Wahyu 17:8 - Porjanjian Boharu Torjomahan Baso Dilakng Soari-ari

⁸ Bonatakng nantai inyo udah kolai tiat, io komainyo ado, apo watu ni'in conyiantam. Apo nononyo io paca'an ado agi' doi' Jurakng Maut. Boko urakng inyo bodiapm di bumi, ia'an somuo urakng inyo ado doi' mulo dunia dipulah damonyo kinyo totulis dalapm Buku Kohidupan, sia' paca'an hiratn moniant obai bonatakng nantai kalo ado, lalu hilakng, ongko koluar agi'. Apo lopas nantai, io paca'an dibonasoan somanah-manahnyo.

Wahyu 17:8 ပူးပေါင်းရင်းမြစ်များ

Matius 25:34

Lalu, sobagai Rajo, Sio paca'an bopandir ko boko urakng di sopia' kanannyo, ‘Maracam, kaitn inyo diborokati ulih Bopai-Ku! Mansu'cam ko dalapm Koraja'an inyo disodiaan pakai' kaitn tangga'i dunia dipulah.

Lukas 10:20

Apo lobih boi' jangan sangant rindakng obai boko roh jahat monaati kaitn. Ado alasan inyo lobih pontikng pakai' rindakng nantai obai damo kaitn udah totulis di sorugo.”

Lukas 8:31

Boko roh jahat nantai momuhun ko Yesus oca' co monundukng sia' ko dalapm Noraka.

Yohanes 17:24

Oi Bopai, mongona'i somuo murid inyo udah Duatn onju' ko aku, kohonda' Ku oca' sia' bosamo agatn Aku, di mono kodiapan-Ku nononyo. Agatn ubo nantai, sia' ulih moniant obai Duatn mombulah Ku monjadi mulia, obai Duatn mongasihi Aku sobolupm dunia ni'in dipulah.

Kisah Boko Rasul 15:18

Tangga'i joman komai, Aku udah momadahan somuonyo ni'in.”

Efesus 1:4

Obai, sobolupm Allah mombulah dunia ni'in, Sio udah momilih kito monjadi umat-Nyo dalapm Kristus. Tujuan-Nyo oca' kito monjadi borosih, co bodosa di hadapan-Nyo.

1 Petrus 1:20

Allah udah momilih Sio sobolupm dunia dipulah. Apo, hoyu' ari toahir ni'in, Kristus udah datakng monyatoan diri-Nyo. Sio molabuhan nantai pakai' kaitn.

Wahyu 11:7

Lopas sia' jadi monyampaian posatn doi' Allah, paca'an ado bonatakng inyo monjongal doi' Jurakng Maut. Bonatakng nantai paca'an monyorakng sia', mongalahan sia', lopasnyo mombunuh sia'.

Wahyu 17:11

Bonatakng nantai inyo kalo ado huatan hilakng, ionam salah siku' doi' kotujuh rajo nantai. Io jam paca'an koluar agi' sobagai rajo inyo kodolapatn. Apo io paca'an dibonasoan.

Wahyu 17:2

Boko rajo di dunia udah bulah dosa pomporajoan agatn io. Huatan boko urakng di bumi komabu'an obai minum anggur pomporajoan.”

Wahyu 20:10

Rajo Sitatn inyo monipu sia' nantai, paca'an ditikapan ko dalapm loutan api ongko bolerang, tompat bonatakng ongko nabi palsu nantai. Sia' somuo paca'an disiksa siakng-malapm pakai' somanah-manahnyo.

Wahyu 20:12

Aku moniant boko urakng mati bodiritn di pohadapan tahta nantai, ia'an boko urakng inyo pontikng ongko inyo kinyo pontikng. Boko buku dibuka' ongko buku inyo bukai, ia'an Buku Kohidupan pan dibuka'. Somuo urakng mati nantai dihakipi sosuai agatn tulisan inyo ado di dalapm boko buku nantai, ia'an somuo porbuatan sia' siku'-monyiku'.

Wahyu 3:10

Kaitn udah monaati porintah-Ku pakai' botahatn dalapm mohadapi ajab sonsaro. Obai niannam, Aku paca'an molinduki kaitn doi' masa kosusahan inyo paca'an monimpa soluruh dunia. Hal nantai tojadi pakai' mouji somuo monsio inyo bodiapm di bumi.

Wahyu 3:5

Boko urakng inyo monang paca'an dikona'an pakai'an putih samo sama'an nantai. Aku co paca'an mohapus damo sia' doi' Buku Kohidupan. Aku paca'an moaku'i obai sia' nam umputn-Ku di hadapan Bopai-Ku ongko boko molekat-Nyo.