Wahyu 20:4 - Porjanjian Boharu Torjomahan Baso Dilakng Soari-ari

⁴ Lalu, aku moniant boko tahta. Boko urakng inyo dudu' di pucu'nyo dionji'i kuaso pakai' mohakipi. Aku pan moniant boko jiwa sia' inyo diponggal kopala'nyo obai sia' bosasi mongona'i Yesus ongko momboritoan Pomandiran doi' Allah. Ia'an sia' inyo co monyombah bonatakng ongko lompatukng nantai, sia' inyo kinyo monorima' tando bonatakng nantai di koning huatan jarinyo. Sia' hidup agi' lalu momorintah sobagai rajo bosamo Kristus somanah soribu tohutn nantai.

Wahyu 20:4 ပူးပေါင်းရင်းမြစ်များ

Matius 19:28

Kato Yesus ko sia', “Dinga'anbo ni'in: Timpu Allah bulah somuo hal monjadi boharu, Ana' Monsio paca'an dudu' di pucu' krosi-Nyo inyo tohormat pakai' momorintah di dunia boharu ni'in. Kaitn boko murid-Ku pan paca'an dudu' di pucu' duo bolas krosi ponguaso. Kaitn paca'an mohakipi koduo bolas suku banso Israel.

Wahyu 6:9

Lopas nian, Ana' Domba nantai mombuka' segel kolima'. Watu nantai, aku moniant banya' jiwa di babah mesbahAllah. Boko jiwa nantai ia'an boko urakng inyo udah dibunuh obai sia' momboritoan Pomandiran doi' Allah huatan obai sia' bosasi mongona'i Yesus.

Wahyu 3:21

Boko urakng inyo monang, Aku paca'an moijitan sia' dudu' di tahta-Ku bosamo agatn Aku. Samo sama'an Aku siku' udah monang lalu dudu' di tahta Bopai-Ku momorintah bosamo agatn Sio.

Wahyu 20:6

Sonang-nyaman boko urakng inyo bobali' hidup agi' watu tahap potamo ni'in. Sia' nianam boko urakng inyo husus umputn Allah. Sia' kinyo paca'an moalapi komatian koduo kalinyo, ia'an mati somanah-manahnyo. Apo sia' paca'an monjadi boko imam inyo molayati Allah ongko Kristus. Sia' paca'an momorintah bosamo Sio somanah soribu tohutn nantai.

Lukas 22:30

Jadi, dalapm Koraja'an-Ku nantai, kaitn tajahan mooso rindakng huatan tohormat obai ulih makatn-minum sotanggaian sosamo agatn Aku. Kaitn siku'-monyiku' tajahan dudu' di tahta pakai' momorintah koduo bolas suku banso Israel.”

Wahyu 22:5

Conyiant malapm agi' di siatn tai. Sia' co momontikan cohayo doi' lampu damo matoari, obai Tuhatn Allah siku'mo paca'an monoraki sia'. Sia' paca'an momorintah ubo rajo sampai somanah-manahnyo.

Wahyu 12:11

Boko somadikan kito udah mongalahannyo agatn darah Ana' Domba nantai, huatan agatn borito inyo bondar doi' Allah inyo sia' boritoan. Sia' sanggup mongurbatan diri sia' sampai mati.

Wahyu 1:9

Aku, Yohanes, somadikan kaitn inyo sonasib agatn kaitn, inyo bosamo ajab sonsaro agatn warga Koraja'an Allah, huatan bosamo botahatn mohadapi ajab sonsaro kapikng monantian Yesus. Aku udah momboritoan Pomandiran doi' Allah ongko boko hal inyo Yesus padahan ko aku. Obai nantaiam, aku dibuakan ko sobuah pulau inyo bodamoan Patmos.

Roma 8:17

Nah, aman kito ni'in poana'an-Nyo, jadi kito pan tajahan monorima' somuo borokat inyo Sio sodia'an pakai' poana'an-Nyo. Samo sama'an Kristus mondapat'an borokat doi' Allah, kito pan tajahan mondapat'an borokat. Masudnyo, aman kito mondorita' samo sama'an Kristus, kito tajahan monorima' kohidupan inyo mulia samo sama'an Sio jam.

Wahyu 15:2

Lalu aku moniant lou' sama'an loutan kaco bocampur api. Aku moniant jam boko urakng inyo udah monang doi' bonatakng huatan patukngnyo ongko monang doi' urakng inyo damonyo dilambakan agatn angka'. Boko urakng nantai bodiritn di pinggir loutan kaco nantai. Sia' siku'-monyiku' ado kocapi inyo dionju' Allah ko sia'.

Wahyu 14:11

Ansap doi' api inyo monyonsaro'i sia' nantai paca'an noi' ko pucu' somanah-manahnyo. Sia' disiksa siakng-malapm kinyo botongga'-boronti. Sama'an nianam ajab sonsaro inyo paca'an tojadi pakai' sia' inyo monyombah bonatakng huatan lompatukngnyo nantai, boko urakng inyo monorima' tando damo bonatakng nantai.”

Wahyu 11:7

Lopas sia' jadi monyampaian posatn doi' Allah, paca'an ado bonatakng inyo monjongal doi' Jurakng Maut. Bonatakng nantai paca'an monyorakng sia', mongalahan sia', lopasnyo mombunuh sia'.

Yohanes 14:19

Co manah agi', boko urakng di dunia kinyo paca'an moniant Aku agi'. Apo kaitn paca'an moniant Aku. Obai Aku hidup, rotinyo kaitn paca'an hidup jam.

Wahyu 17:8

Bonatakng nantai inyo udah kolai tiat, io komainyo ado, apo watu ni'in conyiantam. Apo nononyo io paca'an ado agi' doi' Jurakng Maut. Boko urakng inyo bodiapm di bumi, ia'an somuo urakng inyo ado doi' mulo dunia dipulah damonyo kinyo totulis dalapm Buku Kohidupan, sia' paca'an hiratn moniant obai bonatakng nantai kalo ado, lalu hilakng, ongko koluar agi'. Apo lopas nantai, io paca'an dibonasoan somanah-manahnyo.

Wahyu 11:15

Lopas nian, molekat inyo kotujuh moniup trompetnyo. Watu nantai, ado boko saro borakng di sorugo bopandir, “Koraja'an di dunia ni'in udah dikuaso'i Tuhatn Allah huatan Rajo Inyo Dijanjian-Nyo, ia'an Kristus. Sio paca'an momorintah somanah-manahnyo!”

Wahyu 11:11

Apo lopas tigo ari sotongah, Allah bulah koduo nabi nantai bobali' hidup agatn kosih-Nyo. Sia' huas bodiritn. Somuo urakng inyo moniant sia' monjadi kotakng gola'.

Wahyu 11:3

Apo, paca'an ado duo urakng inyo bosasi mongona'i Aku. Sia' duo paca'an momakai pakai'an bulikng. Aku paca'an moonji'i kuaso ko sia' pakai' monyampaian posatn doi' Aku somanah soribu duo ratus onam puluh ari.”

Roma 11:15

Watu Allah monula' banso Yahudi, boko urakng bukai di dunia ado kosompatan pakai' monjadi damai agatn Allah. Jadi, watu Sio monorima' banso Yahudi bobali' agi', pasti nantai tajahan samo sama'an sia' mati apo monjadi bobali' hidup agi'.

Lukas 1:17

Io paca'an ado sipat ongko kuaso samaꞌan Nabi Elia komai. Io paca'an datakng sobolupm kodatakan Tuhatn. Io paca'an mongomboi'i hubukan antaro urakng tuho agatn ana'nyo. Urakng inyo kinyo taat paca'an dipimpitnnyo ko jalatn inyo bondar, oca' monjadi taat agatn porintah Allah. Jadi ubo nian jam, io paca'an momposiapan hati boko urakng inyo siap hidup agatn caro inyo sosuai agatn kohonda' Tuhatn. Oca' siaꞌ udah siap pakai' monorima' Tuhatn.”

Markus 9:11

Lalu, sia' botakutn ko Yesus, “Hibo boko guru agama Yahudi momandiran obai nabi Elia gola' holu datakng sobolupm Rajo inyo Dijanjian Allah nantai datakng?”

Markus 6:27

Io lansukng monyiuh projurit pakai' momonggal kopala' Yohanes. Lalu, projurit nantai momonggal kopala' Yohanes di ponjara,

Markus 6:16

Apo timpu Rajo Herodes mondinga' nantai, io bopandir, “Pasti Sio nam Yohanes Pombaptis inyo udah ku siuh oca' kopala'nyo diponggal komai. Watu ni'in, io udah hidup agi'!”

Matius 24:10

Banya' urakng paca'an kinyo pocayo agi' ko Tuhatn. Sia' paca'an hala bonci' huatan hala mohianati.

Wahyu 1:2

Dalapm buku ni'in Yohanes monulis mongona'i Pomandiran Allah huatan mongona'i boko hal inyo Yesus Kristus nyatoan ko io, ia'an boko la'apo inyo Yohanes tiat dalapm poniant'an nantai.

Wahyu 2:26

Ko boko urakng inyo monang, boko urakng inyo molabuhan kohonda'-Ku sampai ahir dunia, Aku paca'an moonju' ko sia' kuaso di pucu' boko banso.

Wahyu 4:4

Ado duo puluh ompat tahta bukainyo inyo mongoliliki tahta nantai. Duo puluh ompat pomimpitn dudu' di boko tahta nantai. Sia' bopakaian putih huatan tiap iku' ado mahkota omas di kopala'.

Wahyu 7:3

Katonyo, “Jangan morusa' bumi damo lout damo boko kayu. Tanti holu'ai sampai koi monando'i koning boko urakng inyo molayati Allah kito.”