Wahyu 4:4 - Porjanjian Boharu Torjomahan Baso Dilakng Soari-ari

⁴ Ado duo puluh ompat tahta bukainyo inyo mongoliliki tahta nantai. Duo puluh ompat pomimpitn dudu' di boko tahta nantai. Sia' bopakaian putih huatan tiap iku' ado mahkota omas di kopala'.

Wahyu 4:4 ပူးပေါင်းရင်းမြစ်များ

Matius 19:28

Kato Yesus ko sia', “Dinga'anbo ni'in: Timpu Allah bulah somuo hal monjadi boharu, Ana' Monsio paca'an dudu' di pucu' krosi-Nyo inyo tohormat pakai' momorintah di dunia boharu ni'in. Kaitn boko murid-Ku pan paca'an dudu' di pucu' duo bolas krosi ponguaso. Kaitn paca'an mohakipi koduo bolas suku banso Israel.

Lukas 22:30

Jadi, dalapm Koraja'an-Ku nantai, kaitn tajahan mooso rindakng huatan tohormat obai ulih makatn-minum sotanggaian sosamo agatn Aku. Kaitn siku'-monyiku' tajahan dudu' di tahta pakai' momorintah koduo bolas suku banso Israel.”

2 Timotius 4:8

Tuhatn udah monyiap'an hadiah inyo bondar ko aku. Sio nantai Hakipm inyo paca'an mohakipi somuo urakng agatn adil. Watu nantai, Sio paca'an moonji'i hadiah nantai pakai' aku huatan somuo urakng inyo rindu Sio datakng bobali' agi' ko dunia ni'in.

Wahyu 11:16

Koduo puluh ompat pomimpitn inyo dudu' di tahta sia' di hadapan Allah, sia' tundu' monyungkapan monyombah Allah.

Wahyu 14:3

Sia' monyanyian suatu nyanyian boharu di pohadapan tahta huatan koompat mahluk ongko boko pomimpitn nantai. Conyiant urakng bukai inyo ulih mompolajari nyanyian nantai kocuali soratus ompat puluh ompat ribu urakng nantai. Ia'an sia' inyo Yesus udah bebasan doi' bumi.

Wahyu 19:14

Somuo tontara sorugo tuyut Sio monunggakng kuda putih jam. Sia' momakai pakai'an doi' koitn lenan lombut inyo putih borosih.

Wahyu 19:4

Koduo puluh ompat pomimpitn huatan koompat mahluk nantai lansukng tundu' monyungkapan huatan monyombah Allah inyo dudu' di tahta nantai. Sia' bopandir, “Amin! Haleluya!”

Wahyu 2:10

Jangan gola' biar pan co manah agi' kaitn paca'an ajab sonsaro. Porotiancam, Rajo Sitatn paca'an moncubo mombulah sobagi'an doi' kaitn oca' co pocayo ko aku agi'. Kaitn paca'an ditikapan ko dalapm ponjara lalu didorako'i sopuluh ari manahnyo. Apo kaitn gola' sotia ko aku, biar pan sampai mati. Lalu, Aku paca'an moonji'i ko kaitn kohidupan kokal di sorugo.

Wahyu 20:4

Lalu, aku moniant boko tahta. Boko urakng inyo dudu' di pucu'nyo dionji'i kuaso pakai' mohakipi. Aku pan moniant boko jiwa sia' inyo diponggal kopala'nyo obai sia' bosasi mongona'i Yesus ongko momboritoan Pomandiran doi' Allah. Ia'an sia' inyo co monyombah bonatakng ongko lompatukng nantai, sia' inyo kinyo monorima' tando bonatakng nantai di koning huatan jarinyo. Sia' hidup agi' lalu momorintah sobagai rajo bosamo Kristus somanah soribu tohutn nantai.

Wahyu 3:18

Obai nantai, Aku momadahi kaitn oca' momboli omas doi' Aku, omas inyo udah dimurnian dalapm api. Kaitn gola' molabuhan nantai oca' kaitn bondar-bondar monjadi dampu. Bolicam pakai'an putih doi' Aku oca' kaitn bopakaian, oca' monutupi koadaan kaitn kolanjakng inyo bulah kaitn malu. Bolicam ubat pakai' dipalitan ko mato kaitn oca' kaitn ulih moniant.

Wahyu 4:10

koduo puluh ompat pomimpitn nantai tundu' monyungkapan di pohadapan Sio inyo dudu' di tahta nantai. Sia' monyombah Sio inyo hidup somanah-manahnyo. Sia' monikapan mahkota sia' di pohadapan tahta-Nyo kapikng bopandir,

Wahyu 4:6

Di pohadapan tahta nantai jam ado lou' sama'an lout kaco, putih torus sama'an kristal. Di sokolilikng tahta nantai, sotiap pinggirnyo, ado ompat mahluk. Sotiap mahluk nantai bomato banya', di pohadapan ongko bolikat.

Wahyu 5:11

Lalu, dalapm poniant'an nantai, aku mondinga' saro banya' molekat di sokolilikng tahta, boko mahluk, ongko boko pomimpitn nantai. Ado boribu-ribu molekat nantai, malahan jutaan.

Wahyu 5:14

Koompat mahluk nantai bopandir, “Amin!” Boko pomimpitn nantai pan tundu' monyungkapan ongko monyombah.

Wahyu 5:6

Lalu, aku moniant siku' Ana' Domba inyo kotiat'annyo samo sama'an udah disombolih. Sio bodiritn di tongah-tongah tahta, koompat mahluk, ongko koduo puluh ompat pomimpitn nantai. Sio ado tujuh tandu' ongko tujuh mato. Nantai ia'an tujuh Roh Allah inyo diutus ko soluruh dunia.

Wahyu 5:8

Pas Sio monguti' gulukan buku nantai, koompat mahluk ongko koduo puluh ompat pomimpitn nantai lansukng tundu' monyungkapan di hadapan Ana' Domba nantai. Sia' siku'-monyiku' monjujut kocapi. Somuo sia' pan ado cangkir omas inyo boisi komonyan. Nantaiam somuo doa urakng inyo pocayo.

Wahyu 6:11

Boko urakng inyo dibunuh siku'-monyiku' dionji'i jubah putih. Sia' diboritohu pakai' torahat agatn sabar sotogal agi'. Obai ija' ado boko somadikan inyo molayati Yesus inyo paca'an dibunuh, samo sama'an sia'. Sia' gola' monanti sampai jumlah urakng nantai udah diponuhi.

Wahyu 7:11

Somuo molekat bodiritn mongoliliki tahta, koompat mahluk, ongko boko pomimpitn nantai. Somuo molekat nantai tundu' monyungkapan di pohadapan tahta nantai, monyombah Allah.

Wahyu 7:9

Lopas nantai aku moniant, ih, ado kumpulan urakng inyo kotakan banya', kinyo tohitukng jumlahnyo. Sia' doi' sotiap banso, sotiap suku, sotiap negara, sotiap baso. Sia' bodiritn di hadapan tahta ongko di hadapan Ana' Domba. Sia' momakai jubah putih ongko monjujut boko dahatn kayu palem di jari sia'.

Wahyu 9:7

Rupo boko bunta' nantai sama'an boko kuda inyo udah siap pakai' boparakng. Sia' ado lou' sama'an mahkota omas di pucu' kopala' sia'. Mato muho sia' samo sama'an mato-muho monsio.