Wahyu 13:14 - Porjanjian Boharu Torjomahan Baso Dilakng Soari-ari

¹⁴ Io mombulah boko tando nantai di pohadapan mato bonatakng inyo potamo. Agatn boko tando nantai, io monyosat'an boko urakng inyo bodiapm di bumi. Io monyiuh sia' pakai' moninjakan lompatukng dalapm rupo bonatakng inyo potamo, bonatakng inyo udah diluko'i podakng apo hidup.

Wahyu 13:14 ပူးပေါင်းရင်းမြစ်များ

2 Tesalonika 2:4

Apo sobolupm io dibonasoan, io paca'an molawatn somuo hal inyo monsio anggap sobagai allah huatan somuo hal inyo disombah monsio. Io paca'an momandiran obai io lobih bokuaso doi' somuo allah nantai. Malahan, io paca'an mansu' ko dalapm Rumah Allah. Io paca'an dudu' di santai ongko moaku'i obai io nantai Allah.

Wahyu 12:9

(Nago bosar nantai ia'an ular inyo monipu doi' joman komai. Io jam disobut Si Iblis damo Rajo Sitatn. Io inyo monipu somuo urakng di dunia.) Io ditikapan ko bumi bososamo agatn somuo molekatnyo.

Wahyu 13:1

Lopas nian, aku moniant siku' bonatakng koluar doi' dalapm lout. Io botandu' sopuluh huatan bokopala' tujuh. Di sotiap tandu'nyo ado mahkota kocit. Di sotiap kopala'nyo totulis boko damo inyo mohanyam Allah.

Wahyu 13:15

Io pan dionji'i kuaso pakai' mombulah lompatukng nantai monjadi hidup. Jadi, lompatukng bonatakng nantai suba' bopandir huatan mombunuh somuo urakng inyo co monyombahnyo.

Wahyu 13:8

Io paca'an disombah ulih somuo urakng inyo bodiapm di bumi, ia'an somuo urakng inyo doi' mulo dunia dipulah damonyo co totulis dalapm Buku Kohidupan. Buku nantai umputn Ana' Domba inyo udah disombolih.

Wahyu 14:11

Ansap doi' api inyo monyonsaro'i sia' nantai paca'an noi' ko pucu' somanah-manahnyo. Sia' disiksa siakng-malapm kinyo botongga'-boronti. Sama'an nianam ajab sonsaro inyo paca'an tojadi pakai' sia' inyo monyombah bonatakng huatan lompatukngnyo nantai, boko urakng inyo monorima' tando damo bonatakng nantai.”

Wahyu 14:9

Lalu, ado molekat agi' inyo mombodapan koduo molekat sobolupmnyo. Molekat kotigo nantai bopandir agatn saro borakng. Katonyo, “Somuo urakng inyo monyombah bonatakng huatan lompatukngnyo nantai, inyo monorima' tando bonatakng nantai di koning huatan longannyo,

Wahyu 15:2

Lalu aku moniant lou' sama'an loutan kaco bocampur api. Aku moniant jam boko urakng inyo udah monang doi' bonatakng huatan patukngnyo ongko monang doi' urakng inyo damonyo dilambakan agatn angka'. Boko urakng nantai bodiritn di pinggir loutan kaco nantai. Sia' siku'-monyiku' ado kocapi inyo dionju' Allah ko sia'.

Wahyu 16:13

Lalu aku moniant tigo roh jahat inyo monyorupo'i gonjau. Siku' koluar doi' nyao nago, siku' doi' nyao bonatakng potamo, huatan siku' doi' nyao nabi palsu nantai.

Wahyu 16:2

Jadi, molekat potamo botula' monumpahan mangku'nyo ko pucu' bumi. Lalu, somuo urakng inyo ado tando bonatakng nantai, boko urakng inyo monyombah patukngnyo, somuo sia' hontapm boko bongka' inyo kotakng buru' huatan podih.

Wahyu 18:23

Randai pompolitoan co paca'an borandai agi' di dalapm kolai. Saro rindakng-ramai doi' mompelai lolaki ongko pongantitn botina' co paca'an kodinga'an agi' di dalapm kolai. Obai boko podagakng kolai ia'an boko urakng pontikng di dunia. Kolai jam monipu somuo banso agatn ilmu sihir kolai.”

Wahyu 19:20

Bonatakng nantai ditangkap bosamo-samo agatn nabi palsu nantai, ia'an io inyo bulah boko mujisat nantai di hadapan mato bonatakng nantai. Agatn boko mujisat nantai, io monipu boko urakng inyo ado tando bonatakng nantai, boko urakng inyo monyombah lompatukng bonatakng nantai. Jadi, bonatakng huatan nabi palsu nantai dibuakan hidup-hidup ko dalapm loutan api inyo tongahan bonyalo agatn bolerang.

Wahyu 2:10

Jangan gola' biar pan co manah agi' kaitn paca'an ajab sonsaro. Porotiancam, Rajo Sitatn paca'an moncubo mombulah sobagi'an doi' kaitn oca' co pocayo ko aku agi'. Kaitn paca'an ditikapan ko dalapm ponjara lalu didorako'i sopuluh ari manahnyo. Apo kaitn gola' sotia ko aku, biar pan sampai mati. Lalu, Aku paca'an moonji'i ko kaitn kohidupan kokal di sorugo.

Wahyu 20:10

Rajo Sitatn inyo monipu sia' nantai, paca'an ditikapan ko dalapm loutan api ongko bolerang, tompat bonatakng ongko nabi palsu nantai. Sia' somuo paca'an disiksa siakng-malapm pakai' somanah-manahnyo.

Wahyu 3:10

Kaitn udah monaati porintah-Ku pakai' botahatn dalapm mohadapi ajab sonsaro. Obai niannam, Aku paca'an molinduki kaitn doi' masa kosusahan inyo paca'an monimpa soluruh dunia. Hal nantai tojadi pakai' mouji somuo monsio inyo bodiapm di bumi.