Daya Dibon maad sandah re muās di bari-sambah. Daya Moab nangŭng sien darŭm susah muās kupo Nebo ngga Medeba; ngara gumbak ubok ngga gagap ngara darŭm susah.
Aku masi kiris Moab! Daya adi rŭŭ diginŭ mbŭh bu ka kupo Zoar ngga kupo Eglath Shelishiyah. Agi adi maad aran ka Luhith, sien buang ngara panu; agi adi bu ka Horonaim, sien bana.
Isa-i ayŭh adi taban agah anŭ jadi keya ka kupo kupo adi TUHAN pirabur ngga dŭh kira masi. Isa-i Ayŭh dingah sien mandam ngga isan isan ka trompet perang ngga arong kumbeng,
Ayŭh nang: “Tingga! Piin maad di utara ka re nyarab mun piin uba. Piin anŭ re ngapuh tarun tana ngga sopŭrŭg kayuh adi agi dieh, kupo kupo ngga bara daya adi rŭŭ dieh. Daya re bagan mite turung; barang naan di ong re nyisakuk sien.
“Daya Heshbon ngga Elealeh nyirais, ka sirais ngara dapŭd dog dingah jeh ndŭg Jahaz. Sirais anŭ dapŭd dog dingah daya di Zoar, ka dog dingah jeh di Horonaim ngga Eglath Shelishiyah. Sungi Nimrim gŭh mbŭh badŭh.