Yohanes 10:16 - Porjanjian Boharu Torjomahan Baso Dilakng Soari-ari

¹⁶ Apo ado jam boko domba bukai inyo bukainyo doi' kabatn domba ni'in inyo umputn-Ku. Aku gola' mombaba' sia' jam. Sia' paca'an mondinga'an saro-Ku. Somuo domba-Ku paca'an monjadi sokabatn agatn siku' pongombolo.

Yohanes 10:16 ပူးပေါင်းရင်းမြစ်များ

Matius 17:5

Pontongahan io bopandir nantai, sopongirap ado awatn inyo torakng turutn monungkau'i sia' somuo. Allah bopandir doi' awatn nantai, “Ni'innam Ana'-Ku inyo Ku kasihi. Io monyonangan hati-Ku. Pondinga'ancam pomandiran-Nyo!”

Lukas 15:8

Yesus molajuan mongajar agatn poumpamoan ni'in. “Soumpamonyo ado botina' inyo bisi sopuluh pingkai' duit pira'. Aman io kohilakan sopingka'i, pasti io paca'an monokil pompolitoan lalu monyapu somuo rumahnyo pakai' monggoyapi duit nantai sampai io monomuannyo.

Yohanes 10:11

Aku ninam pongombolo inyo boi'. Pongombolo inyo boi' monyorahan hidupnyo pakai' monyolamant'an boko dombanyo.

Yohanes 10:2

Apo urakng inyo mansu' molalu'i lawakng kandakan, sobondarnyo io nianam pongombolo boko domba nantai.

Yohanes 10:27

Boko domba-Ku mondinga'an saro-Ku. Aku mongonal sia' huatan sia' tuyut Aku.

Yohanes 10:3

Ponjago kandakan mombuka' lawakng pakai' pongombolo nantai. Boko domba mondinga'an saro pongombolo nantai. Io moningkau boko dombanyo agatn damo sia' siku'-monyiku'. Io moirikan sia' ko luar.

Yohanes 10:4

Lopas jadi pongombolo nantai mombaba' somuo domba umputnnyo ko luar doi' kandakan nantai, io bojalatn di pohadapan boko dombanyo. Boko domba nantai tuyut io obai boko dombanyo nantai mongonal saronyo.

Yohanes 10:5

Boko dombanyo nantai co paca'an tuyut urakng bukai. Sia' paca'an rari doi' urakng nian obai sia' co mongonal saronyo.”

Yohanes 11:52

Bukainyo pakai' banso nantai ja', apo Sio mati oca' somuo poana'an Allah inyo topisah-pisah somuonyo, ulih bokumpul monjadi satu.

Yohanes 17:20

“Aku co ongkah bodoa pakai' boko murid-Ku ja'am. Apo Aku pan bodoa pakai' boko urakng inyo pocayo ko Aku molalu'i pomboritoan sia'.

Yohanes 6:37

Apo, somuo urakng inyo Allah Bopai-Ku onju' ko Aku, sia' paca'an datakng ko aku. Somuo urakng inyo datakng ko aku, sia' kinyo paca'an Aku tula'.

Kisah Boko Rasul 15:14

Simon Petrus udah mongisahan pongalapannyo komai. Io mongisahan caro Allah monunju'an koboi'an ko boko banso bukai. Allah momilih boko urakng doi' antaro sia' oca' monjadi umant-Nyo.

Kisah Boko Rasul 18:10

Jangan gola' obai Aku monyoroto'i kolai! Co nyiant siku' urakng pan inyo paca'an mondorako'i kolai. Torus ja' mongajar obai boko umant-Ku di kota ni'in.”

Kisah Boko Rasul 22:14

Ongko Ananias bopandir ko aku, ‘Allah angki-bayatn kito udah momilih kolai pakai' mongotohu'i kohonda'-Nyo, pakai' moniant Yesus inyo hala hidup bondar di hadapan Allah, pakai' jam mondinga' saro-Nyo doi' nyao Sio siku'.

Roma 11:25

Boko somadikan! Oca' kaitn kinyo bopikir kaitn udah mongotohu'i boko la'apo pan, jadi aku honda' momadahannyo ko kaitn mongona'i hajat Allah ni'in inyo komai kinyo dikotohu'i monsio: Sobagi'an banso Israel udah monjadi korikng hati, kinyo honda' pocayo agatn Yesus. Apo, koadaan ni'in bayo sampai jumlah monsio doi' banso bukai udah datakng ko Allah, ia'an nantai jumlah inyo udah ditontuan-Nyo.

2 Tesalonika 2:13

Apo, boko somadikan, Tuhatn mongasihi kaitn. Koi bosukur ko Allah obai kaitn. Cucu' koi bosukur obai Allah momilih kaitn. Doi' mulonyo, Allah momilih kaitn oca' kaitn disolamant'an. Koi momboritoan Kabar Boi' inyo bondar ko kaitn. Ongko kaitn pocayo borito nantai. Roh Allah jam hala bulah kaitn mongkitn suci. Nianam caro kaitn ditingkau ongko disolamant'an oca' kaitn bodapat bagian doi' kohormatan Yesus Kristus, Tuhatn kito.

Ibrani 13:20

Aku bodoa ko Allah inyo moonji'i sonang-asau. Sio mombulah Tuhatn kito, Yesus, bobali' hidup doi' komatian. Agatn sama'an nantai, darah Yesus monsahan pojanjianinyo Allah pulah agatn monsio pakai' somanah-manahnyo. Yesus monjadi Gombala Agukng inyo mombimbikng kito, boko domba-Nyo.

1 Petrus 2:10

Komai, kaitn bukainyo boko urakng umputn Allah. Apo ni'in kaitn udah monjadi boko urakng umputn-Nyo. Komai, Allah co monunju'an koboi'an-Nyo ko kaitn. Apo ni'in Allah udah monunju'an koboi'an-Nyo ko kaitn.

1 Petrus 2:25

Komai, kaitn samo sama'an domba inyo sosat. Apo ni'in kaitn udah tuyut Kristus. Sio samo sama'an gombala inyo molinduki jiwa kaitn.

1 Petrus 5:4

Lalu, watu Kristus datakng, ia'an Gombala inyo moirikan somuo gombala, jadi kaitn paca'an mondapat'an mahkota inyo mulia. Mahkota nantai kinyo hilakng komulia'annyo.

Wahyu 3:20

Porhatiancam! Aku bodiritn di pohadapan lawakng ongko mongetok. Aman ado urakng inyo mondinga'an saro-Ku, lalu mombuka' lawakngnyo, jadi Aku paca'an mansu' rumahnyo. Aku paca'an makatn bosamo-samo agatn io. Io paca'an makatn bosamo-samo agatn Aku.