Yohanes 16:2 - Porjanjian Boharu Torjomahan Baso Dilakng Soari-ari

² Paca'an ado boko urakng inyo monundukng kaitn doi' rumah sombayakng urakng Yahudi. Nononyo, boko urakng inyo mombunuh kaitn paca'an monyangko sia' molayati Allah agatn molabuhan nantai.

Yohanes 16:2 ပူးပေါင်းရင်းမြစ်များ

Matius 10:28

Jangan gola' agatn sia' inyo bayo ulih mombunuh kaitn. Sia' kinyo bokuaso mombunuh jiwa kaitn. Apo kaitn harus gola' agatn Allah. Obai, Sio bokuaso mombonasoan jiwa ongko bukakng-tubuh kaitn di dalapm noraka!

Matius 24:9

Lopas nantai boko urakng paca'an mondorako'i ongko mombunuh kaitn. Soluruh dunia paca'an bonci' agatn kaitn obai kaitn murid-Ku.

Lukas 6:22

Diborokati kaitn inyo dibonci', ditula', dihanyam, ditunju' jahat obai Ana' Monsio.

Yohanes 12:42

Biar pan ado banya' urakng inyo co pocayo ko Yesus, apo di antaro pomimpitn banso Yahudi, ado banya' jam inyo pocayo. Apo sia' co borani moaku'i nantai agatn torus torakng obai sia' gola' agatn boko urakng Farisi. Sia' co honda' dirarakng sombayakng agi' di dalapm tompat nantai.

Yohanes 16:25

Aku momadahan somuonyo nantai ko kaitn momakai poumpamoan. Apo nononyo Aku co ija' momadahannyo ko kaitn momakai poumpamoan. Aku paca'an momandiran torus-torakng ko kaitn mongona'i Allah Bopai-Ku.

Yohanes 16:32

Pondinga'ancam! Nononyo paca'an sampai watunyo, malahan udah datakam watunyo nantai, kaitn paca'an bosongkayo. Kaitn paca'an pulakng ko rumah siku'-monyiku', moninggalan Aku sonsiku'an. Apo, sobondarnyo Aku co sonsiku'an obai Bopai ado bosamo agatn-Ku.

Yohanes 4:21

Kato Yesus ko io, “Indai, pocayo cam agatn pomandiran-Ku ni'in: Nononyo datakng watunyo urakng paca'an monyombah Allah Bopai di mono ja', bukainyo di bukit ni'in, bukainyo jam di Yerusalem.

Yohanes 4:23

Apo nononyo paca'an datakng watunyo, malahan udah datakam watunyo nantai, boko urakng inyo bondar-bondar monyombah Allah Bopai, sia' paca'an monyombah Sio dalapm Roh Allah. Sia' pan paca'an monyombah Bopai sobagai Allah inyo bondar. Obai, Allah Bopai bogoyap boko urakng inyo monyombah Sio agatn caro nantai.

Yohanes 9:22

Urakng tuhonyo bopandir ubo nantai obai sia' gola' agatn boko pomimpitn Yahudi. Obai, boko pomimpitn nantai udah bulah koputusan bosamo-samo, obai sotiap urakng inyo momadahan Yesus nantai Kristus, Rajo Inyo Dijanjian Allah, jadi urakng nian paca'an diusir doi' rumah sombayakng.

Yohanes 9:34

Timbas sia', “Kolai udah bodosa doi' kolai lahir! Apo kolai honda' mongajar koi?” Lalu, sia' mousir io koluar.

Kisah Boko Rasul 5:33

Timpu boko pomimpitn Yahudi mondinga' nantai, oso ditujah hati sia' sampai honda' mombunuh boko rasul nantai.

Kisah Boko Rasul 7:56

Stefanus bopandir, “Tiat! Aku moniant langit tobuka'. Yesus Inyo Diutus Allah Pakai' Monjadi Monsio tongahan bodiritn di tompat inyo palikng tohormat di su'utn.”

1 Korintus 4:13

Timpu boko urakng bopandir monjahai'an koi, koi totap bopandir boi' ko sia'. Sampai ni'in pan, koi monjadi sampah dunia, inyo dibuakan ja'am.

Filipi 3:6

Aman urakng bukai honda' momuji diri obai sia' boagama agatn giat, aku bondar-bondar giat ia'an pan komai aku mondorako'i boko urakng inyo pocayo ko Yesus. Aman urakng bukai honda' momuji diri obai sia' hidup agatn caro inyo bondar-bondar monaati Hukupm Torat, aku cuku cacat dalapm monaati Hukupm Torat.

Wahyu 6:9

Lopas nian, Ana' Domba nantai mombuka' segel kolima'. Watu nantai, aku moniant banya' jiwa di babah mesbahAllah. Boko jiwa nantai ia'an boko urakng inyo udah dibunuh obai sia' momboritoan Pomandiran doi' Allah huatan obai sia' bosasi mongona'i Yesus.