Yohanes 5:10 - Porjanjian Boharu Torjomahan Baso Dilakng Soari-ari

¹⁰ Obai nianam, boko pomimpitn agama Yahudi bopandir ko urakng inyo hoyu' nyamanam nantai. Kato sia', “Sari ni'in ari Sabat. Jadi kolai culih mombaba' tikar kolai.”

Yohanes 5:10 ပူးပေါင်းရင်းမြစ်များ

Matius 12:10

Di santai ado urakng inyo longannyo mati sopia'. Boko urakng Farisi nantai bogoyap kosalahan Yesus, oca' ulih monuduh-Nyo. Jadi, sia' botakutn ko Yesus, “Ulih cado monyamani urakng watu Ari Sabat?”

Markus 2:24

Jadi, boko urakng Farisi bopandir ko Sio, “Tiat! Porbuatan boko murid Kolai nantai salah! Obai, ado porintah Allah dalapm Hukupm Torat inyo morarakng urakng bokorojo watu ari Sabat.”

Markus 3:4

Lalu, Yesus bopandir ko sia', “Lapo inyo ulih kito labuhan watu ari Sabat, bulah koboi'an kata'an bulah kojahatan; monyolamant'an urakng kata'an mombunuhnyo?” Apo sia' langunt mo.

Lukas 13:14

Apo kopala' rumah sombayakng nantai kotakng godi, obai io bopikir porbuatan Yesus nantai pokoroja'an inyo culih dilabuhan watu Ari Sabat obai Ari Sabat husus pakai' torahat. Jadi kopala' rumah sombayakng bopandir ko kumpulan urakng nantai, “Monurut Poraturan agama kito urakng Yahudi, ado onam ari pakai' bokorojo. Jadi, aman kaitn honda' dinyamani, datakng ko si'itn di ari-ari nantai. Jangan watu Ari Sabat!”

Lukas 23:56

Lopas nian sia' pulakng ko kota Yerusalem lalu monyiap'an boko rorompahan huatan minya' harupm pakai' mominya'i bangkai Yesus. Apo timpu Ari Sabat, sia' torahat bokorojo pakai' monaati Porintah Allah inyo ditulis Musa dalapm Hukupm Torat.

Lukas 6:2

Boboropo iku' urakng Farisi monogur, “Pogota'an kaitn nian monyalahi poraturan agama kito. Obai di dalapm buku poraturan morarakng urakng bokorojo pas ari Sabat.”

Yohanes 1:19

Watu nantai urakng Yahudi doi' Yerusalem mongiripm boboropo imam ongko boko urakng doi' suku Lewi. Sia' disiuh botula' ko Yohanes pakai' botakutn, “Sopo kironyo duatn ni'in?” Huatan ni'in inyo dipadahan Yohanes ko sia'.

Yohanes 5:11

Apo io monimbasi sia', “Urakng inyo monyamanan aku, Sio momandiran ko aku: ‘Angkatcam tikar kolai, lalu bojalatncam.’ ”

Yohanes 5:15

Urakng nantai borangkat ko boko pomimpitn agama Yahudi nantai, lalu momadahannyo ko sia' obai urakng inyo monyamaninyo ni'in Yesus.

Yohanes 5:16

Jadi, boko pomimpitn agama Yahudi nantai bousaha honda' mondorako'i Yesus. Obai, Sio molabuhan boko hal ubo nantai watu ari Sabat.

Yohanes 7:23

Aman kaitn totap monyunant watu Ari Sabat, kaitn molabuhan nantai oca' kaitn co molanggar poraturan Musa nantai. Jadi, soharusnyo kaitn jangan godi agatn Aku pas Aku monyamani bukakng-tubuh siku' urakng watu Ari Sabat!

Yohanes 9:16

Sobagi'an doi' kolompok urakng Farisi nantai bopandir, “Urakng nantai co datakng doi' Allah. Obai, Sio co monaati Ari Sabat.” Apo inyo bukai bopandir, “Co mungkitn siku' urakng bodosa tohu bulah boko mujisat samo sama'an inyo udah Sio pulah!” Jadi ado posolisihan di antaro sia'.