Yohanes 19:6 - Porjanjian Boharu Torjomahan Baso Dilakng Soari-ari

⁶ Pas boko imam kopala' huatan boko ponjago Rumah Allah moniant Yesus, sia' mondongkakng-mondorah, “Hukupm mati cam Sio di kayu salib! Hukupm mati cam Sio di kayu salib!” Kato Pilatus ko sia', “Kuti' Io lalu hukupm mati cam di kayu salib. Obai, aku co bodapat sobuti' kosalahan pan doi'-Nyo.”

Yohanes 19:6 ပူးပေါင်းရင်းမြစ်များ

Yohanes 18:31

Kato Pilatus ko sia', “Kaitn ja' mombaba' Io lalu moadili Io sosuai agatn hukupm kaitn.” Apo boko urakng Yahudi nantai bopandir, “Pomorintah Romawi morarakng banso koi mohukupm mati urakng.”

Yohanes 19:4

Pilatus koluar agi' doi' istananyo lalu bopandir ko urakng banya' di santai. Katonyo, “Dinga'ancam! Aku mombaba' Urakng ni'in ko luar, ko kaitn. Oca' kaitn tohu obai aku co mondapat'an sobuti' kosalahan pan doi'-Nyo.”

Kisah Boko Rasul 7:52

Angki-bayatn kaitn monyisa somuo nabi Allah. Joman komai, sia' mombunuh boko nabi inyo mongabaran mongona'i kodatakan Rajo Inyo Dijanjian Allah, ia'an Hulutn Allah inyo hala hidup bondar di hadapan Allah. Sokarakng Rajo nantai udah datakng apo kaitn monyorahan Sio ko musuh-Nyo oca' Sio dibunuh!

Kisah Boko Rasul 2:23

Biar pan kaitn mongotohu'i nantai, kaitn monyorahan Sio ko boko urakng inyo kinyo mongonal Allah. Kohonda' kaitn oca' Sio dihukupm mati di kayu salib. Apo somuonyo nantai tojadi sosuai agatn kohonda' Allah. Hajat Allah nantai udah ditotapan-Nyo doi' joman komaimo.

Yohanes 19:15

Sia' mondongkakng-mondorah, “Hukupm mati Io! Hukupm mati Io di kayu salib!” Kato Pilatus ko sia', “Kata'an kaitn honda' aku mohukupm mati rajo kaitn di kayu salib bai?” Timbas boko imam kopala', “Ongkah Rajo Roma am rajo koi!”

Lukas 23:4

Lalu Pilatus bopandir agatn boko imam kopala' huatan boko urakng bukai inyo udah bokumpul, “Aku co monomuan kosalahan Urakng ni'in. Conyiant alasan sampai Io gola' dihukupm.”

Matius 27:24

Ahirnyo Pilatus mooso obai usahanyo pakai' mombebasan Yesus co bohasil. Malahan, urakng banya' nantai udah honda' bulah korusuhan. Jadi, io monguti' ara'i lalu mombasu'i jarinyo di pohadapan urakng banya' nantai. Katonyo, “Aku cuku botanggukng jawab mongona'i komatian Urakng ni'in! Nian urusan kaitn ba!”

Matius 27:22

Kato Pilatus ko sia', “Aman ubo nian, la'apo inyo kaitn kohonda'i aku labuhan tohadap Yesus inyo disobut ‘Kristus’?” Sia' somuo bopandir, “Bunuh Sio di kayu salib!”

Matius 26:58

Petrus mombodapan Sio doi' jouh. Sampai ko rumah nantai, Petrus mansu' ko tongah lamanan lalu dudu' bosamo agatn boko ponjago, oca' ulih mongotohu'i la'apo inyo paca'an tojadi agatn Yesus.

Yohanes 18:3

Yudas datakng ko santai mombaba' kolompok urakng pakai' monangkap Yesus. Ado boboropo ponjago Rumah Allah inyo disiuh boko imam kopala' huatan boko pomimpitn agama Yahudi doi' kolompok Farisi. Ado jam pasukan tontara Romawi. Kolompok urakng nantai datakng agatn mombaba' obor huatan sonjato.