Wahyu 21:2 - Porjanjian Boharu Torjomahan Baso Dilakng Soari-ari

² Aku pan moniant kota inyo kudus, ia'an Yerusalem inyo boharu. Kota nantai turutn doi' sorugo, doi' Allah. Kota nantai boi' bondar samo sama'an pongantitn botina' inyo borias siap bosandikng agatn pongantitn lolaki.

Wahyu 21:2 ပူးပေါင်းရင်းမြစ်များ

Yohanes 3:29

Pongantitn botina' ia'an umputn pongantitn lolaki. Kawal pongantitn lolaki nantai bayo bodiritn mondampiki huatan mondinga'an, huatan io sonang aman mondinga'an saro pongantitn lolaki. Sama'an nian jam agatn aku. Watu ni'in aku sonang bondar.

2 Korintus 11:2

Osonyo aku ngomburu aman sampai kaitn tuyut urakng bukai. Apo porasa'an ngomburu nantai doi' Allah. Obai, aku honda' kaitn tuyut Kristus ja'am. Kaitn samo sama'an daro inyo udah ku potunangan agatn siku' lolaki, ia'an Kristus. Aku honda' oca' kaitn suci di hadapan-Nyo.

Ibrani 11:10

Abrahapm hidup sama'an nantai obai io monanti-nantian sobuah kota agatn dasar inyo kuat, ia'an kota inyo dironcanaan ongko dipulah ulih Allah siku'.

Ibrani 11:16

Apo sobondarnyo, sia' togonangan nogori inyo lobih boi', ia'an nantai sorugo. Obai nantai, Allah kinyo malu disobut Allah sia' obai Sio udah monyiap'an sobuah kota pakai' sia'.

Ibrani 12:22

Apo kaitn udah datakng ko Bukit Sion, ko kota Allah inyo hidup, ia'an kota Yerusalem inyo ado di sorugo. Kaitn datakng mohadapi boribu-ribu molekat.

Ibrani 13:14

Obai di dunia ni'in kito conyiant kota tompat tinggal inyo somanah-manahnyo. Kito monanti-nantian kodiapan inyo tajahan datakng.

Wahyu 1:1

Yesus Kristus monyatoan mongona'i boko kojadian inyo paca'an tojadi. Allah momboritoan ko Yesus pakai' monyatoannyo ko boko urakng inyo molayati Sio. Yesus Kristus moutus molekat-Nyo pakai' monyatoan ko Yohanes, hulutn-Nyo.

Wahyu 1:4

Ko kotujuh jomaat di doerah Asia. Doi' aku, Yohanes. Aku bodoa oca' kaitn monorima' koboi'an ongko sonang-asau doi' Allah, inyo ado watu ni'in, inyo udah ado doi' joman komai, huatan inyo ado sotorusnyo. Ongko doi' kotujuh roh inyo ado di hadapan tahta-Nyo.

Wahyu 1:9

Aku, Yohanes, somadikan kaitn inyo sonasib agatn kaitn, inyo bosamo ajab sonsaro agatn warga Koraja'an Allah, huatan bosamo botahatn mohadapi ajab sonsaro kapikng monantian Yesus. Aku udah momboritoan Pomandiran doi' Allah ongko boko hal inyo Yesus padahan ko aku. Obai nantaiam, aku dibuakan ko sobuah pulau inyo bodamoan Patmos.

Wahyu 11:2

Apo jangan moukur tongahlamanan Rumah Allah inyo di sopia' luar. Obai, tongahlamanan nantai udah dionju' ko boko banso bukai. Sia' paca'an monguaso'i Kota Inyo Suci nantai somanah ompat puluh duo bulatn.

Wahyu 21:10

Jadi, Roh Allah monguaso'iku lalu molekat nantai mombaba' aku ko pucu' gunung inyo bosar huatan kotakan tinggi. Sio monunju'an ko aku kota inyo kudus nantai, ia'an Yerusalem inyo boharu. Kota nantai turutn doi' sorugo, doi' Allah.

Wahyu 21:9

Lopas nian, ado salah siku' doi' kotujuh molekat inyo monjujut mangku' inyo bisi agatn kotujuh malopotako toahir nantai. Sio datakng ko aku, lalu bopandir, “Mara! Aku paca'an monunju'an ko kolai Pongantitn Botina', bini Ana' Domba.”

Wahyu 22:17

Roh Allah huatan Pongantitn botina' bopandir, “Hincapm, datakngcam!” Oca' somuo urakng inyo mondinga'nyo nantai bopandir, “Hincapm, datakngcam!” Oca' somuo urakng inyo korahakan, somuo urakng inyo honda' minum, datakng jam. Sia' ulih monguti' modas ara'i inyo moonji'i kohidupan.

Wahyu 22:19

Ubo nian jam aman ado urakng inyo monguraki suti' pan boko posatn doi' Allah dalapm buku ni'in. Jadi, Allah paca'an monguti' doi' io somuo borokat inyo totulis dalapm buku ni'in. Ia'an nantai Allah paca'an monguti' haknyo pakai' bopua' doi' kayu inyo moonji'i kohidupan. Io culih diapm di dalapm kota kudus nantai.”

Wahyu 3:12

Boko urakng inyo monang, Aku paca'an bulah sia' monjadi boko tihakng dalapm Rumah Allah-Ku. Sia' paca'an bodiapm di su'utan soumur hidupnyo. Aku pan paca'an monulis damo Allah-Ku dibukakng sia', damo kota Allah-Ku, ia'an nantai kota Yerusalem boharu inyo turutn doi' sorugo doi' Allah-Ku. Aku pan paca'an monulis damo-Ku inyo boharu di bukakng sia'.