Yohanes 14:26 - Porjanjian Boharu Torjomahan Baso Dilakng Soari-ari

²⁶ Apo nononyo Bopai paca'an moutus Roh-Nyo ko kaitn dalapm damo-Ku. Roh Allah nantai ia'an Ponulukng. Sionam inyo paca'an momadahi somuo la'apo pan ko kaitn. Sio jam paca'an moingant'an kaitn paca'an somuo inyo Aku udah pandiran ko kaitn.

Yohanes 14:26 ပူးပေါင်းရင်းမြစ်များ

Matius 1:18

Kolahiran Yesus Kristus, Rajo Inyo Dijanjian Allah nantai, tojadi dinga' ni'in: Maria nantaiam indai Yesus. Sobolupm nantai, io botunangan agatn Yusuf. Apo sobolupm sia' kawitn, ruponyo Maria udah buntikan. Nantai tojadi obai kuaso Roh Allah.

Matius 1:20

Apo timpu Yusuf tongahan momikiran hal nantai, datakam molekat Tuhatn Allah ko io dalapm mimpi. Molekat nantai bopandir, “Yusuf, koturutan Rajo Daud, jangan gola' monguti' Maria pakai' monjadi bini kolai. Obai, kuaso Roh Allah inyo bulah Maria buntikan.

Matius 28:19

Obai nantai, botula'cam ko somuo banso. Ajaricam boko urakng oca' sia' monjadi murid-Ku. Baptiscam sia' dalapm damo Bopai, Ana', huatan Roh Allah pakai' monunju'an obai sia' pocayo ko Allah Bopai, pocayo ko Yesus, huatan Roh Allah.

Matius 3:11

Ado Urakng inyo paca'an datakng lopas aku. Sio lobih bokuaso daripadoku. Malahan monjadi hulutn-Nyo inyo palikng babah pan, aku kinyo cucu'. Aku mombaptis urakng agatn ara'i pakai' monunju'an obai sia' udah botongga' bulah dosa huatan monyonangan hati Allah. Apo Sio paca'an mombaptis urakng agatn Roh Allah ongko api.

Markus 12:36

Memang bondaram nantai. Apo Roh Allah mombulah Daud monulis pomandiran ni'in: ‘Tuhatn Allah bopandir ko Tuhatnku: Dudu'cam di tompat inyo tohormat di sopia' kanan-Ku, sampai Aku mongalahan boko musuh Kolai, mombulah sia' monjadi samo sama'an kontonja'an kaki Kolai, mombulah sia' tundu' agatn kuaso Kolai.’

Markus 13:11

Watu kaitn ditangkap lalu dibaba' ko pongadilan, jangan kuatir mongona'i pomandiran inyo tajahan kaitn pandiran pakai' mombela diri kaitn. Obai, watu nantai, Roh Allah tajahan moonji'i kaitn pomandiran. Jadi, watu nantai, bukainyo kaitn inyo bopandir, apo Roh Allah di dalapm kaitn inyo bopandir.

Lukas 1:15

Siaꞌ rindakng obai bobia' nantai paca'an monjadi urakng pontikng di hadapan Tuhatn Allah. Io co ulih minum anggur damo mominum tua' samo sokali. Kuaso Roh Allah paca'an hala momonuhi io ija' tangga'i dalapm porut indainyo.

Lukas 1:35

Timbas Molekat nantai ko Maria: “Roh Allah tajahan datakng ko kolai. Kuaso Allah molinduki kolai. Obai nian, Ana' inyo kolai lahiran nantai disobut Kudus, Ana' Allah.

Lukas 1:41

Timpu Elizabet mondingaꞌ salapm nantai, ana' inyo di dalapm porut Elizabet morunjakng. Roh Allah momonuhi Elizabet.

Lukas 1:67

Lopas nantai, Roh Allah momonuhi Zakharia, Bopai bobia' nantai. Obai nianam, Zakharia monyampaian posatn Allah mongonaꞌi la'apo inyo tajahan tojadi.

Lukas 11:13

Biar pan kaitn urakng bodosa, kaitn pasti udah tohu moonji'i inyo boi' ko ana' kaitn. Apotolagi' Allah Bopai di sorugo! Aman urakng mominto Roh Allah, pasti Sio paca'an moonji'i ko urakng inyo mominto nantai.”

Lukas 2:25

Timpu nantai di kota Yerusalem ado urakng damonyo Simeon. Sio ni'in urakng onsi', inyo hala mohormati huatan monaati Allah. Sio monanti Rajo Inyo Dijanjian Allah nononyo datakng moonji'i kodamaian ko banso Israel. Roh Allah monyoroto'i Simeon.

Lukas 24:49

Apo diapmcam di kota Yerusalem ni'in holu'ai obai Aku paca'an moutus Roh Allah ko kaitn, samaꞌan inyo udah dijanjian Bopai-Ku. Diapmcam holu'ai sampai Roh Allah datakng pakai' molongkapi kaitn agatn kuaso doi' Allah.”

Lukas 3:22

huatan Roh Allah turutn kopucu'-Nyo monyorupo'i burukng daro. Ongko kodinga'an saro Allah doi' sorugo momandiran, “Kolai nam Ana'-Ku inyo Ku kasihi. Kolai monyonangan hati-Ku.”

Yohanes 1:33

Watu nantai, aku co tohu sopo Sio. Apo Allah inyo moutus aku pakai' mombaptis agatn ara'i, udah bopandir ko aku, ‘Aman kolai moniant Roh Allah turutn ko pucu' siku' urakng, lalu mohinggap di pucu'-Nyo, jadi urakng nantaiam Urakng inyo paca'an mombaptis agatn Roh Allah.’

Yohanes 12:16

(Timpu nantai, boko murid Yesus co mongoroti boko hal nantai. Apo, lopas Yesus dimuliaan molalu'i komatian huatan konoi'an-Nyo ko sorugo, hoyu' sia' mongoroti obai boko hal nian totulis mongona'i Yesus. Sia' mongoroti obai boko hal ni'in inyo sia' pulah ko Yesus, udah sosuai agatn pomandiran nabi nantai.)

Yohanes 14:16

Aku paca'an minto ko Bopai, lalu Sio paca'an moonji'i Ponulukng inyo bukai ko kaitn. Sio paca'an molabuhan nantai oca' Ponulukng nantai ado bosamo kaitn somanah-manahnyo.

Yohanes 14:25

Aku momandiran somuonyo nantai ko kaitn watu ni'in, watu Aku ija' bosamo kaitn.

Yohanes 15:26

Aku paca'an moutus Ponulukng ko kaitn, ia'an Roh inyo boasal doi' Allah. Roh Allah nantai inyo monunju'an somuo inyo bondar. Sio paca'an bosasi mongona'i Aku.

Yohanes 16:7

Apo sobondarnyo, lobih boi' pakai' kaitn aman Aku botula'. Pomandiran-Ku nantai bondar! Obai, aman Aku co botula', Ponulukng kinyo datakng ko kaitn. Apo aman Aku botula', Aku paca'an moutus Ponulukng nantai ko kaitn.

Yohanes 2:22

Boko murid-Nyo toingant pomandiran-Nyo nantai lopas jadi Sio hidup agi' doi' komatian. Jadi, sia' pocayo ko somuo pomandiran inyo totulis di Buku Suci huatan ko somuo pomandiran Yesus.

Yohanes 20:22

Lopas jadi Yesus bopandir bunyi nantai, Sio mohombusan kosih-Nyo ko sia' lalu bopandir, “Torima' cam Roh Allah!

Yohanes 6:45

Di dalapm Buku boko nabi, ado tulisan ni'in: ‘Allah paca'an moajari sia' somuo.’ Jadi, somuo urakng inyo mondinga' huatan bolajar doi' Allah Bopai, sia' datakng ko aku.

Yohanes 7:39

(Agatn pomandiran nantai, Yesus bomasud Roh Allah. Somuo urakng inyo pocayo ko Yesus paca'an monorima' Roh Allah. Apo watu nantai, Roh Allah bolupm ditorima' sia' obai Yesus bolupm dimuliaan.)

Kisah Boko Rasul 1:2

sampai watu Yesus noi' ko sorugo. Di masa polayatan-Nyo, Sio momilih duo bolas urakng doi' boko murid-Nyo, inyo disobut boko rasul. Watu ari toahir Yesus hidup, Sio ajab sonsaro sampai mati di kayu salib. Apo, lopas nantai, Sio monunju'an boko tando inyo nyata oca' boko rasul nantai pocayo obai Sio bondar-bondar hidup. Somanah ompat puluh ari, Sio moniant'an diri-Nyo boboropo kali ko boko rasul-Nyo. Sio moonji'i boko porintah ko boko rasul-Nyo agatn kuaso Roh Allah inyo ado dalapm diri-Nyo. Sio pan mongajar sia' mongona'i Koraja'an Allah, ia'an sama'an apo caro Tuhatn momimpitn umant-Nyo sobagai Rajo.

Kisah Boko Rasul 1:4

Timpu dalapm watu ompat puluh ari nantai, Yesus tongahan makatn bosamo agatn sia'. Sio bopandir, “Jangan botula' doi' kota Yerusalem ni'in. Bodiapm ja'am di si'itn monantian la'apo inyo udah dijanjian Bopai-Ku. Aku udah kalo momadahan ko kaitn mongona'i nantai.

Kisah Boko Rasul 1:8

Apo Roh Allah paca'an tinggal di dalapm kaitn. Watu nantai, kaitn paca'an monorima' kuaso. Kaitn paca'an momboritoan mongona'i Aku ko boko urakng bukai di kota Yerusalem huatan di sotiap doerah Yudea. Kaitn paca'an momboritoan mongona'i Aku jam di sotiap doerah Samaria. Kaitn paca'an momboritoan mongona'i Aku sampai ko boko tompat inyo palikng jouh di soluruh dunia.”

Kisah Boko Rasul 11:16

Lopas nian aku ingant agi' pomandiran Yesus, Tuhatn kito. Kato-Nyo, ‘Yohanes mombaptis urakng agatn ara'i, apo kaitn paca'an dibaptis agatn Roh Allah.’

Kisah Boko Rasul 13:2

Timpu, sia' bokumpul pakai' bopuaso huatan bodoa. Watu nantai, Roh Allah bopandir ko sia', “Aku momilih Barnabas ongko Saulus molabuhan polayatan husus pakai' molayati boko urakng di doerah bukai. Jadi, tugasan sia' duo pakai' molabuhan polayatan nantai.”

Kisah Boko Rasul 13:4

Roh Allah mombimbikng Barnabas ongko Saulus doi' sobuah tompat ko tompat inyo bukai. Jadi, sia' botula' doi' kota Antiokhia ko polabuhan Seleukia. Doi' santai sia' bolayar ko polabuhan Salamis di pulau Siprus.

Kisah Boko Rasul 15:28

Koi inyo diirikan Roh Allah udah bulah koputusan ni'in: Kaitn kinyo gola' diposo monaati somuo poraturan agama Yahudi. Apo ado boboropo doi' poraturan nantai inyo pontikng ditaati.

Kisah Boko Rasul 15:8

Allah mongotohu'i isi hati sotiap urakng. Allah co monyoropihi antaro kito urakng Yahudi agatn sia' inyo bukainyo urakng Yahudi. Sia' pocayo ko Yesus. Agatn caro nantai, Allah bulah hati sia' borosih ubo nian jam hati kito diborosihi. Komainyo Allah moonji'i Roh-Nyo ko kito. Allah pan udah moonji'i Roh-Nyo ko boko urakng inyo bukainyo urakng Yahudi inyo pocayo agatn Yesus. Nanam caronyo Allah monunju'an obai Sio monorima' sia', co nyiant caro bukai.

Kisah Boko Rasul 16:6

Lopas nantai, Paulus, Silas ongko Timotius botula' ko doerah Frigia huatan doerah Galatia. Sobondarnyo sia' honda' momboritoan Kabar Boi' ko doerah Asia. Apo Roh Allah morarakng sia'.

Kisah Boko Rasul 2:33

Lopas nantai, Sio udah noi' ko sorugo obai kuaso Allah. Yesus pan udah monorima' Roh Allah obai Roh Allah nantai udah dijanjian Bopai-Nyo. Jadi, watu ni'in Yesus moonji'i Roh Allah ko koi. Nanam kojadian inyo udah kaitn tiat huatan dinga' molalu'i boko urakng inyo bopandir agatn bomacapm baso di si'itn.

Kisah Boko Rasul 2:4

Roh Allah moisi'i somuo sia', ongko bulah sia' masikng-masikng bopandir pakai boko baso inyo bukai mombuka'i doi' baso sia' siku'.

Kisah Boko Rasul 20:28

Kaitn gola' monjago diri kaitn huatan urakng bukai inyo udah pocayo agatn Yesus oca' totap pocayo. Allah udah monobus monsio doi' hukupan dosa agatn darah-Nyo sikuꞌ. Jadi, sia' udah monjadi umant Allah siku'. Kaitn udah dipilih Roh Allah pakai' momimpitn sia' nantai. Obai nantai, kaitn gola' monjago sia' samo sama'an gombala monjago kabatn dombanyo.

Kisah Boko Rasul 20:35

Dalapm somuo inyo aku labuhan nantai, aku monjadi contoh pakai' kaitn. Kaitn pan gola' bokorojo koras ongko monulukng boko urakng inyo jaro. Jangan tongkolupatn pomandiran Tuhatn Yesus, ‘Allah lobih momborokati urakng inyo moonji'i bantu'an daripado urakng inyo monorima' bantu'an.’ ”

Kisah Boko Rasul 28:25

Sia' co sotuju. Jadi potomuan nantai dibubaran. Apo sobolupm sia' moninggalan tompat nantai, Paulus ija' bopandir sobuti' hal agi' ko sia'. Katonyo, “Timpu joman komai nabi Yesaya monyampaian pomandiran Roh Allah ko angki-bayatn kito. Pomandiran nantai topat bondar. Allah bopandir ko Yesaya,

Kisah Boko Rasul 5:3

Apo Petrus bopandir, “Ananias, kolai udah mombiaran Rajo Sitatn monguaso'i hati kolai! Kolai moncubo monipu Roh Allah. Kolai tumbukan mongona'i hasil monjual tanah kolai inyo sobondarnyo. Kolai monyimpatn sobagi'an pakai' diri kolai siku'.

Kisah Boko Rasul 7:51

Ongko Stefanus bopandir, “Kaitn ni'in koras kopala'! Hati kaitn co honda' pocayo ko Allah! Kolindakan kaitn co honda' mondinga' pomandiran Sio! Kaitn hala molawatn Roh Allah sama'an ubo angki-bayatn kaitn!

Kisah Boko Rasul 7:55

Apo watu nantai Roh Allah ado pado Stefanus. Io monongadah ko langit, moniant cohayo doi' Allah. Io moniant Yesus tongahan bodiritn di tompat inyo palikng tohormat, ia'an di sopia' kanan Allah.

Roma 14:17

Obai, Koraja'an Allah bukainyo soal poraturan pomakatn ongko minuman, apo soal hidup inyo bondar, hidup agatn damai, ongko hidup agatn sonang-nyamanam. Somuo nantai doi' Roh Allah.

Roma 15:13

Boko somadikan! Allah inyo moonji'i harapan ko kito. Aku bodoa obai kaitn pocayo ko Kristus, jadi Allah tajahan bulah kaitn kotakan sonang-nyamanam ongko hidup agatn sonang-asau. Aku bodoa pakai' nantai oca' kuaso Roh Allah bulah kaitn mongkitn boharap ko Sio.

Roma 15:16

ia'an nantai Sio moutus aku monjadi urakng inyo molayati Kristus Yesus di antaro boko banso bukainyo banso Yahudi. Aku samo sama'an imam inyo moonju' posombahan ko Allah. Obai, aku momboritoan Kabar Boi' doi' Allah ko sia' oca' sia' ulih ditorima' Allah obai Roh Allah bulah sia' monjadi borosih doi' dosa.

Roma 5:5

Aman kito boharap ko Sio sama'an nantai, jadi kito kinyo paca'an kocewa. Obai, hati kito udah dibisi'i Allah agatn kasih-Nyo. Allah molabuhan nantai agatn porontaroan Roh-Nyo inyo udah dionju' ko kito.

1 Korintus 12:3

Obai nantai, aku gola' mongajar kaitn mongona'i ubo apo caro Roh Allah bokorojo dalapm hidup urakng inyo pocayo. Aman ado urakng inyo bondar-bondar dikuaso'i Roh Allah, pasti urakng nantai kinyo paca'an bopandir, “Yesus cucu'mo dihukupm!” Sobali'nyo, aman ado urakng inyo bopandir, “Yesus nantai Tuhatn inyo bokuaso!” pasti urakng nantai bondar-bondar dikuaso'i Roh Allah.

1 Korintus 6:19

Co tohu bai kaitn aman bukakng-tubuh kaitn masikng-masikng samo sama'an rumah pakai' Roh Allah. Huatan Roh Allah udah moonji'i Roh-Nyo pakai' bodiapm dalapm kaitn. Rotinyo kaitn bukai umputn kaitn siku' agi'.

2 Korintus 6:6

Koi molayati agatn hati inyo jujur, agatn pongotohuan doi' Allah, agatn sabar, agatn boi' hati, agatn dibimbikng Roh Allah, agatn kasih inyo sobondarnyo.

Efesus 1:13

Sama'an nian jam agatn kaitn. Kaitn udah mondinga' Kabar Boi' inyo bondar sampai kaitn pocayo ko Kristus huatan disolamant'an. Molalu'i Sio, Allah moonji'i tando obai kaitn pan monjadi umat-Nyo jam, ia'an Sio moonju' Roh-Nyo ko kaitn jam sosuai agatn janji-Nyo sobolupmnyo.

Efesus 1:17

Aku bodoa ko Allah Tuhatn kito Yesus Kristus, Allah Bopai inyo mulia, oca' Sio moonji'i Roh-Nyo ko kaitn inyo mombulah kaitn bohikmat huatan mongonal Sio kotakng dalapm agi'.

Efesus 4:30

Jangan mombulah Roh Allah salu'. Obai, Allah udah moonju' Roh-Nyo ko kaitn sobagai tando obai kaitn paca'an di solamat'an watu ahir joman.

1 Tesalonika 4:8

Jadi, aman ado di antaro kaitn inyo monula' ajaran ni'in, io kinyo monula' monsio apo io monula' Allah. Ingantcam! Allah jam inyo moonji'i Roh-Nyo inyo suci ko kaitn.

2 Timotius 1:14

Kolai udah dipocayoan boko hal inyo borogo. Jagocam boko hal nantai agatn kokuatan doi' Roh Allah inyo ado di dalapm kito.

Titus 3:5

Nantai tojadi bukainyo obai boko porbuatan boi' kito, apo obai kasih sayang-Nyo ko kito. Allah molabuhan nantai molalu'i Yesus Kristus, Ponyolamant kito. Yesus moonji'i Roh Allah inyo monulukng kito oca' kito hidup agatn caro inyo boharu.

Ibrani 10:15

Roh Allah bosasi ko kito mongona'i nantai jam. Sio bopandir,

Ibrani 2:4

Malahan Allah mombutian Pomandiran nantai bondar obai Sio moonju' kuaso ko sia' pakai' molabuhan somuo macapm mujisat ongko obai sia' bodapat bomacapm komampuan husus inyo dionju' ulih Roh Allah sosuai agatn kohonda'-Nyo.

Ibrani 3:7

Jadi, kaitn gola' monuruti pomandiran Roh Allah ni'in: “Sari ni'in, watu kaitn mondinga' saro Tuhatn,

Ibrani 9:8

Agatn poraturan nantai, Roh Allah monunju'an ni'in: Somanah kemah inyo potamo nantai ija' ada'an, jadi jalatn mansu' ko Tompat inyo Suci nantai bolupm tobuka'.

1 Petrus 1:12

Allah momadahannyo ko sia' obai polayatan sia' nantai bukainyo pakai' sia' siku', apo pakai' kaitn. Ia'an, watu ni'in Kabar Boi' mongona'i kosolamant'an nantai udah diboritoan ko kaitn. Nantai tojadi obai Roh Allah inyo diutus doi' sorugo monyoroto'i boko urakng nantai pakai' momboritoan Kabar Boi' nantai. Boko molekat pan honda' mongotohu'i mongona'i Kabar Kosolamant'an nantai.

2 Petrus 1:21

Obai, boko nabi co kalo monyampaian pomandiran obai kohonda' sia'. Sia' monyampaian Pomandiran Allah obai Roh Allah ado di dalapm diri sia'.

1 Yohanes 2:20

Apo kaitn udah monorima' Roh Allah doi' Sio Inyo Kudus. Nantai obainyo kaitn somuo mongotohu'i inyo bondar.

1 Yohanes 2:27

Apo kaitn udah monorima' Roh Allah doi' Yesus Kristus. Roh Allah totap ado di kaitn. Obai nantai, kaitn kinyo pontikng diajari urakng bukai. Roh Allahmo moajari kaitn mongona'i boko la'apo pan. Ajaran-Nyo bondar, kinyo tumbukan. Jadi, sosuai agatn lapo inyo Sio ajaran ko kaitn komai, kohonda'nyo kaitn totap hidup bosatu agatn Kristus.

1 Yohanes 5:7

Jadi ado tigo hal inyo bosasi mongona'i sopo Yesus sobondarnyo:

Yudas 1:20

Apo, kaitn, boko somadikan inyo ku kasihi, bousahacam oca' kaitn botambah kuat pocayo ko ajaran inyo bondar-bondar doi' Allah. Bodoa cam dalapm Roh Allah.

Wahyu 2:11

Sopo pan inyo ulih mondinga', kohonda'nyo io borotian somuo pomandiran Roh Allah ko boko jomaat. Boko urakng inyo monang co paca'an sonsaro komatian koduo, ia'an nantai hukupan somanah-manahnyo.”