Yudas 1:20 - Porjanjian Boharu Torjomahan Baso Dilakng Soari-ari

²⁰ Apo, kaitn, boko somadikan inyo ku kasihi, bousahacam oca' kaitn botambah kuat pocayo ko ajaran inyo bondar-bondar doi' Allah. Bodoa cam dalapm Roh Allah.

Yudas 1:20 ပူးပေါင်းရင်းမြစ်များ

Kisah Boko Rasul 26:18

Kolai paca'an monulukng sia' oca' mongoroti jadi sia' co hidup dalapm kopocaya'an inyo salah, apo bobali' pocayo inyo bondar. Kolai paca'an monulukng sia' oca' mongoroti jadi sia' kinyo hidup dibabah kuaso Iblis agi', apo bobali' ongko hidup di babah kuaso Allah. Agatn ubo nian, aman sia' pocayo agatn Aku, ongko boko dosa sia' paca'an diamputi. Sia' mondapat tompat di antaro umant Allah.’ Nanam pomandiran Yesus ko Aku.

Kisah Boko Rasul 6:7

Kabar Boi' mongona'i Yesus torus diboritoan. Jumlah urakng inyo pocayo di Yerusalem mongkitn botambah banya'. Malahan banya' imam pocayo agatn Yesus jam.

Kisah Boko Rasul 9:31

Lopas nantai somanah boboropo watu, boko urakng inyo pocayo Yesus di soluruh doerah Yudea, doerah Galilea, huatan doerah Samaria ulih hidup agatn sonang-asau. Co nyiant inyo mondorako'i sia'. Roh Allah monulukng huatan monguat'an sia'. Obai nantai, mongkitn manah mongkitn banya' urakng inyo pocayo agatn Yesus. Sia' somuo hidup agatn ponuh oso hormat ko Tuhatn inyo bokuaso.

Roma 8:15

Komainyo, kaitn samo sama'an pacal inyo ponggola'an. Apo, Roh Allah inyo dionju' ko kaitn kinyo bulah kaitn monjadi samo sama'an nantai agi'. Roh Allah bulah kaitn monjadi poana'an Allah. Obai Roh-Nyo nantai, kito moningkau, “Oi Allah! Duatn Bopaiku!”

1 Korintus 1:8

Sio jam paca'an monguat'an hati kaitn sampai pado ahir joman. Sio paca'an molabuhan nantai oca' kaitn kinyo dianggap salah timpu Yesus Kristus, Tuhatn inyo bokuaso atas kito datakng bobali'.

1 Korintus 10:23

Ado boko urakng bopikir, “Somuonyo ulih pakai' kito.” Pikiran nantai kinyo salah. Memang bondar kito hidup bebas. Apo kinyo somuo porbuatan boguno. Kinyo somuo porbuatan bulah urakng bukai monjadi lobih kuat socaro rohani.

1 Korintus 14:15

Jadi, gola' kito molabuhan ni'in: Kito gola' bodoa momakai roh kito. Apo kito pan gola' bodoa momakai akal budi kito. Kito gola' bonyanyi pujian momakai roh kito. Apo kito pan gola' bonyanyi pujian momakai akal budi kito.

1 Korintus 14:26

Jadi ubo ni'in boko somadikan: Watu kaitn bokumpul pakai' sombayakng, ado inyo monyanyi lagu pujian, ado inyo moajaran sosuatu, ado inyo monyampaian sosuatu inyo Allah poniant'an ko io, ado inyo bopandir pakai baso roh, ado inyo monjolasan roti doi' pomandiran dalapm boko baso nantai. Somuo nantai gola' dilabuhan pakai' monguat'an urakng bukai.

Galatia 4:6

Obai kito boko poana'an Allah, ongko Sio moutus Roh Ana'-Nyo ko kito. Roh-Nyo mansu' ko dalapm hati kito. Roh-Nyo bulah kito bodoa somombondarnyo agatn mongatoan, ‘Bopai, oi Bopaiku’.

Efesus 4:12

Kristus moonji'i boko komampuan nantai oca' sia' ulih mombulah somuo urakng bukai inyo pocayo monjadi mampu pakai' molayati Sio. Agatn sama'an nantai, soluruh jomaat botumbuh huatan monjadi kuat dalapm Kristus.

Efesus 4:16

doi' somuo anggota bukakng-tubuh inyo tosusutn rapi huatan bohubukan kuat agatn boko anggotanyo. Aman sotiap anggota bokorojo sosuai agatn komampuan husus inyo dionju'nyo, jadi Kristus mombulah soluruh bukakng-tubuh botumbuh dalapm kasih.

Efesus 4:29

Aman kaitn bopandir, jangan momakai boko pandir inyo jahat. Apo pakaicam boko pandir inyo boi' pakai' monguat'an hati urakng bukai sosuai agatn kopontikan sia'. Agatn sama'an nantai boko urakng inyo mondinga' pandir nantai bodapat koboi'an.

Efesus 6:18

Kaitn gola' hala waspada oca' sotiap watu kaitn ulih bodoa agatn dibimbikng Roh Allah. Pakaicam somuo macapm doa huatan pomuhunan ko Allah. Jangan botongga' bodoa pakai' somuo urakng inyo pocayo.

Kolose 2:7

Kohonda'nyo kaitn totap pocayo ko Sio huatan botumbuh dalapm Sio. Kohonda'nyo kaitn botambah kuat pocayo ko somuo ajaran inyo bondar inyo udah disampaian ko kaitn. Kohonda'nyo hati kaitn hala bosukur.

1 Tesalonika 5:11

Obai nantai, gola' hala salikng moingant'an mongona'i ajaran nantai oca' hati kaitn masikng-masikng dikuatan. Gola' sosamo bontulukan oca' kopocaya'an kaitn ko Yesus monjadi lobih kuat. Memang kaitn tongahan molabuhan nantai jam.

1 Timotius 1:4

Huatan oca' sia' jangan tolalu borotian boko kisah sangan damo boko daptar koturutan inyo co nyiant kotuntukannyo. Boko ajaran sama'an nantai bayo bulah boko urakng bomparakan mulut huatan co nyiant gunonyo pakai' hajat Allah, inyo kito kotohu'i agatn pocayo ko Sio.

2 Timotius 1:5

Aku pan togonangan obai kolai somombondarannyo pocayo ko Yesus samo sama'an nini' Lois doi' sobolah indai kolai ongko indai kolai Eunike. Sia' duo pocayo sobolupm kolai. Aku pan yakitn obai kolai somombondarannyo jam pocayo.

Titus 1:1

Ko Titus: inyo bondar-bondar sama'an ana'ku dalapm Yesus obai kito sosamo pocayo ko Yesus. Salapm doi' aku, Paulus. Allah moutus aku monjadi polayatn-Nyo. Yesus Kristus moutus aku monjadi rasul-Nyo. Aku udah diutus pakai' monulukng boko urakng inyo dipilih Allah oca' mongkitn pocayo ko Yesus. Aku pan diutus pakai' mongajar ajaran inyo bondar oca' boko urakng inyo dipilih Allah nantai hidup sosuai agatn kohonda'-Nyo. Pondasi ajaran nantai ia'an pongharapan paca'an hidup somanah-manahnyo, inyo udah Sio janjian sobolupm dunia dipulah. Allah Ponyolamant kito, co mungkitn tumbukan. Pas watu inyo ditontuan-Nyo, Allah udah moonji'i pomandiran-Nyo molalu'i Kabar Boi' inyo udah dipocayoan ko aku pakai' kuboritoan. Aku bodoa oca' Allah Bopai kito ongko Kristus Yesus, Ponyolamant kito monunju'an kasih karunia-Nyo huatan moonji'i sonang-asau ko kolai.

Yakobus 2:22

Jadi, udah jolas Abrahapm bukatn bayo pocayo ko Allah, apo molabuhan porbuatan inyo monyonangan Allah jam. Porbuatan Abrahapm monunju'an obai io bondar-bondar pocayo.

2 Petrus 1:1

Surat ni'in doi' ku, Simon Petrus, urakng inyo molayati Yesus Kristus. Aku pan diutus sobagai rasul-Nyo. Surat ni'in ko boko urakng inyo pocayo ko Yesus Kristus samo sama'an koi. Sio udah moonji'i kito kosompatan nantai obai Sio hala molabuhan inyo bondar. Sio nam Allah ongko Ponyolamant kito.

1 Yohanes 5:4

obai somuo ana' Allah ulih mongalahan kojahatan di dunia ni'in. Kito ulih molabuhan nantai obai kito pocayo ko Yesus Kristus.

Yudas 1:3

Boko somadikan inyo ku kasihi! Kito samo-samo disolamant'an huatan aku bondar-bondar honda' monulis ko kaitn mongona'i nantai. Apo, aku mooso gola' monulis ko kaitn pakai' monguat'an kopocaya'an kaitn. Agatn sama'an nian, aku honda' oca' kaitn totap bojuakng mompotahatan iman kito, ia'an boko ajaran bondar inyo udah disampaian ko boko urakng husus umputn Allah.

Wahyu 13:10

Sotiap urakng inyo ditontuan Allah pakai' monjadi tawatan, pasti paca'an monjadi tawatan. Sotiap urakng inyo ditontuan pakai' dibunuh agatn podakng, pasti paca'an dibunuh agatn podakng. Jadi, boko urakng inyo pocayo gola' botahatn mohadapi nantai. Sia' gola' pocayo ko Yesus agatn sotia.