Yakobus 3:17 - Porjanjian Boharu Torjomahan Baso Dilakng Soari-ari

¹⁷ Apo boko urakng inyo ado hikmat doi' Allah, caro hidup sia' sama'an ni'in: Inyo palikng pontikng sia' hidup agatn caro inyo borosih. Sia' gala' agatn podamaian. Sia' lomah-lombut huatan hatinyo tobuka' pakai' monuruti kohonda' urakng bukai. Sia' monunju'an kasih sayangnyo ko urakng bukai huatan hala bulah koboi'an. Sia' co momihak ko boko urakng totontu, apo hala botorus torakng.

Yakobus 3:17 ပူးပေါင်းရင်းမြစ်များ

Yakobus 3:15

‘Hikmat’ sia' nantai bukainyo hikmat doi' Allah. ‘Hikmat’ sia' nantai doi' dunia, doi' napsu monsio huatan doi' roh jahat.

Roma 12:9

Kaitn somuo gola' bobondar mongasihi urakng bukai. Jangan bayo pompadah. Kaitn gola' bonci' agatn inyo jahat ongko molabuhan inyo boi'.

Yakobus 1:17

Allah inyo moonji'i somuo inyo boi' huatan sompurna. Sio inyo mombulah matoari, bulatn, huatan somuo bintakng di langit. Sio co kalo borubah sama'an kombayakng inyo bopindah-pindah. Sio hala boi'.

Yakobus 1:5

Aman ado inyo kurakng pintar-corodi', io gola' minto doi' Allah. Lalu, Allah paca'an moonji'i pintar-corodi'. Obai, Allah gala' moonji'i ko somuo urakng. Sio co monyalahan urakng inyo minto.

1 Yohanes 3:18

Poana'anKu! Jangannam kito bayo bopandir obai kito mongasihi urakng bukai damo bopandir mongona'i kasih ja'am. Apo kohonda'nyo kito bondar-bondar mongasihi agatn porbuatan ongko dalapm kobondaran.

1 Petrus 1:22

Obai kaitn monaati kobondaran, kaitn udah monjadi suci di hadapan Allah. Jadi, kaitn dapat mongasihi somadikan kaitn inyo sosamo pocayo, agatn hati tulus. Obai nantai, kaitn gola' bobondar hala mongasihi agatn soponuh hati.

Matius 5:8

Diborokaticam urakng inyo suci hatinyo, obai sia' paca'an moniant Allah nononyo.

1 Yohanes 3:3

Somuo urakng inyo yakitn moharapan obai Sio paca'an mombulah nantai tojadi, sia' monjago diri oca' co bulah dosa samo sama'an Sio co bulah dosa.

Lukas 21:15

Obai Aku siku' tajahan moonji'i ko kaitn komampuan pakai' mongatoan pomandiran inyo topat, sampai boko musuh kaitn kinyo paca'an ulih monontakng ongko monikaki kaitn.

Lukas 6:36

Kaitn gola' hala onsi', samo sama'an Bopai kaitn di Sorugo pan onsi'.”

Ibrani 12:14

Bousahacam hidup damai agatn somuo urakng. Bousaha jam hidup borosih doi' dosa. Obai, urakng inyo kinyo borosih doi' dosa, kinyo tajahan ulih moniant Tuhatn.

2 Timotius 2:24

Urakng inyo molayati Tuhatn co ulih bokolohi. Io gola' ramah ko somuo urakng. Io gola' corodi' mongajar. Io pan gola' hala sabar.

1 Petrus 2:1

Obai nantai, kaitn gola' botongga'cam molabuhan boko kojahatan. Jangan bulah kotumbukan monipu urakng bukai. Jangan pompadah boi' hati. Jangan tungi. Jangan mongonjaha'i urakng bukai.

Yakobus 2:4

Aman kaitn molabuhan lou' sama'an nian, rotinyo kaitn bopikir boko urakng totontu lobih boi' daripado urakng bukai. Kaitn monjadi samo sama'an boko hakipm inyo momakai pikiran jahat pakai' monilai urakng.

Ibrani 12:11

Memang, timpu kito dipantu', kito mooso salu', bukainyo sonang. Apo, lopas nantai aman kito dilatih doi' pongalapan nantai, jadi hasilnyo kito monjadi bondar di hadapan Allah ongko mondapat sonang-asau.

Kolose 1:10

Agatn sama'an nantai kaitn ulih hidup agatn caro inyo hala monyonangan Tuhatn. Jadi, somuo porbuatan boi' inyo kaitn labuhan paca'an ado pongulihan inyo boi'. Kaitn pan paca'an mongkitn mongotohu'i mongona'i Allah huatan mongkitn mongonal Sio.

Roma 15:14

Boko somadikanku, aku kotakng yakitn obai kaitn kotakan boi' ongko mongotohu'i somuo inyo dipontikan. Jadi, kaitn ulih momadahi siku'-monyiku'.

1 Korintus 12:8

Umpamonyo, ko urakng ni'in Roh Allah moonji'i komampuan bopandir agatn kopintar-corodi'an. Ko urakng nian Roh Allah moonji'i komampuan pakai' mongotohu'i sosuatu ongko monyampaian boko hal nantai agatn jolasko urakng bukai.

Yakobus 4:8

Jalitncam hubukan inyo boi' agatn Allah, lalu Sio paca'an boi' agatn kaitn. Oi boko urakng inyo bodosa! Jangan bulah dosa agi'. Oi boko urakng inyo bocabakng hati! Borosihicam hati kaitn!

1 Timotius 5:21

Di hadapan Allah, Kristus Yesus, ongko boko molekat inyo dipilih Allah, aku momorintah kolai: turuticam boko porintah nantai ongko co momihak ko boko urakng totontu.

Kisah Boko Rasul 11:24

Nah, Barnabas nantai urakng inyo boi' hati. Io hala disoroto'i kuaso Roh Allah. Io kotakan pocayo agatn Yesus. Jadi, lopas polayatan Barnabas, banya' agi' urakng inyo monjadi pocayo ko Tuhatn Yesus.

Matius 23:28

Ubo nian jam kaitn. Aman urakng bukai moniant kaitn doi' luar, kaitn kotiat'an sama'an urakng inyo boi'. Apo sobondarnyo hati kaitn pompadah boi' huatan co honda' monuruti boko porintah Allah.

1 Tesalonika 2:7

Apo koi kinyo molabuhan nantai. Koi bosipat lomah-lombut di antaro kaitn. Samo sama'an siku' urakng indai morawat boko poana'annyo.

Filipi 4:8

Ahirnyo, boko somadikan ku, kaitn gola' hala momikiran mongona'i boko hal inyo bondar, inyo patut dirogo'i, inyo adil, inyo borosih doi' kojahatan, inyo manis, inyo loma' didinga'. Pokoknyo, pikiran cam mongona'i la'apo pan inyo boi' ongko patut dipuji.

Filipi 1:11

Hidup kaitn tajahan molimpah agatn porbuatan inyo bondar-bondar boi' inyo ongkah ulih dihasilan Yesus Kristus. Jadi Allah tajahan dipuji ongko dimuliaan.

Kisah Boko Rasul 9:36

Kinyo jouh doi' santai di kota Yope ado siku' urakng botina'. Damonyo Tabita. (Dalapm baso Yunani damo nantai disobut Dorkas.) Dorkas nantai urakng inyo pocayo agatn Yesus. Io hala bulah koboi'an agatn urakng bukai. Io pan opat monulukng urakng jaro.

Yohanes 1:47

Kato Filipus ko io, “Hincapm! Tiatcam numbo!” Watu Yesus moniant Natanael datakng, Sio bopandir mongona'i Natanael. Kato-Nyo, “Tiat! urakng ni'in asli urakng Israel! Kinyo ado kopalsuan dalapm dirinyo.”

Yohanes 1:14

Pandir Allah nantai udah monjadi siku' monsio. Sio diapm di antaro kito. Huatan kito udah moniant komulia'an-Nyo. Ia'an, komulia'an-Nyo sobagai Ana' tunggal doi' Allah Bopai. Sio monunju'an ko kito somuo koboi'an Allah huatan somuo inyo bondar mongona'i Allah.

Titus 3:2

Ingant'ancam ko sia' oca' jangan monjahai'an damo urakng bukai huatan jangan botikakng. Apo sia' gola' bondar-bondar coraca'an ongko lomah-lombut agatn somuo urakng, tomansu' agatn boko urakng inyo bolupm pocayo ko Yesus.

Titus 1:15

La'apo pan ia'an suci bagi boko urakng suci. Apo bagi boko urakng inyo pikirannyo jahat huatan kinyo pocayo, co nyiant inyo suci, obai pikiran huatan hati sia' udah jahat.

Roma 12:18

Sodapat-dapatnyo aman nantai bogantukng doi' diri kolai siku' bousahacam pakai' hidup damai agatn somuo urakng.

Efesus 5:9

Obai ni'inan, hasil doi' caro hidup dalapm torakng nantai: urakng nantai bulah koboi'an, bondar di hadapan Allah, huatan moikuti ajaran inyo bondar.

2 Korintus 10:1

Aku ninam, Paulus, udah tohu obai ado boboropo urakng di antaro kaitn inyo bopandir bunyi ni'in: “Timpu Paulus ado bosamo agatn kito, io sabar. Io borani monogur kito bayo agatn surat timpu io jouh doi' kito.” Jadi, ni'in, aku muhun ko kaitn agatn sabar samo sama'an Kristus jam sabar ongko boi' hati.

2 Korintus 9:10

Allah inyo moonji'i bonih ko urakng inyo monugal ongko pomakatn pakai' dipua'i. Ubo nantaiam, Sio paca'an moonji'i lobih doi' cukup bonih pakai' kaitn. Sio pan tajahannyo bulah hasil doi' porbuatan boi' kaitn botambah banya'.

Matius 5:9

Diborokaticam urakng inyo mombaba' damai, obai Allah paca'an monyobut sia' boko poana'an-Nyo.

2 Korintus 6:6

Koi molayati agatn hati inyo jujur, agatn pongotohuan doi' Allah, agatn sabar, agatn boi' hati, agatn dibimbikng Roh Allah, agatn kasih inyo sobondarnyo.

2 Korintus 7:11

Tiatbo somuo hasil doi' porasa'an salu' nantai inyo sosuai agatn kohonda' Allah! Watu ni'in kaitn lobih bobondar monuruti Tuhatn. Kaitn bousaha oca' kosalahan kaitn nantai disolosaian. Kaitn godi agatn dosa huatan lobih gola' agatn Allah. Kaitn rindu agatn aku. Kaitn lobih bosomangant bulah koboi'an. Kaitn mohukupm urakng inyo bosalah. Jadi, lopas jadi monorima' suratku nantai, kaitn mombutian obai kaitn mourus boko mosalah nantai agatn caro inyo bondar.

Yakobus 2:13

Watu ari ponghakipan Allah co paca'an monunju'an koboi'an ko urakng inyo co monunju'an koboi'an. Apo, boko urakng inyo monunju'an koboi'an, sia' co gola' dihukupm.

1 Petrus 2:18

Ko boko urakng di antaro kaitn inyo polayatn: Kaitn gola' monaati agatn hormat ko habakng kaitn, bukatn inyo bayo ko habakng inyo boi' ongko onsi'. Apo aman habakng kaitn congkit, kaitn totap gola' monaati io.