Yohanes 7:28 - Porjanjian Boharu Torjomahan Baso Dilakng Soari-ari

²⁸ Jadi, watu Yesus mongajar di tongahlamanan Rumah Allah, Sio bopandir agatn saro borakng, “Kaitn konal Aku huatan doi' mono asal-Ku! Apo Aku datakng kinyo kohonda'-Ku siku'. Aku diutus Sio inyo bondar. Kaitn co tohuan Sio.

Yohanes 7:28 ပူးပေါင်းရင်းမြစ်များ

Matius 11:27

Ongko Yesus bopandir ko boko urakng, “Bopai-Ku udah moonju' somuo hal ko Aku. Co nyiant siku' pan inyo mongonal Ana' solaitn Bopai, nyiant siku' pan inyo mongonal Bopai solaitn Ana', huatan boko urakng inyo dipokonalan Ana' agatn Bopai.

Matius 2:23

Sia' botula' ko laman inyo bodamo Nazaret ongko bodiapm di su'utn. Kojadian nantai tojadi oca' pomandiran Tuhatn Allah monjadi nyata. Timpu joman komai boko nabi monulis obai Rajo Inyo Dijanjian Allah paca'an disobut ‘Urakng Nazaret.’

Matius 26:55

Watu nantai, Yesus bopandir ko urakng banya' nantai, “Kata'an Aku ni'in ponjahat bai, kaitn sampai datakng agatn mombaba' podakng ongko pompangkukng pakai' monangkap Aku? Padohal, sotiap ari Aku dudu' mongajar di tongah lamanan Rumah Allah. Apo watu nantai kaitn co monangkap Aku.

Lukas 10:22

Lalu Yesus bopandir ko boko urakng banyaꞌ, “Bopai-Ku udah moonji'i somuo kuaso ongko pongotohuan ko Aku. Conyiant siku' pan inyo bondar-bondar mongonal Ana', solaitn Bopai. Conyiant jam inyo bondar-bondar mongonal Bopai solaitn Ana', huatan boko urakng inyo Ana' nantai pilih pakai' mongonalan Bopai.”

Lukas 2:11

Obai ari ni'in di kota Daud udah lahir siku' urakng Ponyolamant, pakai' monulukng kaitn. Io nantai Rajo Inyo Dijanjian Allah.

Lukas 2:39

Lopas Yusuf ongko Maria jadi molabuhan boko acara diporintahan dalapm Hukupm Torat pulakam sia' ko kota Nazaret, di doerah Galilea.

Lukas 2:4

Sama'an nian jam, Yusuf botula' doi' kota Nazaret di doerah Galilea, ko doerah Yudea ko kota Daud damonyo Betlehem, obai Yusuf doi' koturutan Daud.

Lukas 2:51

Lopas nian Yesus pulakng sosamo agatn sia' ko kota Nazaret. Yesus totap taat agatn sia'. Indai-Nyo monyimpatn boko poristiwa inyo tojadi nantai, dalapm hatinyo.

Yohanes 1:46

Kato Natanael ko io, “Ah! co mungkitn lou' inyo boi' boasal doi' laman Nazaret.”

Yohanes 10:36

hibo kaitn mongatoan Aku mohayam Allah aman Aku mongatoan Aku ninam Ana' Allah? Obai, Allah Bopai-Ku momilih Aku huatan moutus Aku ko dunia.

Yohanes 12:49

Obai Aku kinyo monyampaian pomandiran doi' kohonda'-Ku siku', apo doi' kohonda' Allah Bopai inyo moutus Aku. Sionam inyo moonji'i porintah ko aku, pomandiran inyo gola' Ku sampaian.

Yohanes 14:10

Kata'an kolai kinyo pocayo aman Aku bosatu agatn Bopai, huatan Bopai bosatu agatn Aku? Pomandiran-Ku kinyo boasal doi' diri-Ku siku', apo doi' Bopai inyo bosatu agatn Aku. Sionam inyo mongorojoan somuonyo nantai.

Yohanes 14:31

Apo somuonyo nantai gola' tojadi. Oca', boko urakng di dunia paca'an tohu obai Aku mongasihi Bopai. Sia' pan paca'an tohu obai Aku molabuhan somuo la'apo pan inyo Bopai porintahan ko aku. Nah, hincapm! Kito botula' doi' ninam!”

Yohanes 16:3

Sia' paca'an molabuhan boko nantai obai sia' kinyo mongonal Bopai boi' pan agatn Aku.

Yohanes 17:25

Oi Bopai inyo hala molabuhan inyo bondar. Memang boko urakng dunia co mongonal Duatn. Apo Aku mongonal Duatn ongko sia' ni'in tohu obai Duatn inyo udah moutus Aku.

Yohanes 17:3

Ninam hidup inyo kokal, ia'an obai sia' mongonal ongkah Duatam Allah inyo bondar, huatan pan obai sia' mongonal Yesus Kristus inyo udah Duatn utus.

Yohanes 3:2

Watu malapm, io datakng ko Yesus. Katonyo, “Guru, koi tohu obai Duatn ninam guru inyo diutus Allah. Obai, Duatn molabuhan boko mujisat nantai. Conyiant urakng inyo mampu molabuhan lou' sama'an nantai aman co ado potulukan doi' Allah.”

Yohanes 3:33

Apo, somuo urakng inyo pocayo agatn pomandiran-Nyo, sia' moaku'i obai Allah bondar.

Yohanes 5:32

Apo ado inyo bukai inyo momadahan mongona'i Aku. Aku tohu obai pomandiran-Nyo bondar.

Yohanes 5:43

Aku datakng dalapm damo Bopai-Ku, apo kaitn monula' Ku. Padohal, soandainyo ado urakng bukai inyo datakng bayo mowakili dirinyo siku', kaitn tajahan monorima' io.

Yohanes 6:42

Kolompok urakng Yahudi nantai bopandir, “Yesus ni'in bayo ana' Yusuf pan? Kito konal agatn indai bopai-Nyo. Ubo apo Io ulih bopandir, Aku turutn doi' sorugo?”

Yohanes 7:14

Watu tongahan poraya'an nantai, Yesus botula' mongajar di tongahlamanan Rumah Allah.

Yohanes 8:14

Yesus monimbasi sia'. Kato-Nyo, “Biar pan Aku bosasi mongona'i diri-Ku sikuꞌ, kosasian-Ku totap bondar. Obai, Aku tohu doi' mono Aku datakng huatan ko mono Aku botula'. Apo kaitn co tohu doi' mono Aku datakng huatan ko mono Aku botula'.

Yohanes 8:16

Biar pan Aku mohakipi, koputusan-Ku nantai bondar. Obai, Aku co mohakipi sonsiku'an Ku. Allah Bopai inyo moutus-Ku ado bosamo-Ku.

Yohanes 8:19

Jadi, sia' bopandir ko Sio, “Di mono kironyo Bopai Duatn?” Timbas Yesus, “Kaitn co mongonal Aku damo Bopai-Ku. Soandainyo, kaitn bobondar mongonal Aku, pasti kaitn mongonal Bopai-Ku jam.”

Yohanes 8:26

Ija' ado banya' hal mongona'i kaitn inyo honda' Ku padahan huatan inyo honda' Ku hakipi. Apo, Aku ongkah monyampaian ko kaitn di dunia ni'in, boko hal inyo Ku dinga' doi' Sio inyo moutus Aku, Sio nianam inyo bondar.”

Yohanes 8:42

Kato Yesus ko sia', “Soandainyo Allah bondar Bopai kaitn, pasti kaitn paca'an mongasihi Aku. Obai, Aku datakng doi' Allah. Huatan, Aku datakng bukainyo kohonda'-Ku siku', apo kohonda' Sio inyo moutus Aku.

Yohanes 9:29

Koi tohu obai Allah udah bopandir ko Musa. Apo koi co tohu doi' mono asal Urakng nantai.”

Kisah Boko Rasul 17:23

Aku udah bojojalatn di kota ni'in. Aku moniant banya' tompat monyombah boko duato kaitn. Ado sobuti' mesbah tompat molota'an posombahan jam agatn tulisan ni'in: ‘Pakai' monyombah duato inyo bolupm dikonal.’ Kaitn bolupm mongonal Sio, apo totap monyombah Sio. Aku moajaran mongona'i Sio nantai.

Roma 1:28

Obai sia' co mooso pontikng mongonal Allah, jadi Allah mombiaran pikiran sia' monjadi rusa'. Jadi, sia' molabuhan boko hal inyo soharusnyo kinyo pantas sia' labuhan.

Roma 3:4

Samo sokali cado! Biar pan somuo urakng tumbukan, Allah hala bondar. Nantai samo sama'an inyo totulis dalapm Buku Suci: “Somuo pomandiran Duatn pasti bondar! Soandainyo, Duatn ulih diadili dalapm pongadilan, pasti Duatn inyo monang.”

2 Korintus 1:18

Demi Allah inyo sotia momonuhi janji-Nyo, pomandiran koi ko kaitn co gangga'-gua'an di antaro ‘Au’ ongko ‘Cado’.

2 Korintus 4:6

Obai, Allah inyo bopandir, “Kohonda'nyo ado torakng inyo bocohayo doi' kogolapan!” Sio jam inyo mombulah torakng bocohayo di dalapm hati kito. Ia'an, Sio mombulah oca' kito ngoroti agatn hal ni'in: Komulia'an Allah dapat ditiat di dalapm muho Kristus.

Ibrani 6:18

Watu Allah moucap'an janji-Nyo ongko sumpah-Nyo, co mungkitn Sio tumbukan. Koduo hal nantai kinyo ulih borubah. Obai nantai, kito inyo datakng ko Sio oca' dilinduki, hati kito monjadi kotakng kuat pakai' boharap obai nononyo kito paca'an monorima' borokat inyo dijanjian Allah ko kito.

1 Yohanes 5:10

Urakng inyo pocayo ko Ana' Allah, boroti io pocayo agatn kosasian Allah nantai dalapm hatinyo. Apo urakng inyo co pocayo agatn kosasian nantai, boroti io moanggap Allah bulah kotumbukan. Obai, io kinyo pocayo agatn kosasian Allah mongona'i Ana'-Nyo.