Yohanes 3:16 - Porjanjian Boharu Torjomahan Baso Dilakng Soari-ari

¹⁶ Obai, Allah kotakng mongasihi boko urakng di dunia ni'in. Sampai, Sio udah monyorahan Ana'-Nyo inyo tunggal. Allah molabuhan nantai, oca' somuo urakng inyo pocayo ko Ana'-Nyo, sia' co bonaso di noraka, apo sia' dapat hidup somanah-manahnyo di sorugo.

Yohanes 3:16 ပူးပေါင်းရင်းမြစ်များ

Matius 9:13

Jadi, botula' huatan polajaricam masud doi' pomandiran Allah ni'in: ‘Daripado momposombahan kurbatn bonatakng ko Aku, Aku lobih honda' oca' kaitn mooso salu' ko urakng bukai.’ Obai, Aku datakng kinyo pakai' moningkau sia' inyo moanggap dirinyo bondar. Apo Aku datakng pakai' moningkau boko urakng inyo bodosa oca' sia' moninggalan boko dosa sia'.”

Markus 12:6

Apo, puku' kobutn nantai ija' ado siku' urakng agi', ia'an ana'nyo siku' inyo kotakan kokidahnyo. Io bopandir dalapm hatinyo, ‘Pasti am boko potani nantai tajahan morogo'i ana'ku.’ Jadi, koponsuahannyo, io monyiuh ana'nyo ko sia'.

Lukas 2:14

“Pujian pakai' Allah di sorugo, tompat Inyo Maho Tinggi. Sonang-asau di bumi pakai' monsio inyo monyonangan hati Allah.”

Yohanes 1:14

Pandir Allah nantai udah monjadi siku' monsio. Sio diapm di antaro kito. Huatan kito udah moniant komulia'an-Nyo. Ia'an, komulia'an-Nyo sobagai Ana' tunggal doi' Allah Bopai. Sio monunju'an ko kito somuo koboi'an Allah huatan somuo inyo bondar mongona'i Allah.

Yohanes 1:18

Co nyiant ado siku' urakng pan inyo kalo moniant Allah, kocuali Yesus, Ana' Tunggal-Nyo. Sio inyo ado hubukan kotakng dampikng agatn Allah Bopai. Sio inyo monyatoan Allah ko kito.

Yohanes 1:29

Kohobu'annyo, Yohanes moniant Yesus datakng ko io. Yohanes bopandir, “Tiat! Numbo, Ana' Domba inyo diutus Allah oca' mohapus dosa dunia.

Yohanes 10:28

Aku moonji'i sia' hidup inyo somanah-manahnyo. Sia' cokalo bonaso sampai somanah-manahnyo. Conyiant ado siku' urakng pan inyo ulih morobut sia' doi' jari-Ku.

Yohanes 3:15

oca' somuo urakng inyo pocayo ko Sio, sia' mondapat'an kohidupan somanah-manahnyo.

Yohanes 3:18

Boko urakng inyo pocayo ko Sio, sia' co dihukupm. Apo boko urakng inyo co pocayo ko Sio, udah ado koputusan sia' paca'an dihukupm, obai sia' co pocayo ko damo Ana' Allah inyo tunggal.

Yohanes 3:36

Boko urakng inyo pocayo ko Ana' Allah, mondapat'an kohidupan somanah-manahnyo. Apo boko urakng inyo kinyo monaati Ana' Allah, co mondapat'an kohidupan nantai. Sia' ija' kona' hukupan doi' Allah.”

Yohanes 6:40

Obai, ni'in kohonda' Allah Bopai-Ku: ia'an oca' somuo urakng inyo moniant Ana' huatan pocayo ko Io, sia' paca'an mondapat'an hidup somanah-manahnyo huatan Aku paca'an mombulah sia' hidup agi' watu ahir joman.”

Roma 5:10

Komai, kito molawatn Allah. Apo kito bobali' bohubukan boi' agatn Sio obai Ana'-Nyo mati pakai' kito. Obai Yesus udah molabuhan nantai, pasti Sio jam paca'an monyolamant'an kito inyo udah bobali' bohubukan boi' agatn Allah. Obai Yesus hidup, jadi kito paca'an mondapat'an hidup kokal jam.

Roma 5:8

Apo, Allah monunju'an kasih-Nyo ko kito agatn caro ni'in: Timpu kito ija' urakng bodosa, Kristus mati pakai' kito.

Roma 8:32

Allah mombiaran oca' Ana'-Nyo siku' sonsaro. Allah monyorahan Ana'-Nyo oca' Sio mati pakai' monanggukng hukupan dosa kito. Aman Allah udah molabuhan nantai pakai' kito, pasti Sio pan tajahan moonji'i kito somuo hal inyo bukai inyo Sio janjian.

Efesus 2:4

Apo Allah kotakng bobolas kasihan Sio kotakng mongasihi kito.

2 Tesalonika 2:16

Allah Bopai huatan Yesus Kristus, Tuhatn kito, mongasihi kito. Sio monguat'an hati kito somanah-manahnyo. Sio jam bulah kito kotakng yakitn obai Sio paca'an momonuhi somuo janji inyo boi' pakai' kito. Koi bodoa oca' Allah Bopai huatan Yesus Kristus, Tuhatn kito

Titus 3:4

Apo timpu Allah monunju'an koboi'an huatan kasih-Nyo, Sio monyolamant'an kito.

Ibrani 2:9

Apo kito tiat Yesus bokuaso. Kinyo manah Allah mombulah Sio monjadi monsio inyo ‘lobih babah doi' boko molekat’. Ongko watu ni'in Sio udah ‘monjadi mulia ongko tohormat’ obai Sio mondorita' sampai mati pakai' somuo monsio. Nantai tojadi obai kasih karunia Allah.

1 Yohanes 3:1

Porotianbo, kotakan bosar kasih Allah Bopai ko kito, obai nantai kito disobut poana'an-Nyo! Memang sobondarnyo kito ninam poana'an Allah. Obai, boko urakng di dunia ni'in co mongonal kito obai dunia co mongonal Sio.

1 Yohanes 4:19

Kito gola' mongasihi, obai Allah lobih doholu mongasihi kito.

Wahyu 1:5

Ongko doi' Yesus Kristus, inyo monyatoan kobondaran Allah agatn sotia. Hoyu' Sio nam urakng inyo hidup agi' doi' komatian. Sionam Rajo inyo bokuaso doi' somuo rajo di dunia. Topuji am Yesus inyo mongasihi kito. Sio mombebasan kito doi' dosa kito, obai Sio mombayar agatn darah-Nyo siku' timpu Sio mati di kayu salib.