Wahyu 13:8 - Porjanjian Boharu Torjomahan Baso Dilakng Soari-ari

⁸ Io paca'an disombah ulih somuo urakng inyo bodiapm di bumi, ia'an somuo urakng inyo doi' mulo dunia dipulah damonyo co totulis dalapm Buku Kohidupan. Buku nantai umputn Ana' Domba inyo udah disombolih.

Wahyu 13:8 ပူးပေါင်းရင်းမြစ်များ

Efesus 1:4

Obai, sobolupm Allah mombulah dunia ni'in, Sio udah momilih kito monjadi umat-Nyo dalapm Kristus. Tujuan-Nyo oca' kito monjadi borosih, co bodosa di hadapan-Nyo.

Matius 25:34

Lalu, sobagai Rajo, Sio paca'an bopandir ko boko urakng di sopia' kanannyo, ‘Maracam, kaitn inyo diborokati ulih Bopai-Ku! Mansu'cam ko dalapm Koraja'an inyo disodiaan pakai' kaitn tangga'i dunia dipulah.

Wahyu 17:8

Bonatakng nantai inyo udah kolai tiat, io komainyo ado, apo watu ni'in conyiantam. Apo nononyo io paca'an ado agi' doi' Jurakng Maut. Boko urakng inyo bodiapm di bumi, ia'an somuo urakng inyo ado doi' mulo dunia dipulah damonyo kinyo totulis dalapm Buku Kohidupan, sia' paca'an hiratn moniant obai bonatakng nantai kalo ado, lalu hilakng, ongko koluar agi'. Apo lopas nantai, io paca'an dibonasoan somanah-manahnyo.

Wahyu 3:5

Boko urakng inyo monang paca'an dikona'an pakai'an putih samo sama'an nantai. Aku co paca'an mohapus damo sia' doi' Buku Kohidupan. Aku paca'an moaku'i obai sia' nam umputn-Ku di hadapan Bopai-Ku ongko boko molekat-Nyo.

Wahyu 21:27

Apo somuo inyo campah culih dibaba' mansu' ko dalapm kota nantai. Ubo nian jam boko urakng inyo molabuhan kojahatan huatan tumbukan. Inyo ulih mansu' bayo sia' inyo damonyo totulis dalapm buku Ana' Domba nantai, ia'an Buku Kohidupan.

Wahyu 5:12

Sia' somuo bonyanyi agatn saro borakng, “Ana' Domba inyo disombolih nantai, Sio cucu' pakai' monorima' kuaso, kodampuan, hikmat, kokuatan. Sio cucu' dihormati, ditinggian, dipuji!”

Yohanes 1:29

Kohobu'annyo, Yohanes moniant Yesus datakng ko io. Yohanes bopandir, “Tiat! Numbo, Ana' Domba inyo diutus Allah oca' mohapus dosa dunia.

Lukas 10:20

Apo lobih boi' jangan sangant rindakng obai boko roh jahat monaati kaitn. Ado alasan inyo lobih pontikng pakai' rindakng nantai obai damo kaitn udah totulis di sorugo.”

Filipi 4:3

Ko Sunsugos, kawalku inyo sotia, aku minto oca' kolai monulukng duo urakng botina' nantai. Obai, sia' udah bogota' humpas-pulas bosamo agatn aku pakai' momboritoan Kabar Boi', samo sama'an Klemens ongko boko urakng bukai inyo bokorojo bosamo agatn aku. Somuo damo sia' ado dalapm Buku Kohidupan.

Wahyu 3:20

Porhatiancam! Aku bodiritn di pohadapan lawakng ongko mongetok. Aman ado urakng inyo mondinga'an saro-Ku, lalu mombuka' lawakngnyo, jadi Aku paca'an mansu' rumahnyo. Aku paca'an makatn bosamo-samo agatn io. Io paca'an makatn bosamo-samo agatn Aku.

Wahyu 3:10

Kaitn udah monaati porintah-Ku pakai' botahatn dalapm mohadapi ajab sonsaro. Obai niannam, Aku paca'an molinduki kaitn doi' masa kosusahan inyo paca'an monimpa soluruh dunia. Hal nantai tojadi pakai' mouji somuo monsio inyo bodiapm di bumi.

Wahyu 12:15

Lalu, nago nantai monyomburan ara'i doi' nyaonyo ko arah botina' nantai. Ara'inyo bosar sama'an ara'i pasakng. Nago nantai honda' oca' sungai nantai mohanyutan botina' nantai.

Wahyu 5:13

Lopas nian, aku mondinga' somuo mahluk di sorugo, di bumi, di babah bumi, di lout huatan somuo inyo ado di dalapmnyo, bonyanyi, “Pakai' Sio inyo dudu' di pucu' tahta ongko bagi Ana' Domba, puji, hormat, komulia'an ongko kuaso sampai somanah-manahnyo!”

Wahyu 6:1

Lopas nian, aku moniant Ana' Domba nantai mombuka' segel potamo doi' kotujuh segel nantai. Watu nantai, aku mondinga' salah siku' doi' koompat mahluk hidup nantai bopandir agatn saro borakng samo sama'an bunyi guntur solitar. Katonyo, “Hincapm!”

Wahyu 13:12

Io bodapat somuo kuaso doi' bonatakng inyo potamo huatan momakai kuasonyo nantai di pohadapan bonatakng inyo potamo nantai. Io mombulah somuo urakng di bumi pakai' monyombah bonatakng potamo, bonatakng nantai inyo udah nyamanam doi' luko parahnyo.