Yohanes 14:9 - Porjanjian Boharu Torjomahan Baso Dilakng Soari-ari

⁹ Timbas Yesus ko io, “Filipus, Aku udah cukup manah bosamo kaitn. Hibo sampai watu ni'in kolai bolupm mongonal Aku? Urakng inyo udah moniant Aku, rotinyo udah moniant Bopai jam. Jadi, hibo kolai bopandir sama'an nantai, ‘Pulah oca' koi ulih moniant Bopai agatn mato koi sikuꞌ’?

Yohanes 14:9 ပူးပေါင်းရင်းမြစ်များ

Kolose 1:15

Yesus Kristus nantai rupo Allah. Biar pan monsio kinyo moniant Allah, apo monsio ulih mongonal Sio molalu'i Yesus Kristus. Kristus inyo palikng bokuaso di pucu' somuo inyo dipulah-Nyo.

Yohanes 12:45

Sotiap urakng inyo moniant Aku, boroti urakng nantai moniant Allah jam inyo udah moutus Aku.

Yohanes 14:7

Aman kaitn mongonal Aku, rotinyo kaitn mongonal Bopai-Ku jam. Watu ni'in kaitn udah mongonal Bopai-Ku huatan moniant Sio.”

Ibrani 1:3

Sio momancaran komulia'an Allah. Sio nam gambar inyo nyata doi' diri Allah siku'. Somuo hal totap botahatn doi' pomandiran-Nyo inyo bokuaso. Lopas Sio mati oca' monsio ulih diborosihi doi' boko dosa, lalu Sio noi' ko sorugo ongko dudu' di tompat inyo tohormat di sopia' kanan Allah inyo kotakng bokuaso.

Yohanes 10:30

Aku huatan Bopai-Ku siku'mo.”

Yohanes 1:14

Pandir Allah nantai udah monjadi siku' monsio. Sio diapm di antaro kito. Huatan kito udah moniant komulia'an-Nyo. Ia'an, komulia'an-Nyo sobagai Ana' tunggal doi' Allah Bopai. Sio monunju'an ko kito somuo koboi'an Allah huatan somuo inyo bondar mongona'i Allah.

Filipi 2:6

Memang bondar, Yesus Kristus samo agatn Allah. Apo, Sio kinyo bopikir Sio gola' momportahatan kodudu'an nantai.

Yohanes 14:20

Timpu nantai, kaitn paca'an tohu obai Aku bosatu agatn Bopai, kaitn bosatu agatn Aku, huatan Aku bosatu agatn kaitn.

Markus 9:19

Ongko, Yesus bopandir ko sia', “Oi boko urakng inyo kinyo pocayo. Apo ija' manahnyo Aku gola' bosamo agatn kaitn agi'? Boropo manah agi' Aku gola' sabar agatn kaitn! Baba' bobia' nian ko si'itn.”

Lukas 12:56

Ui boko urakng inyo gala' pompadah boi'! Agatn moniant awatn ongko angin, kaitn ulih mongotohu'i cuacanyo. Apo biar pan kaitn udah moniant boko porbuatan inyo udah Ku pulah di joman ni'in, kaitn pan totap co ulih mongotohu'i kohonda' Allah.

1 Korintus 15:12

Jadi, koi momboritoan obai Yesus udah dihidupan agi' doi' komatian. Aman kaitn udah pocayo nantai, co mungkitn kaitn mongatoan obai urakng mati kinyo paca'an dihidupan agi' doi' komatian.

Yohanes 8:19

Jadi, sia' bopandir ko Sio, “Di mono kironyo Bopai Duatn?” Timbas Yesus, “Kaitn co mongonal Aku damo Bopai-Ku. Soandainyo, kaitn bobondar mongonal Aku, pasti kaitn mongonal Bopai-Ku jam.”

1 Yohanes 5:20

Kito tohu obai Ana' Allah udah datakng ko dunia ni'in. Sio udah moonji'i pongorotian ko kito oca' kito mongonal Allah inyo bondar. Kito hidup bosatu agatn Allah inyo bondar. Kito pan gola' hidup bosatu agatn Ana'Nyo, Yesus Kristus. Sio nianam Allah inyo bondar. Sio nianam inyo moonji'i kohidupan kokal.