Ayŭh biyŭn dudu kapar baga adi birayar di rawŭt samah ngga dudu kapar Hiram. Ndi sidah darŭm taruh sawa dudu kapar-i anŭ pari, taban mas, pirak, bŭbŭt gajah, ka kiyad.
Raja Jehoshaphat ndai dudu kapar ngga birayar di rawŭt bās pakai ngga di ka Ophir di tambit mas; pak kapar kapar anŭ rusak di Eziongeber ka bŭn-i birayar.
Sopŭrŭg ngara re tikaran ka naman adŭp-i, mun dayung naman sarang andam re biranak. Ngara re kimat dingan-i darŭm taru, ka jawin ngara re bireh sabab mangŭh.
Aku re bada daya Ku papar sasah di sirung jawin pinganyu ngara, mun dabu tana dog poh sabak so timor. Aku re nyipunok ngara; Aku dŭh re turung ngara kan pinyirusag mandŭg.”
