Yakobus 3:13 - Porjanjian Boharu Torjomahan Baso Dilakng Soari-ari

¹³ Aman kaitn bopikir kaitn ado hikmat huatan pongotohuan, kaitn gola' monunju'annyo agatn caro hidup kaitn. Kaitn gola' molabuhan porbuatan inyo boi' agatn boi' hati. Obai, boi' hati datakngnyo doi' hikmat inyo bondar.

Yakobus 3:13 ပူးပေါင်းရင်းမြစ်များ

Matius 11:29

Tuyut'i cam porintah-Ku. Bolajarcam doi' Aku, obai Aku lomah-lombut huatan rondah hati. Aman kaitn molabuhan nantai, ongko jiwa kaitn paca'an mooso sonang.

Matius 21:5

“Padahan ko boko pondudu' di kota Yerusalem, ‘Porotiancam, Rajo kaitn tongahan datakng ko kaitn! Sio lomah-lombut. Sio monunggakng koledai botina', ongko siku' ana' koledai inyo muda'.’ ”

Matius 5:5

Diborokaticam urakng inyo rondah hati, obai sia' paca'an mowarisi bumi.

Matius 7:24

“Jadi, ado urakng inyo paca'an mondinga' pomandiran-Ku ongko molabuhannyo jam. Io samo sama'an urakng inyo pintar-corodi' inyo bulah rumahnyo agatn pondasi di pucu' batu.

1 Korintus 6:5

Aku mongatoan sama'an ni'in oca' kaitn mooso malu. Pasti ado urakng di antaro kaitn inyo cukup pintar-corodi' pakai' bulah koputusan dalapm boko pokaro di antaro boko urakng pocayo.

2 Korintus 10:1

Aku ninam, Paulus, udah tohu obai ado boboropo urakng di antaro kaitn inyo bopandir bunyi ni'in: “Timpu Paulus ado bosamo agatn kito, io sabar. Io borani monogur kito bayo agatn surat timpu io jouh doi' kito.” Jadi, ni'in, aku muhun ko kaitn agatn sabar samo sama'an Kristus jam sabar ongko boi' hati.

2 Korintus 8:24

Obai nantai, tunju'anbo ko sia' obai kaitn ado kasih. Koi udah mongatoannyo ko sia' banya' hal inyo boi' mongona'i kaitn. Jadi, tunju'anbo obai somuo hal nantai bondar. Agatn ubo nantai, jadi boko jomaat bukai pan ulih moniant somuonyo nantai.

Galatia 5:23

onsi' ngoroti, monguaso'i diri. Co nyiant poraturan mono pan inyo morarakng urakng honda' hidup sama'an nantai!

Galatia 6:1

Boko somadikan, aman siku' urakng di antaro kaitn ditomuan bulah dosa. Jadi, kaitn inyo hidupnyo dipimpitn Roh Allah gola' monulukng urakng nantai. Kaitn gola' monulukng io oca' io tongga' bulah dosa nantai. Apo, kaitn gola' molabuhan nantai agatn hati inyo tulus. Boboi'cam! Ingant, jangan sampai kaitn pan bulah dosa jam.

Galatia 6:4

Jadi, jangan mombandikan diri kaitn agatn urakng bukai. Poriso'icam porbuatan kaitn siku'. Agatn caro nantai, kaitn ulih bangga obai porbuatan kaitn siku', bukai obai kaitn moanggap diri kaitn lobih boi' doi' urakng bukai.

Efesus 4:2

Ia'an, kaitn gola' hala rondah hati, lomah-lombut huatan sabar. Tunju'an kasih kolai agatn caro hala tulukng-monulukng.

Filipi 1:27

Lapo ja' inyo tojadi ko aku, inyo pontikng ia'an kaitn hidup sosuai agatn Kabar Boi' mongona'i Kristus. Agatn ubo nian, aman aku ulih datakng botomu agatn kaitn damo cuku datakng ongko bayo mondinga' mongona'i kaitn, jadi aku tajahan tohu obai kaitn totap kuat pocayo. Aku tajahan tohu kaitn bosatu hati ongko bojuakng bosamo pakai' kopocaya'an inyo sosuai agatn Kabar Boi' nantai.

Kolose 3:12

Obai nantai, hidupcam agatn caro inyo boharu. Kaitn nantai boko urakng inyo dipilih Allah, pakai' umputn Sio inyo husus huatan dikasihi-Nyo. Jadi, jadicam urakng inyo mongasihi, boi' hati, rondah hati, lomah-lombut, huatan sabar.

1 Timotius 4:12

Jangan sampai ado urakng inyo mohayam kolai obai kolai ija' muda'. Kolai gola' monjadi contoh pakai' boko urakng pocayo, dalapm pomandiran huatan kolaku'an, dalapm mongasihi urakng bukai huatan sotia ko Tuhatn. Hidup co bulah dosa.

1 Timotius 6:11

Apo kolai, Timotius, jangan molabuhan boko porbuatan inyo jahat sama'an nantai. Kolai polayatn Allah. Kolai gola' bousaha hidup bondar di hadapan Allah, hidup sosuai agatn kohonda' Allah, pagutn sotia ko Allah, huatan mongasihi urakng bukai, botahatn mohadapi ajab sonsaro, bosikap lomah-lombut.

2 Timotius 2:25

Io gola' onsi' mongajar boko urakng inyo gala' molawatn. Sopo tohu Allah moonji'i kosompatan ko boko urakng inyo gala' molawatn nantai pakai' botongga' bulah dosa huatan tohu mongonal ajaran inyo bondar.

Titus 3:2

Ingant'ancam ko sia' oca' jangan monjahai'an damo urakng bukai huatan jangan botikakng. Apo sia' gola' bondar-bondar coraca'an ongko lomah-lombut agatn somuo urakng, tomansu' agatn boko urakng inyo bolupm pocayo ko Yesus.

Ibrani 13:5

Jangan cinta duit. Puasan aja'am diri kaitn agatn kodampuan inyo udah jadi umputn kaitn. Obai, Allah udah bopandir, “Aku kinyo kalo tajahan moninggalan kolai. Aku kinyo kalo tajahan mombiaran kolai sonsiku'an.”

Yakobus 1:21

Jadi, kaitn gola' botongga' molabuhan boko hal inyo kotor huatan jahat. Lopas nian, jangan buhau. Apo torima'cam Pomandiran Allah agatn rondah hati. Allah udah monyimpatn Pomandiran-Nyo dalapm hati kaitn. Pomandiran-Nyo nantai ado kuaso pakai' monyolamant'an hidup kaitn.

Yakobus 2:18

Apo mungkitn ado urakng inyo co sotuju huatan bopandir, “Ado urakng inyo moandalan kopocaya'annyo, huatan ado inyo bukai moandalan porbuatannyo.” Apo aku paca'an monimbas, “Aman kolai co molabuhan porbuatan inyo boi', co mungkitn kolai monunju'an ko aku obai kolai bondar-bondar pocayo! Apo porbuatanku monunju'an ko kolai obai aku bondar-bondar pocayo!”

Yakobus 3:1

Boko somadikanku, kaitn udah tohu obai Allah paca'an mohakipi somuo urakng. Apo, boko guru inyo mongajar mongona'i Allah paca'an dihakipi agatn ukuran inyo lobih borat daripado urakng bukai. Obai nianam, jangan banya' doi' antaro kaitn inyo honda' monjadi guru.

Yakobus 3:17

Apo boko urakng inyo ado hikmat doi' Allah, caro hidup sia' sama'an ni'in: Inyo palikng pontikng sia' hidup agatn caro inyo borosih. Sia' gala' agatn podamaian. Sia' lomah-lombut huatan hatinyo tobuka' pakai' monuruti kohonda' urakng bukai. Sia' monunju'an kasih sayangnyo ko urakng bukai huatan hala bulah koboi'an. Sia' co momihak ko boko urakng totontu, apo hala botorus torakng.

1 Petrus 1:15

Apo, kaitn gola' hidup suci dalapm somuo hal inyo kaitn labuhan samo sama'an Sio inyo moningkau kaitn monjadi umant-Nyo ia'an suci.

1 Petrus 2:12

Kaitn gola' hidup agatn caro inyo boi' di antaro boko urakng inyo bolupm mongonal Allah. Agatn ubo nantai, biar pan sia' mongatoan kaitn jahat, sia' tajahan moniant porbuatan kaitn inyo boi'. Akibatnyo, sia' pan tajahan momuliaan Allah watu Sio datakng nononyo.

1 Petrus 2:9

Apo kaitn nam banso inyo dipilih Allah. Kaitn nam boko urakng inyo molayati Kristus, samo sama'an boko imam molayati rajo. Kaitn nam umant husus umputn Allah, boko urakng inyo ado hubukan agatn Allah siku'. Allah momilih kaitn oca' kaitn ulih momboritoan mongona'i somuo porbuatan bosar inyo Sio labuhan, ia'an Sio inyo moningkau kaitn koluar doi' kogolapan, lalu mansu' ko dalapm torakng-Nyo inyo luar biaso. Samo sama'an inyo totulis di dalapm Buku Suci,

1 Petrus 3:4

Apo, bousaha pulah diri kaitn lobih boi' di dalapm hati, samo agatn hidup inyo lomah-lombut huatan tenang. Pomboi' ubo nian tahatn sampai somanahnyo huatan kotakng borogo di mato Allah.