7 Ngara mbŭh bajang buang jo so ramin arŭn, pak Aku re nggen pluang bauh di ngara adi babŭ udip, ka ngara re jadi bangsa adi bās. Aku re mritah ngara di Sandah Zion so tika anŭ ndŭg situi tui.”
Komŭnŭ ndi naan so sesang David re jadi raja, ka ayŭh re mritah daya ngga pinyitŭtŭd ka pinyirindu. Kayuh adi batur ayŭh rikas ndai, ka pinyitŭnggŭn ayŭh pimanu.)
Buran re karŭm, ka batŭh andu re dŭh tia nyekar, amai TUHAN Bisa-pŭrŭg re jadi raja. Ayŭh re mritah Jerusalem ngga Sandah Zion, ka bara pinguru daya re kiris bragah-I.
Kambŭi ndi naan bait kani so simŭng naan babŭ di tarun tana anŭ, ayŭh gŭh re dog pirabur; ayŭh re keya ka tŭŭd tŭngŭn oak adi muko dog tabŭng.” (Tŭŭd inŭh tandā pimudip bauh yŭn daya Tapa.)
Ndŭg ka rawang mu adi siabo sŭ ngga adi dog ngamun re jadi bangsa adi bās ngga adi bikuasa. Kan tika-i adi batur mbŭh mandŭg, Aku re bada kayuh anŭ rikas jadi. Aku ati TUHAN!
“Manusia, ati inŭh takta Ku. Aku re rŭŭ digiti di ruang daya Ku Israel ka mritah ngara ndŭg situi tui. Daya Ku Israel bait tadŭ tadŭ raja ngara re dŭh tia nyembar adŭn kudus Ku ngga urah ngara adi nyambah tapa tapa bŭkŭn bait kubur tadang tadang raja ngara di tarun ati.
Di jaman bara pimritah anŭ Tapa adi pinguasa di shorga re pijog pritah adi dŭh bisa mungan. Pritah anŭ dŭh bisa dog ngarah, pak re kubo pirabur sopŭrŭg empaya adi bŭkŭn, ka komŭnŭ adŭp-i re mritah adu adu.
“Kan ju sawa anŭ mbŭh ripuan,” raja nang, “aku nyigura ka rangit, ka pikir-kira ku pari mun adi dawŭ-i. Aku muji Tapa adi Siabo Bigatung ka nggen stabi ngga bragah di Ayŭh adi udip ndŭg situi tui. “Ayŭh re mritah ndŭg situi tui, ka pritah-I re tan adu adu.
Ayŭh dog nggen kuasa, stabi, kuasa-raja, isa bara daya so barang bangsa, kaum, ngga piminyu bisa bituan di ayŭh. Kuasa-i re tan adu adu, ka pritah-i dŭh re mungan.
Kuasa ngga sangŭn sopŭrŭg pritah di ong re dog nggen di daya Tapa adi Siabo Bigatung. Kuasa-raja ngara dŭh re mungan ka sopŭrŭg pimritah di ong re bituan ka nundok di ngara.”
Daya Israel re mun sumat di rawŭt, rabis so tungang dog mirang bait dog ngŭkŭd. Madin Tapa nang di ngara, “Angān dŭh daya Ku,” pak andu-i re mandŭg adi ngga Ayŭh re nang di ngara, “Angān inŭh bara anak Tapa adi udip!”
Pak sopŭrŭg daya adi mite turung so TUHAN re siramat. Nimun adi ko TUHAN nang, ‘Kada di Jerusalem re pirupas adŭp ngara; ngara adi Aku mien re siramat.’ ”
“Komŭnŭ, Israel, angān re puan Aku ati TUHAN adi Tapa ngan. Aku rŭŭ di Zion, sandah kudus Ku. Jerusalem re jadi kupo kudus; daya tami dŭh re tia nyerang-i.
“Pak Aku re nguruk angān, sopŭrŭg ngan daya Israel adi dŭm. Aku re taban angān keya ka biri pari ka darŭm kandang. Keya ka tarun tana kupai adi puno ngga dudu biri, tarun tana ngan re puno dinge bada bara daya.”
Tapa re kuka aran yŭn ngara ka taban ngara pari so tarun tana adi yŭn ngara dog taran. Ngara re nyirubuh tiban tiban-bās kupo ka pirupas adŭp ngara. Raja ngara, adi adŭp TUHAN, re nguru ngara ruah.
Jadi TUHAN re tagan daya-I ka darŭm tangan pinganyu ngara ndŭg ka andu adi ngga dayung anŭ adi re biranak mbŭh ruwan anak-i. Komŭnŭ bara daya Israel anŭ adi dog taran ka rais tami re dog bada pari ka daya adŭp ngara.
Mating tapa bŭkŭn mun Kaam, O TUHAN. Kaam apun dosa daya Mai adi babŭ udip. Kaam dŭh adu adu baji, pak Kaam raan dŭ kiren pinyirindu Mai adi dŭh bisa birubah.