Wahyu 13:3 - Porjanjian Boharu Torjomahan Baso Dilakng Soari-ari

³ Suti' doi' kotujuh kopala' bonatakng nantai kotiat'annyo sama'an kalo kona' luko. Luko nantai cukup parah pakai' mombulah io mati, apo nyatonyo udah nyamanam. Jadi, somuo urakng di dunia hiratn, lalu tuyut bonatakng nantai.

Wahyu 13:3 ပူးပေါင်းရင်းမြစ်များ

Lukas 2:1

Timpu nantai Kaisar inyo bodamoan Agustus, rajo inyo kotakan bokuaso di Roma mongoluaran porintah, monyiuh mondaptaran boko urakng di soluruh korajaan-nyo.

Yohanes 12:19

Ongko boko pomimpitn agama Yahudi doi' kolompok Farisi, sia' bopandir siku'-monyiku', “Kito samo sokali kinyo ulih morarakng sia'. Porotianbo! Somuo urakng botula' tuyut Sio!”

Kisah Boko Rasul 8:13

Simon nantai pan pocayo ongko dibaptis. Lopas nantai, io hala tuyut Filipus. Io hala hiratn moniant Filipus molabuhan banya' macapm mujisat.

Wahyu 13:12

Io bodapat somuo kuaso doi' bonatakng inyo potamo huatan momakai kuasonyo nantai di pohadapan bonatakng inyo potamo nantai. Io mombulah somuo urakng di bumi pakai' monyombah bonatakng potamo, bonatakng nantai inyo udah nyamanam doi' luko parahnyo.

Wahyu 13:14

Io mombulah boko tando nantai di pohadapan mato bonatakng inyo potamo. Agatn boko tando nantai, io monyosat'an boko urakng inyo bodiapm di bumi. Io monyiuh sia' pakai' moninjakan lompatukng dalapm rupo bonatakng inyo potamo, bonatakng inyo udah diluko'i podakng apo hidup.

Wahyu 17:10

Kotujuh kopala' nantai pan monggambaran tujuh rajo: Lima' rajo udah jatu'. Siku' ija' momorintah sampai watu ni'in. Lalu, siku' agi' bolupm datakng. Watu rajo inyo kotujuh nantai datakng, io bayo paca'an momorintah sobontar mo.

Wahyu 17:11

Bonatakng nantai inyo kalo ado huatan hilakng, ionam salah siku' doi' kotujuh rajo nantai. Io jam paca'an koluar agi' sobagai rajo inyo kodolapatn. Apo io paca'an dibonasoan.

Wahyu 17:13

Kosopuluh rajo nantai paca'an bohoupm. Sia' somuonyo paca'an monyorahan kuaso ongko kokuatan sia' ko bonatakng nantai.

Wahyu 17:17

Apo somuo nantai tojadi obai Allah monggora'an hati sia' oca' sia' molabuhan nantai. Nantai sosuai agatn hajat Allah. Sio bulah sia' bosatu sopikiran pakai' monyorahan kuaso sia' ko bonatakng nantai. Bonatakng nantai paca'an bokuaso sampai somuonyo tojadi sosuai agatn Pomandiran Allah.

Wahyu 17:6

Aku moniant botina' nantai komabu'an obai minum darah boko urakng kudus, ia'an boko urakng inyo dibunuh obai sia' momboritoan mongona'i Yesus. Pas aku moniant botina' nantai, aku kotakan hiratn.

Wahyu 17:8

Bonatakng nantai inyo udah kolai tiat, io komainyo ado, apo watu ni'in conyiantam. Apo nononyo io paca'an ado agi' doi' Jurakng Maut. Boko urakng inyo bodiapm di bumi, ia'an somuo urakng inyo ado doi' mulo dunia dipulah damonyo kinyo totulis dalapm Buku Kohidupan, sia' paca'an hiratn moniant obai bonatakng nantai kalo ado, lalu hilakng, ongko koluar agi'. Apo lopas nantai, io paca'an dibonasoan somanah-manahnyo.