Yakobus 4:11 - Porjanjian Boharu Torjomahan Baso Dilakng Soari-ari

¹¹ Boko somadikan, jangan mongatoan boko hal inyo jahat mongona'i sosamo kaitn urakng pocayo. Jangan hala mohakipi. Aman kaitn molabuhan nantai, rotinyo kaitn co monaati porintah pakai' hala mongasihi inyo ado dalapm Hukupm Torat. Nantai samo sama'an kaitn mongatoan porintah nantai salah huatan kinyo boi'. Jadi, bukainyo monaati porintah, kaitn botindak samo sama'an kaitn monjadi boko hakipm inyo bohak monilai porintah nantai.

Yakobus 4:11 ပူးပေါင်းရင်းမြစ်များ

Lukas 6:37

“Jangan mohakipi urakng bukai, nononyo kaitn co dihakipi Allah. Jangan monyalahan urakng bukai, nononyo kaitn kinyo disalahan Allah. Amputi kosalahan urakng bukai, nononyo kaitn diamputi Allah.

Roma 2:1

Jadi, kaitn inyo mohakipi urakng bukai pan bosalah. Kaitn kinyo ulih bopandir kaitn bondar. Obai, kaitn molabuhan boko hal inyo jahat samo sama'an urakng inyo kaitn hakipi. Jadi, agatn mohakipi urakng bukai, sobondarnyo kaitn pan mohakipi diri kaitn siku'.

Roma 2:13

Apo urakng monjadi bondar di hadapan Allah bukai obai mondinga' Hukupm Torat, apo obai monaati Hukupm Torat nantai.

Roma 7:7

Aman sama'an nian, apo inyo ulih kito pandiran? Apobai Hukupm Torat nantai jahat? Samo sokali cado! Sobali'nyo, justru Hukupm Torat mongajar aku mongona'i dosa. Contohnyo: Ado porintah ni'in dalapm Hukupm Torat: “Jangan mohonda'i umputn urakng bukai!” Doi' nantai, aku tohu kohonda' sama'an nantai ia'an dosa.

1 Korintus 4:5

Obai nianam, jangan kaitn monilai boko urakng bukai. Tantian sampai Yesus datakng. Sio paca'an monoraki la'apo inyo diombakan di dalapm potakng. Sio paca'an moniant'an somuo pikiran inyo ado dalapm hati sotiap urakng. Ongko, Allah inyo paca'an momuji sia' sosuai agatn polayatan sia' siku'-monyiku'.

2 Korintus 12:20

Obai aku bogonang watu ku datakng nononyo, kolaku'an kaitn kinyo boi' sama'an inyo ku kohonda'i. Ubo nian jam, aku gola' monogur kaitn, tindakanku kinyo samo agatn kohonda' kaitn. Aku kuatir kaitn hala botikakng-bokolohi, tungi, ponggodian, molajuan kohonda' diri siku', monjahai'an urakng bukai, mohahadu, buhau, bulah kokacauan.

Efesus 4:31

Jangan agi' sakit hati, somu, godi. Jangan boporap damo mohayam urakng bukai. Jangan bulah somuo macapm kojahatan sama'an nantai.

1 Timotius 3:11

Ubo nian jam, bini boko diakon gola' hidup agatn caro inyo boi'. Sia' gola' tohormat. Sia' co ulih hala bojahat urakng. Sia' gola' mongondalian diri. Sia' pan gola' dapat dipocayo'i dalapm somuo hal.

2 Timotius 3:3

Sia' co tohu mongasihi huatan moamputi urakng bukai. Sia' hala bojahat urakng bukai. Sia' co ulih mongondalian diri sia'. Sia' hala mondorako'i urakng bukai, bonci' agatn somuo hal inyo boi'.

Titus 2:3

Ubo nian jam agatn boko botina' inyo udah tuho. Ajaricam sia' pakai' hidup agatn caro inyo mohormati Allah. Sia' culih bojaha'i urakng bukai. Sia' culih gala' minum sampai mabu'. Sia' gola' mongajar boko hal inyo boi'.

Yakobus 1:16

Boko somadikan inyo ku kasihi, jangan salah bopikir.

Yakobus 1:19

Boko somadikan inyo ku kasihi, pohatiancam ni'in: Somuo kaitn gola' copat mondinga', apo jangan copat bopandir. Jangan ponggodian.

Yakobus 1:25

Apo Allah momborokati urakng inyo mondinga'an Pandir Allah ongko monaatinyo. Urakng ubo nantai momporhatian Hukupm inyo sompurna, ia'an ajaran inyo mombebasan. Io hala ingant molabuhannyo huatan co kalo mongolupatannyo.

Yakobus 2:8

Jangan tongkolupatn, dalapm Buku Suci ado porintah ni'in, “Kasihicam sosamo kolai ubo kolai mongasihi diri kolai siku'.” Aman kaitn monaati porintah nian, kaitn monyonangan hati Allah.

Yakobus 5:10

Boko somadikan, turuticam toladatn boko nabi. Tuhatn moutus sia' pakai' momadahan boko posatn-Nyo. Sia' sonsaro obai molabuhan tugas nantai. Apo, sia' totap sabar botahatn.

Yakobus 5:7

Jadi, boko somadikan gola' sabar botahatn sampai Tuhatn datakng agi'. Cubo pikiran mongona'i boko potani. Sia' gola' sabar monantian hujatn inyo turutn watu musipm monanam. Sia' pan gola' sabar monantian hujatn inyo turutn lansukng sobolupm musipm bohanyi. Hoyu' lakaunyo mohasilan inyo boi' huatan borogo.

Yakobus 5:9

Boko somadikan, aman kaitn hala bosungunt huatan hala monyalahan, jadi kaitn paca'an dihukupm. Jadi, jangannam molabuhannyo nantai. Jangan sampai tongkolupatn, Sio inyo monjadi Hakipm somuo monsio paca'an oca' datakng.

1 Petrus 2:1

Obai nantai, kaitn gola' botongga'cam molabuhan boko kojahatan. Jangan bulah kotumbukan monipu urakng bukai. Jangan pompadah boi' hati. Jangan tungi. Jangan mongonjaha'i urakng bukai.