepa k'awapi bɨma mãɨ piarãt'a, ichia chi piarã pedea k'awapipari pẽra.

Apocalipsi 14:4

Mãɨrã ẽpẽerã waidi wẽra oodak'a pasima. Tachi Ak'õremá mãɨrã ãpia pida nemietá newẽa p'anasima. Ãchia chi Oveja Chak'e ichi wãrumá ichi ome wãpatama. Tachi Ak'õrepa ãchi nãɨ ĩjũanepema k'aripasima, ichi pae mãɨnepa chi Oveja Chak'e pae p'ananamẽrá mãɨ chi ne uuda naa chauda ichiá teapata jĩra.

Apocalipsi 5:9

Chi chõarã veinticuatro p'anɨpa mãɨnepa chi ẽpẽra jĩra chok'ae berãpa nãɨ k'ari chiwidit'a k'arisidama: «Pɨ pia bɨma mãɨ k'art'a jitak'ari chi k'ara nɨbɨ oet'ait'a, pɨ peasida pẽra. Chi mãɨ oa pɨa ãrisidepa ẽpẽerã Tachi Ak'õre pae atasima. Ẽpẽerã awaraɨcha, pedeacha, p'uurucha mãɨnepa ĩjũacha mãɨrãnepema eda waapẽarã atasima.