Wahyu 2:10 - Porjanjian Boharu Torjomahan Baso Dilakng Soari-ari

¹⁰ Jangan gola' biar pan co manah agi' kaitn paca'an ajab sonsaro. Porotiancam, Rajo Sitatn paca'an moncubo mombulah sobagi'an doi' kaitn oca' co pocayo ko aku agi'. Kaitn paca'an ditikapan ko dalapm ponjara lalu didorako'i sopuluh ari manahnyo. Apo kaitn gola' sotia ko aku, biar pan sampai mati. Lalu, Aku paca'an moonji'i ko kaitn kohidupan kokal di sorugo.

Wahyu 2:10 ပူးပေါင်းရင်းမြစ်များ

Matius 10:22

Somuo urakng paca'an mombonci' kaitn obai kaitn tuyut Aku. Apo sotiap urakng inyo totap pocayo ko Aku sampai koponsuahannyo, sia' paca'an disolamant'an.

Matius 10:28

Jangan gola' agatn sia' inyo bayo ulih mombunuh kaitn. Sia' kinyo bokuaso mombunuh jiwa kaitn. Apo kaitn harus gola' agatn Allah. Obai, Sio bokuaso mombonasoan jiwa ongko bukakng-tubuh kaitn di dalapm noraka!

Matius 24:13

Apo boko urakng inyo totap botahatn sotia ko Aku sampai ahir, sia' paca'an disolamant'an.

Markus 13:13

Somuo monsio tajahan bonci' agatn kaitn obai kaitn nantai murid-Ku. Apo somuo urakng inyo totap botahatn, sotia koAku, sampai ahirnyo, sia' tajahan disolamant'an.”

Markus 8:35

Obai, sopo aja' inyo bousaha koras mompotahatan kosihnyo paca'an kohilakan kosihnyo. Apo sopo aja' inyo kohilakan kosihnyo obai monjadi pongikut-Ku ongko obai momboritoan Kabar Boi', io paca'an monyalamant'annyo.

Lukas 21:12

Apo, sobolupm somuo nantai tojadi, kaitn paca'an ditangkap ongko didorako'i obai kaitn nantai murid-Ku. Kaitn paca'an diadili di boko rumah sombayakng ongko ditamoan ko dalapm ponjara. Kaitn tajahan dibaba' ko boko rajo huatan ko boko ponguaso pakai' diadili jam.

Yohanes 12:25

Urakng inyo moutamoan kohidupannyo siku', sobondarnyo io co paca'an mondapat'annyo. Apo urakng inyo kinyo moutamoan kohidupannyo siku' di dunia ni'in, io paca'an mongombolonyo pakai' hidup inyo kokal.

Yohanes 13:2

Jadi, watu nantai Yesus agatn boko murid-Nyo tongahan makatn malapm. (Sobolupm nantai, Rajo Sitatn udah bokorojo di dalapm hati Yudas Iskariot, ana' Simon. Rajo Sitatn mombulah oca' Yudas honda' monyorahan Yesus ko boko musuh-Nyo.)

Yohanes 13:27

Lopas Yudas monorima' roti nantai, Rajo Sitatn mansu' ko dalapm hatinyo. Lalu Yesus bopandir ko Yudas, “Labuhan copat cam hal apo inyo honda' kolai labuhan!”

Kisah Boko Rasul 20:24

Apo aku co poduli. Biar pan aku dibunuh, aku totap co poduli. Tuhatn Yesus udah moonji'i tugas ko aku pakai' momboritoan Kabar Boi' obai Allah udah monyatoan koboi'an-Nyo ko monsio. Aku gola' monyolosaian tugasku nantai. Nianam inyo pontikng, bukainyo hidup aku.

Kisah Boko Rasul 21:13

Apo Paulus monimbas, “Jangan kaitn monangis, obai nantai bulah hatiku salu'! Aku udah siap ditangkap di Yerusalem. Malahan, aku udah siap mati sobagai murid Tuhatn Yesus.”

1 Korintus 9:25

Ubo nian jam, somuo urakng inyo tuyut dalapm potandikan gola' mongondalian diri dalapm somuo hal pakai' bolatih koras. Sia' molabuhan nantai pakai' mondapat'an hadiah. Hadiah sia' kinyo tahatn manah. Apo kito inyo pocayo mongondalian diri dalapm somuo hal oca' bodapat hadiah inyo kinyo paca'an rusa' somanah-manahnyo.

Efesus 2:2

Watu nantai, caro hidup kaitn samo sama'an boko urakng di dunia ni'in inyo kinyo mongonal Allah. Kaitn tuyut Rajo Sitatn inyo bokuaso di langit di pucu' somuo kuaso jahat. Io ia'an roh inyo bokorojo dalapm hati boko urakng inyo kinyo monaati Allah.

Efesus 6:12

Obai kito boparakng bukatnnyo molawatn monsio apo molawatn somuo macapm kuaso golap di dunia ni'in, huatan molawatn somuo boko roh jahat di awakng-awakng.

Yakobus 1:12

Allah momborokati urakng inyo botahatn mohadapi poncoba'an. Aman io botahatn, lalu Allah paca'an moonji'i io kohidupan somanah-manahnyo di sorugo. Nianam upah inyo Allah udah janjian ko somuo urakng inyo mongasihi Sio.

1 Petrus 5:4

Lalu, watu Kristus datakng, ia'an Gombala inyo moirikan somuo gombala, jadi kaitn paca'an mondapat'an mahkota inyo mulia. Mahkota nantai kinyo hilakng komulia'annyo.

1 Petrus 5:8

Apo kaitn gola' hala mongondalian diri kaitn, huatan hala bojojago. Rajo Sitatn nan musuh kaitn. Sitatn honda' mohancuran kopocaya'an kaitn. Sitatn nan samo sama'an singa inyo mondorah, bojalatn kolilikng-kolimbat bogoyap urakng inyo ulih ditolatnnyo.

Wahyu 13:14

Io mombulah boko tando nantai di pohadapan mato bonatakng inyo potamo. Agatn boko tando nantai, io monyosat'an boko urakng inyo bodiapm di bumi. Io monyiuh sia' pakai' moninjakan lompatukng dalapm rupo bonatakng inyo potamo, bonatakng inyo udah diluko'i podakng apo hidup.

Wahyu 13:2

Bonatakng inyo ku tiat nantai mirip agatn macatn tutul, apo kakinyo sama'an kaki boruakng. Nyaonyo sama'an nyao singa. Nago nantai moonji'i ko bonatakng nantai kokuatannyo, hak pakai' momorintah, agatn kokuasa'annyo inyo bosar.

Wahyu 13:7

Bonatakng nantai dionji'i jamijitn pakai' boparakng molawatn boko urakng inyo pocayo, lalu mongalahan sia'. Io dionji'i jam kuaso atas sotiap suku, sotiap negara, sotiap baso, sotiap banso.

Wahyu 17:14

Sia' paca'an boparakng molawatn Ana' Domba. Apo Ana' Domba paca'an mongalahan sia', obai Sionam Tuhatn inyo bokuaso dipucu' boko tuhatn, Rajo di pucu' somuo rajo bukai. Boko urakng inyo bosamo agatn Ana' Domba paca'an monang, ia'an sia' inyo ditingkau, inyo dipilih, inyo sotia ko Sio.”

Wahyu 2:13

Aku tohu obai kota kaitn ia'an tompat tahta Rajo Sitatn. Apo kaitn totap sotia ko aku. Somadikan Antipas momboritoan mongona'i Aku agatn sotia. Sio dibunuh di kota kaitn, ia'an nantai kota tompat kodiapan Rajo Sitatn. Biar pan ubo nantai, watu nantai kaitn totap moaku'i obai kaitn pocayo ko Aku.

Wahyu 2:9

Aku tohu obai kaitn didorako'i obai pocayo ko Aku. Aku tohu obai kaitn jaro, apo ingant cam obai sobondarnyo kaitn dampu! Aku tohu obai kaitn dipojahat ulih boko urakng inyo monyobut dirinyo urakng Yahudi. Apo sobondarnyo sia' bukainyo anggota umant Allah. Sia' anggota umant Rajo Sitatn!