Yohanes 10:28 - Porjanjian Boharu Torjomahan Baso Dilakng Soari-ari

²⁸ Aku moonji'i sia' hidup inyo somanah-manahnyo. Sia' cokalo bonaso sampai somanah-manahnyo. Conyiant ado siku' urakng pan inyo ulih morobut sia' doi' jari-Ku.

Yohanes 10:28 ပူးပေါင်းရင်းမြစ်များ

Markus 13:22

Obai, tajahan ado boko urakng datakng inyo ngaku' dirinyo nantai Rajo Inyo Dijanjian Allah. Apo sia' kinyo bondar. Tajahan ado boko nabi palsu jam. Boko rajo palsu agatn boko nabi palsu nantai tajahan mombulah somuo macapm mujisat pakai' mombulah urakng monjadi sosat. Soumpamonyo mungkitn sia' pan honda' mombulah boko urakng inyo dipilih Allah monjadi sosat jam.

Lukas 23:46

Lalu Yesus mondorah agatn saro kotakng borakng, “Bopai! Ko dalapm kuaso Duatn Ku sorahan kosih-Ku!” Lopas jadi bopandir ubo nantai, Io pan matiam.

Yohanes 10:29

Bopai-Ku inyo moonju' sia' ko aku. Sio lobih bokuaso daripado sopo pan. Jadi, conyiant siku' urakng pan inyo ulih morobut sia' doi' jari-Nyo.

Yohanes 11:25

Kato Yesus ko io, “Aku ninam inyo mombulah urakng bobali' hidup doi' komatian. Aku jam moonji'i urakng hidup inyo sobondarnyo. Sotiap urakng inyo pocayo ko aku, biar pan io mati, io totap paca'an hidup.

Yohanes 14:19

Co manah agi', boko urakng di dunia kinyo paca'an moniant Aku agi'. Apo kaitn paca'an moniant Aku. Obai Aku hidup, rotinyo kaitn paca'an hidup jam.

Yohanes 17:2

Bopai udah moonji'i kuaso ko io di pucu' somuo urakng. Duatn molabuhan nantai oca' Io ulih moonji'i kohidupan kokal ko somuo urakng inyo pocayo ko io, ia'an somuo urakng inyo Duatn onju' ko io.

Yohanes 18:9

(Nantai tojadi oca' pomandiran Yesus tontai monjadi nyata, ia'an pomandiran Yesus timpu Io bodoa ko Allah Bopai-Nyo. Kato-Nyo, “Doi' boko urakng inyo Duatn onju' ko aku, co nyiant inyo bonaso.”)

Yohanes 3:36

Boko urakng inyo pocayo ko Ana' Allah, mondapat'an kohidupan somanah-manahnyo. Apo boko urakng inyo kinyo monaati Ana' Allah, co mondapat'an kohidupan nantai. Sia' ija' kona' hukupan doi' Allah.”

Yohanes 4:14

Apo sotiap urakng inyo minum ara'i inyo Aku onju' ko io, io co paca'an korahakan agi' somanah-manahnyo. Obai, ara'i inyo paca'an Aku onju' ko io paca'an monjadi ubo mato ara'i di dalapm dirinyo. Ara'i nantai paca'an torus-norus mongalir huatan moonji'inyo hidup somanah-manahnyo.”

Yohanes 5:24

Pondinga'ancam bobondar inyo Ku pandiran ni'in: Somuo urakng inyo monuruti pomandiran-Ku huatan pocayo ko Allah inyo moutus Aku, sia' co dihukupm apo mondapat'an hidup somanah-manahnyo. Obai, sia' udah pindah doi' komatian somanah-manahnyo huatan mansu' ko dalapm kohidupan inyo bondar huatan somanah-manahnyo.

Yohanes 6:27

Jangan bokorojo pakai' bogoyap pomakatn inyo copat buru' ongko habis. Apo bokorojocam pakai' mondapat'an pomakatn inyo tahatn sampai hidup somanah-manahnyo. Ana' Monsio inyo paca'an moonji'i pomakatn nantai ko kaitn. Obai, Allah Bopai udah mombutian obai Sionam moutus Ana' Monsio.”

Yohanes 6:37

Apo, somuo urakng inyo Allah Bopai-Ku onju' ko Aku, sia' paca'an datakng ko aku. Somuo urakng inyo datakng ko aku, sia' kinyo paca'an Aku tula'.

Yohanes 6:47

Pondinga'an bobondarcam inyo Ku pandiran ni'in: Sotiap urakng inyo pocayo agatn Aku, sia' ado kohidupan inyo somanah-manahnyo.

Yohanes 6:68

Timbas Simon Petrus, “Tuhatn, conyiant ado siku' urakng bukai inyo koi paca'an tuyut! Pomandiran Duatn moonji'i hidup inyo somanah-manahnyo.

Kisah Boko Rasul 7:59

Timpu boko urakng monikapi Stefanus agatn batu, io bodoa, “Tuhatn Yesus, torima'cam rohku.”

Roma 5:17

Obai dosa siku' urakng, jadi somuo urakng gola' mati. Apo, kotakng lobih bosar agi' akibat doi' apo inyo dilabuhan ulih siku' urakng inyo bukai, ia'an Yesus Kristus. Nantai am koboi'an inyo Allah onju' ko monsio, ia'an Sio mombulah caronyo oca' urakng ulih monjadi bondar di hadapan-Nyo. Ongko sia' nantai paca'an bokuaso di dunia ni'in molalu'i Kristus.

Roma 5:2

Obai kito pocayo ko Yesus, jadi kito jam ulih moalapi koboi'an inyo Allah torus-monorus ditunju'an ko kito. Nantaiam koadaan hubukan kito agatn Allah watu ni'in. Apo kito jam sonang-nyamanam obai kito yakitn moharapan obai nono kito paca'an mondapat'an hidup inyo mulia bosamo Allah di sorugo.

Roma 5:21

Komai, dosa inyo bokuaso. Jadi, somuo urakng gola' mati. Apo watu ni'in, pakai' kito inyo pocayo, koboi'an Allah inyo bokuaso. Yesus Kristus, Tuhatn inyo bokuaso dipucu' kito, mombulah kito monjadi bondar di hadapan Allah huatan moonji'i kito hidup inyo kokal.

Roma 5:9

Ni'inan kito udah dibondaran molalu'i komatian Kristus; obai nantai am kito pasti paca'an disolamant'an jam doi' ponggodi Allah molalu'i Kristus.

Roma 6:23

Upah doi' dosa ia'an kito gola' mati topisah doi' Allah. Apo Allah monunju'an koboi'an-Nyo ko kito. Sio moonji'i hidup kokal ko kito obai kito bosatu agatn Kristus Yesus, Tuhatn inyo bokuaso dipucu' kito.

Roma 8:1

Obai nianam, watu ni'in Allah kinyo mohukupm urakng inyo ado di dalapm Kristus Yesus.

Roma 8:29

Doi' komai, Allah udah tohu sopo inyo tajahan dipilih Sio. Doi' komai, Sio pan udah momutusan oca' sia' monjadi sorupo agatn Ana'-Nyo, Yesus. Agatn ubo nantai, Yesus monjadi Ana'-Nyo inyo potamo di antaro banya' somadikan.

Filipi 1:6

Allah udah mula'i pokoroja'an inyo boi' ko kaitn. Aku yakitn Sio tajahan torus mongorojoan nantai udah jadiam watu ari Kristus Yesus datakng agi'.

2 Tesalonika 2:13

Apo, boko somadikan, Tuhatn mongasihi kaitn. Koi bosukur ko Allah obai kaitn. Cucu' koi bosukur obai Allah momilih kaitn. Doi' mulonyo, Allah momilih kaitn oca' kaitn disolamant'an. Koi momboritoan Kabar Boi' inyo bondar ko kaitn. Ongko kaitn pocayo borito nantai. Roh Allah jam hala bulah kaitn mongkitn suci. Nianam caro kaitn ditingkau ongko disolamant'an oca' kaitn bodapat bagian doi' kohormatan Yesus Kristus, Tuhatn kito.

1 Timotius 1:16

Apo malah nantaiam inyo monjadi alasan Yesus monunju'an kasih-Nyo ko aku, oca' Sio ulih monunju'an kosabaran-Nyo. Agatn ubo nian hal ni'in paca'an tojadi jam ko boko urakng bukai inyo nononyo pocayo ko Sio, huatan mondapat'an hidup somanah-manahnyo di sorugo.

2 Timotius 1:12

Niannam obainyo aku moalapi somuo ajab sonsaro ni'in. Apo aku co malu obai aku udah tohu sopo Yesus sobondarnyo. Aku pocayo ko Sio. Aku udah monyorahan polayatan ni'in ko Sio. Aku yakitn Sio paca'an monjago oca' polayatanku kinyo balakng. Sio paca'an monjago polayatanku sampai ari Sio bobali' agi' ko dunia ni'in.

Ibrani 7:25

Obai nantai, Sio sanggup monyolamant'an somuo urakng agatn sompurna inyo datakng ko Allah molalu'i Sio. Sio hala hidup pakai' monjadi Porontaro inyo momuhun ko Allah pakai' sia'.

1 Petrus 1:5

Obai kaitn pocayo ko Yesus, jadi Allah molinduki kaitn agatn kuaso-Nyo oca' kaitn ulih disolamant'an. Kosolamant'an kaitn nantai udah siap ditunju'an Allah watu ahir joman nononyo.

1 Yohanes 1:2

Sio inyo moonji'i hidup somanah-manahnyo ado bosamo Allah Bopai. Apo timpu Sio datakng di dunia, koi ulih moniant-Nyo. Hidup somanah-manahnyo nantai ditunju'an-Nyo ko koi huatan watu ni'in, koi boritoan ko kaitn mongona'i hidup somanah-manahnyo nantai.

1 Yohanes 2:19

Boko musuh Kristus nantai am boko urakng inyo udah koluar doi' kolompok kito. Apo, sobondarnyo sia' kinyo bobondar tomansu' kolompok kito inyo pocayo ko Yesus Kristus. Soandainyo sia' tomansu' kolompok kito, mungkitn sia' totap bosamo-samo agatn kito. Apo pas sia' moninggalan kito, hal nantai mombutian obai sia' somuo kinyo tomansu' kolompok kito.

1 Yohanes 2:25

Ongko ninam inyo udah Sio janjian ko kito, ia'an hidup inyo somanah-manahnyo.

1 Yohanes 5:11

Ninam kosasian nantai: Allah udah moonju' ko kito kohidupan kokal molalu'i Ana'Nyo.

Yudas 1:1

Surat ni'in doi' aku, Yudas, hulutn Yesus Kristus. Aku pan somadikan Yakobus. Surat ni'in ko boko urakng inyo ditingkau, ia'an boko urakng inyo dikasihi Allah Bopai, boko urakng inyo Allah jago oca' ulih monjadi umputn Yesus Kristus.

Yudas 1:21

Tuhatn kito, Yesus Kristus, paca'an monunju'an kasih sayang ko kito, ia'an Sio paca'an moonji'i kito kohidupan somanah-manahnyo. Kapikng kaitn monantian nantai, kaitn gola' totap hidup dalapm kasih Allah.

Yudas 1:24

Allah inyo satu-satunyo, bokuaso monjago kaitn oca' kaitn kinyo jatu' ko dalapm dosa. Sio bokuaso mombaba' kaitn ko hadapan-Nyo inyo mulia dalapm koadaan kaitn borosih doi' dosa. Timpu nantai, kaitn pan paca'an kotakan sonang-nyaman.