Wahyu 3:18 - Porjanjian Boharu Torjomahan Baso Dilakng Soari-ari

¹⁸ Obai nantai, Aku momadahi kaitn oca' momboli omas doi' Aku, omas inyo udah dimurnian dalapm api. Kaitn gola' molabuhan nantai oca' kaitn bondar-bondar monjadi dampu. Bolicam pakai'an putih doi' Aku oca' kaitn bopakaian, oca' monutupi koadaan kaitn kolanjakng inyo bulah kaitn malu. Bolicam ubat pakai' dipalitan ko mato kaitn oca' kaitn ulih moniant.

Wahyu 3:18 ပူးပေါင်းရင်းမြစ်များ

Matius 13:44

“Koraja'an Sorugo samo sama'an kodampuan inyo kotakan mahal inyo topondapm di lakau. Ado urakng inyo monomuan kodampuan nantai. Sio kotakng sonang-asau. Obai nantai, io momondapmnyo agi', lalu botula' monjual somuo umputnnyo oca' io ulih momboli lakau nantai.

Matius 25:9

Apo boko botina' daro inyo pintar-corodi' nantai bopandir, ‘Koi co ulih bobagi agatn kaitn! Gola' kinyo cukup. Jadi momboli cam ko urakng ponjual minya'.’

Lukas 12:21

Lopas nian Yesus monyimpulan, “Nianam inyo tajahan tojadi agatn somuo urakng inyo mongumpulan kodampuan pakai' dirinyo siku', apo kinyo molabuhan la'apo inyo monyonangan Allah.”

2 Korintus 5:3

Aman kito mati, kito co monjadi roh inyo kinyo bobukakng-tubuh. Kito mondapat'an bukakng-tubuh kito inyo boharu.

2 Korintus 8:9

Kaitn pan mongotohu'i obai Tuhatn kito, Yesus Kristus, monunju'an koboi'an-Nyo ko kaitn. Ia'an nantai, Sio moninggalan kodampuan-Nyo di sorugo lalu monjadi jaro. Sio monjadi jaro oca' kaitn ulih monjadi dampu agatn banya' borokat doi' Allah.

1 Timotius 6:18

Poringant'ancam sia' oca' sia' bulah koboi'an. Sia' gola' banya' molabuhan porbuatan boi'. Sia' gola' onsi' agatn urakng, hala bobagi doi' kodampuan sia' pakai' monulukng urakng bukai.

Yakobus 2:5

Boko somadikan inyo ku kasihi! Dinga'anbo ni'in! Allah momilih boko urakng jaro di dunia pakai' monjadi urakng inyo bondar-bondar konal agatn Sio. Obai sia' pocayo ko Yesus, jadi sia' monjadi ahli waris Koraja'an Allah. Nantaiam kodampuan inyo Allah janjian ko somuo urakng inyo mongasihi Sio.

1 Petrus 1:7

Tujuan doi' somuo kosusahan nantai ia'an pakai' mombutian aman kaitn bondar-bondar pocayo ko Tuhatn kata'an cadoai. Kopocaya'an kaitn nantai lobih borogo daripado omas. Biar pan kinyo tahatn somanahnyo, omas pan diuji agatn api pakai' mombutian aman omas nian murni kata'an cado. Jadi, kopocaya'an kaitn pan diuji jam. Agatn ubo nantai, aman kaitn bobondar pocayo, nononyo kaitn tajahannyo dipuji, dimuliaan, ongko dihormati, nantai tajahannyo tojadi watu Yesus Kristus datakng agi' monyatoan diri-Nyo.

Wahyu 16:15

Boko roh jahat mongumpulan sia' di sobuah tompat. Dalapm baso Ibrani tompat nantai disobut Harmagedon. Apo Tuhatn bopandir, “Pondinga'ancam! Aku datakng samo sama'an urakng pongolit. Sonang-nyamancam urakng inyo hala siap huatan borotian pakai'annyo, oca' io co bojalatn agatn kolanjakng lalu monjadi malu di muka' umum.”

Wahyu 19:8

Pongantitn-Nyo dionji'i pakai'an doi' koitn lenan lombut, inyo putih borosih ongko mongkilap!” Koitn lenan nantai monggambaran boko porbuatan boi' inyo dilabuhan boko urakng umant umputn Allah.

Wahyu 2:9

Aku tohu obai kaitn didorako'i obai pocayo ko Aku. Aku tohu obai kaitn jaro, apo ingant cam obai sobondarnyo kaitn dampu! Aku tohu obai kaitn dipojahat ulih boko urakng inyo monyobut dirinyo urakng Yahudi. Apo sobondarnyo sia' bukainyo anggota umant Allah. Sia' anggota umant Rajo Sitatn!

Wahyu 3:17

Kaitn bopandir, ‘Koi cukup dampu. Koi udah mongumpulan banya' kodampuan. Koi conyiant ado kokurakan la'apo pan.’ Apo kaitn co sadar obai sobondarnyo socaro rohani kaitn conyiant ado aponyo. Kaitn molarat, sonsaro, jaro, buto, kolanjakng!

Wahyu 4:4

Ado duo puluh ompat tahta bukainyo inyo mongoliliki tahta nantai. Duo puluh ompat pomimpitn dudu' di boko tahta nantai. Sia' bopakaian putih huatan tiap iku' ado mahkota omas di kopala'.

Wahyu 7:13

Lalu, siku' urakng doi' boko pomimpitn nantai bopandir ko aku, “Sopo kironyo sia' inyo momakai jubah putih nantai? Doi' mono kiro sia' datakng?”