Yohanes 5:30 - Porjanjian Boharu Torjomahan Baso Dilakng Soari-ari

³⁰ “Aku culih-Ku bulah boko lapo doi' kohonda'-Ku siku'. Aku mohakipi sosuai agatn lapo inyo Aku dinga' doi' Bopai-Ku. Somuo koputusan-Ku adil, obai Aku co monuruti kohonda'-Ku siku', apo Aku monuruti kohonda' Sio inyo moutus Aku.

Yohanes 5:30 ပူးပေါင်းရင်းမြစ်များ

Matius 26:39

Lopas nian, Yesus botula' lobih jouh sodikit. Sio tundu' sampai ko tanah lalu bodoa. Kato-Nyo, “Oi Bopai-Ku, aman ulih, bebasanbo Aku doi' pondorita'an inyo gola' Kualapi ni'in. Apo jangan monurut kohonda'-Ku, apo monurut kohonda' Bopai ja'am inyo jadi.”

Yohanes 14:10

Kata'an kolai kinyo pocayo aman Aku bosatu agatn Bopai, huatan Bopai bosatu agatn Aku? Pomandiran-Ku kinyo boasal doi' diri-Ku siku', apo doi' Bopai inyo bosatu agatn Aku. Sionam inyo mongorojoan somuonyo nantai.

Yohanes 17:4

Aku udah monjadi'i pogota'an di dunia ni'in inyo Duatn onju' ko aku. Agatn caro nantai, Aku momuliaan Duatn.

Yohanes 18:11

Apo Yesus bopandir ko io, “Sarukan podakng nan ko sarukngnyo. Apo bai kolai pikir Aku co paca'an minum doi' cangkir pondorita'an inyo dionju' Bopai ko Aku?”

Yohanes 4:34

Kato Yesus ko sia', “Makatan-Ku ia'an: molabuhan kohonda' Allah Bopai inyo moutus Aku, ia'an monjadi'i somuo pokoroja'an inyo Sio onju' ko Aku.

Yohanes 5:19

Ongko Yesus monimbas boko pomimpitn agama Yahudi nantai. Kato-Nyo, “Pondinga'ancam bobondar, inyo Ku pandiran ni'in: Ana' kinyo molabuhan boko la'apo doi' kohonda' diri-Nyo siku'. Ana' ongkah molabuhan la'apo inyo Io tiat doi' Bopai. Obai, la'apo inyo dilabuhan Allah Bopai, nantai jam inyo dilabuhan Ana'.

Yohanes 6:38

Obai, Aku udah turutn doi' sorugo bukainyo pakai' molabuhan kohonda'-Ku siku', apo Aku molabuhan kohonda' Allah inyo udah moutus Aku.

Yohanes 8:28

Jadi, Yesus bopandir, “Watu kaitn moninggian ‘Ana' Monsio’, kaitn paca'an tohu obai Aku nanam Sio Inyo Ado nantai. Kaitn paca'an tohu jam obai Aku co bulah la'apo doi' kohonda' diri-Ku siku'. Aku bayo mongatoan lapo inyo diajaran Bopai ko aku.

Yohanes 8:42

Kato Yesus ko sia', “Soandainyo Allah bondar Bopai kaitn, pasti kaitn paca'an mongasihi Aku. Obai, Aku datakng doi' Allah. Huatan, Aku datakng bukainyo kohonda'-Ku siku', apo kohonda' Sio inyo moutus Aku.

Yohanes 8:50

Aku co bogoyap hormat pakai' diri-Ku. Apo ado Sobuti' inyo honda' oca' Aku dihormati. Sio nianam inyo mohakipi.

Roma 15:3

Obai, Kristus pan kinyo bayo monyonangan diri-Nyo siku'. Samo sama'an inyo totulis dalapm Buku Suci: “Kato inyo sia' gunoan pakai' mohayam Duatn, au Allah, sia' gunoan pakai' mohayam aku.”

Roma 2:2

Kito somuo tohu obai Allah adil timpu Sio mohukupm urakng inyo molabuhan boko hal inyo jahat.

Roma 2:5

Apo kaitn tikakan. Hati kaitn kinyo honda' borubah. Obai nantaiam, kaitn siku' mombulah hukupan kaitn botambah lobih borat agi'. Nantai tojadi timpu ari Kiamant nononyo watu Allah monyatoan Sio kotakan godi tohadap dosa, ongko mohukupm urakng agatn adil.