Yohanes 18:28 - Porjanjian Boharu Torjomahan Baso Dilakng Soari-ari

²⁸ Sunsukng pukau, boko sia' urakng Yahudi nantai mombaba' Yesus doi' rumah Kayafas ko istana gubernur, pomorintahan Romawi. Sia' co mansu' ko dalapm istana nantai. Sia' co honda' monjadi kotor socaro agama obai sia' honda' jumpat makatn pas Ari Rayo Paskah.

Yohanes 18:28 ပူးပေါင်းရင်းမြစ်များ

Yohanes 19:9

Jadi, io mansu' agi' ko dalapm istana. Lopas Yesus dibaba' mansu' jam, Pilatus botakutn ko Sio, “Kolai boasal doi' mono?” Apo Yesus co monimbasi.

Yohanes 18:33

Pilatus mansu' agi' ko dalapm istananyo lalu monyiuh oca' Yesus dibaba' mansu'. Pilatus botakutn ko Sio, “Kata'an kolai ni'in rajo urakng Yahudi ai?”

Yohanes 19:14

Watu nantai hampir japm duo bolas tongah ari watu ari Jumat, ia'an ari urakng Yahudi monyodia'an posiapan pakai' Ari Rayo Paskah. Pilatus bopandir ko boko urakng Yahudi nantai, “Tiatbo! Ninam rajo kaitn!”

Matius 27:27

Lopas nian boko projurit Pilatus nantai mombaba' Yesus ko istana gubernur. Sia' moningkau soluruh pasukan pakai' bokumpul mongoliliki Yesus.

Kisah Boko Rasul 3:13

Urakng inyo kaitn tiat huatan udah kaitn konal ni'in nyamanam agatn kuaso Yesus. Io nyamanam obai io huatan koi samo-samo pocayo ko kuaso Yesus. Allah udah bulah Yesus sangant tohormat. Yesus nantai Hulutn Allah, Allah inyo disombah angki-bayatn kito Abrahapm, Ishak ongko Yakub. Apo kaitn mombaba' Yesus ko gubernur Pilatus oca' Sio dihukupm mati. Pilatus nantai udah momotusan pakai' mombebasan Sio. Apo kaitn monula' Sio ongko minto oca' Pilatus mombebasan siku' urakng pombunuh pakai' kaitn daripado mombebasan Yesus. Sio nantai Inyo Suci huatan Inyo Bondar. Jadi, sobondarnyo kaitn mombunuh Sio inyo Puku' hidup. Apo Allah udah bulah Sio hidup agi' doi' komatian. Koi duo udah tohu hal nantai bondar obai koi tiat agatn mato kopala' koi siku'.

Yohanes 11:55

Watu nantai, Ari Rayo Paskah pakai' urakng Yahudi dampikam. Urakng banya' doi' boko laman udah botula' ko kota Yerusalem pakai' jumpat upacara agama inyo bulah sia' borosih agi' sobolupm pogai Paskah nantai mula'i.

Kisah Boko Rasul 11:3

Kato sia', “Kolai udah bokawal huatan datakng usi'an ko rumah boko urakng bukainyo urakng Yahudi. Malah, kolai makatn bosamo sia'!”

Kisah Boko Rasul 10:28

Petrus bopandir ko sia', “Poraturan agama koi urakng Yahudi morarakng urakng Yahudi bokawal agatn urakng inyo bukai Yahudi sama'an kaitn. Koi pan culih usi'an ko tompat urakng inyo bukainyo urakng Yahudi. Kaitn somuo udah tohu nantai. Apo sokomai aku ado poniant'an. Allah monunju'an ko aku oca' jangan moanggap sopo pan purih sampai bopikir urakng nantai kinyo cucu' ditorima' Allah.

Yohanes 18:39

Apo, biasonyo, sotiap Ari Rayo Paskah, aku molopasan siku' urakng tahatan pakai' kaitn, urakng Yahudi. Honda' cadoai kaitn oca' ku molopasan Urakng nantai, Rajo urakng Yahudi?”

Lukas 22:66

Pas sunsukng, ado potomuan kolompok pomimpitn agama Yahudi inyo kotakng pontikng. Boko imam kopala' huatan boko guru agama Yahudi ado di santai. Lalu Yesus dibaba' ko hadapan sia'.

Markus 15:16

Lopasnyo boko projurit Pilatus nantai mombaba' Yesus ko istana gubernur. Sia' moningkau soluruh pasukan pakai' bokumpul di santai.

Yohanes 18:13

Mulonyo sia' mombaba' Yesus ko Hanas, obai Hanas montuho lolaki Kayafas, huatan Kayafasnam Imam Agukng watu tohutn nantai.

Yohanes 18:15

Simon Petrus huatan siku' murid inyo bukainyo mombodapan Yesus. Murid inyo bukai mongonal Imam Agukng. Jadi, io mansu' ko tongah lamanan rumah Imam Agukng nantai bosamo agatn Yesus agatn rombokan nantai.

Yohanes 19:11

Timbas Yesus, “Kolai bokuaso tohadap Aku obai Allah inyo moonji'i kolai kuaso nantai. Obai nantai, urakng inyo monyorahan Aku ko kolai, io udah bulah dosa inyo lobih bosar daripado dosa inyo tajahan kolai pulah.”

Kisah Boko Rasul 4:27

Oh, Tuhatn! Tulisan Rajo Daud nantai udah monjadi nyata. Di kota Yerusalem ni'in Gubernur Herodes, Gubernur Pontius Pilatus, boko urakng bukai Yahudi bosamo agatn boko urakng Yahudi udah bogabukng molawatn Yesus. Sio nantai Hulutn Duatn inyo kinyo bodosa, ia'an Rajo Inyo Duatn janjian.

Kisah Boko Rasul 10:32

Jadi, siuhcam boboropo urakng ko kota Yope pakai' momocaki urakng inyo bodamo Simon, inyo jam disobut Petrus. Io tongahan mongoluntukng di rumah siku' urakng pongusaha kulit bonatakng, inyo bodamo Simon jam. Rumahnyo di pinggir pantai.’