Wahyu 14:13 - Porjanjian Boharu Torjomahan Baso Dilakng Soari-ari

¹³ Lalu aku mondinga' saro doi' sorugo bopandir ko aku. Katonyo, “Tuliscam pomandiran ni'in: Mula'i watu ni'in, diborokatiam boko urakng inyo mati dalapm koadaan sotia pocayo ko Tuhatn Yesus.” Roh Allah pan sotuju. Kato-Nyo, “Au, bondar nantai. Sia' mati oca' sia' ulih torahat doi' jorih-uyuh pokoroja'an sia'. Sia' diborokati obai somuo porbuatan boi' sia' mombulah sia' cucu' mondapat'an upah di sorugo.”

Wahyu 14:13 ပူးပေါင်းရင်းမြစ်များ

Matius 3:17

Lalu todinga' saro Allah doi' sorugo mongatoan, “Ninam Ana'-Ku inyo Ku kasihi. Io monyonangan hati-Ku.”

Lukas 16:25

Apo Abrahapm bopandir, ‘Ana'ku, ingant watu di dunia, kolai monorima' hidup inyo boonsu'an apo Lazarus monorima' hidup inyo ajab sonsaro. Ni'in, io sonang apo kolai ajab sonsaro.

Lukas 16:9

Dinga'anbo ni'in: Soharusnyo kaitn momakai kodampuan di dunia ni'in pakai' monulukng urakng bukai, oca' watu kodampuan nantai kinyo boguno agi', kaitn ditorima' dalapm sorugo.

Roma 14:8

Apo, aman kito hidup, kito hidup pakai' Tuhatn. Aman kito mati, kito mati pakai' Tuhatn. Jadi, aman kito hidup damo mati, kito ia'an umputn Tuhatn.

1 Korintus 15:18

Ubo nian jam agatn boko urakng pocayo ko Kristus inyo udah mati. Sia' udah bonaso.

1 Korintus 15:20

Apo sobondarnyo Allah udah bulah Kristus monjadi urakng potamo inyo dihidupan agi' doi' komatian.

1 Korintus 15:58

Jadi, boko somadikan inyo aku kasihi, totap pocayo ko Yesus agatn yakitn. Jangan goyah. Bokorojocam agatn rajitn pakai' Tuhatn. Obai, kaitn tohu obai somuo inyo kaitn korojoan pakai' Tuhatn ado kountukannyo.

2 Korintus 5:8

Apo hati koi totap kuat. Koi lobih sonang mati, moninggalan bukakng-tubuh ni'in, lalu hidup bosamo-samo Tuhatn di sorugo.

Filipi 2:17

Apo, aku tajahan totap sonang-nyamanam aman aku dibunuh. Obai, kaitn pocayo ko Kristus ongko hidup molayati-Nyo. Kaitn monjadi samo sama'an kurbatn posombahan ko Allah. Aman aku dibunuh, rotinyo darahku ditumpahan di pucu' posombahan kaitn nantai. Jadi, aku sonang-nyamanam ongko aku tuyut sonang-nyamanam jam agatn kaitn.

1 Tesalonika 4:14

Apo kito pocayo obai Yesus mati huatan udah bobali' hidup. Obai nantai, kito yakitn obai boko urakng pocayo ko Yesus inyo udah mati paca'an hidup agi' jam. Obai nantai, kito yakitn obai molalu'i Yesus, Allah paca'an mongumpulan boko urakng pocayo inyo udah mati bosamo-samo agatn Yesus.

1 Tesalonika 4:16

Nononyo, paca'an ado saro borakng inyo moonji'i porintah. Pomimpitn molekat paca'an mondorah. Trompet Allah paca'an bobunyi. Tuhatn Yesus paca'an turutn doi' sorugo. Watu nantai, urakng inyo pocayo ko Kristus inyo udah mati paca'an lobih doholu bobali' hidup.

1 Tesalonika 5:10

Sio udah mati pakai' monanggukng hukupan dosa kito. Pado watu Sio datakng agi', boi' kito ija' hidup damo pan udah mati, somuo kito inyo pocayo ko Sio paca'an hidup bosamo-samo agatn Sio.

Wahyu 1:11

Saro nantai bopandir, “Kolai gola' monulis somuo hal inyo paca'an ditiatan ko kolai. Lalu, kolai gola' mongiripm buku nantai ko kotujuh jomaat ni'inan: Efesus, Smirna, Pergamus, Tiatira, Sardis, Filadelfia, ongko Laodikia.”

Wahyu 10:4

Pas kotujuh guntur nantai bopandir, aku siap monulis pomandirannyo. Apo watu nantai, aku mondinga' ado bunyi saro doi' sorugo. Kato-nyo, “Jangan monulisan pomandiran kotujuh guntur nantai. Jangan monyatoan hal nantai!”

Wahyu 11:15

Lopas nian, molekat inyo kotujuh moniup trompetnyo. Watu nantai, ado boko saro borakng di sorugo bopandir, “Koraja'an di dunia ni'in udah dikuaso'i Tuhatn Allah huatan Rajo Inyo Dijanjian-Nyo, ia'an Kristus. Sio paca'an momorintah somanah-manahnyo!”

Wahyu 11:19

Lalu, tobuka'am Rumah Allah di sorugo. Poti Pojanjian Allah ulih ditiat di dalapm Rumah Allah nantai. Lalu, ado solitar, saro guntur inyo borakng, gompa bumi huatan hujatn es inyo lobat.

Wahyu 16:17

Molekat kotujuh monumpahan mangku'nyo ko awakng-awakng. Lalu ado saro borakng doi' dalapm Rumah Allah, doi' tahta nantai. Kato-Nyo, “Somuonyo udah jadiam!”

Wahyu 19:9

Lalu, molekat nantai bopandir ko aku, “Tuliscam ni'in: Bahagiacam boko urakng inyo dihundakng ko pogai kawitn Ana' Domba nantai.” Molekat nantai jam bopandir ko aku, “Nantaiam boko pomandiran inyo bondar doi' Allah!”

Wahyu 2:1

“Tuliscam pomandiran ni'in ko molekat inyo monjago jomaat di Efesus: Pomandiran ni'in doi' Sio, inyo monjujut kotujuh bintakng nantai di jari kanan-Nyo; doi' Sio inyo bojalatn di sapat kotujuh tihakng tompat molota'an pompolitoan nantai inyo dipulah doi' omas.

Wahyu 2:7

Sopo pan inyo ulih mondinga', kohonda'nyo io momporhatian somuo pomandiran Roh Allah ko boko jomaat. Ko boko urakng inyo monang, Aku paca'an moijitan sia' makatn doi' kayu inyo moonji'i kohidupan inyo ado di kobutn Allah.”

Wahyu 20:6

Sonang-nyaman boko urakng inyo bobali' hidup agi' watu tahap potamo ni'in. Sia' nianam boko urakng inyo husus umputn Allah. Sia' kinyo paca'an moalapi komatian koduo kalinyo, ia'an mati somanah-manahnyo. Apo sia' paca'an monjadi boko imam inyo molayati Allah ongko Kristus. Sia' paca'an momorintah bosamo Sio somanah soribu tohutn nantai.

Wahyu 21:5

Allah inyo dudu' di pucu' tahta nantai bopandir, “Tiatcam! Aku bulah somuo hal monjadi boharu!” Sio pan bopandir ko aku, “Tuliscam ni'inan, obai somuo pomandiran ni'in bondar huatan ulih dipocayo.”

Wahyu 22:17

Roh Allah huatan Pongantitn botina' bopandir, “Hincapm, datakngcam!” Oca' somuo urakng inyo mondinga'nyo nantai bopandir, “Hincapm, datakngcam!” Oca' somuo urakng inyo korahakan, somuo urakng inyo honda' minum, datakng jam. Sia' ulih monguti' modas ara'i inyo moonji'i kohidupan.

Wahyu 6:11

Boko urakng inyo dibunuh siku'-monyiku' dionji'i jubah putih. Sia' diboritohu pakai' torahat agatn sabar sotogal agi'. Obai ija' ado boko somadikan inyo molayati Yesus inyo paca'an dibunuh, samo sama'an sia'. Sia' gola' monanti sampai jumlah urakng nantai udah diponuhi.