Wahyu 12:9 - Porjanjian Boharu Torjomahan Baso Dilakng Soari-ari

⁹ (Nago bosar nantai ia'an ular inyo monipu doi' joman komai. Io jam disobut Si Iblis damo Rajo Sitatn. Io inyo monipu somuo urakng di dunia.) Io ditikapan ko bumi bososamo agatn somuo molekatnyo.

Wahyu 12:9 ပူးပေါင်းရင်းမြစ်များ

Matius 13:39

Musuh inyo moabur bonih solalakng nantai monggambaran Rajo Sitatn. Watu bohanyi nantai monggambaran ahir joman. Ongko boko urakng bohanyi nantai monggambaran boko molekat.

Matius 24:24

Obai paca'an ado boko urakng datakng inyo mongaku' obai dirinyo nianam Rajo Inyo Dijanjian Allah. Apo sia' co bondar. Paca'an ado boko nabi palsu jam. Boko rajo palsu huatan boko nabi palsu nantai paca'an bulah bomacapm mujisat jam. Tujuan sia' oca' monyosat'an somuo urakng, huatan soandainyo mungkitn tomansu' boko urakng inyo dipilih Allah jam.

Matius 25:41

Lopas nian, Rajo nantai paca'an bopandir ko boko urakng di sopia' kiba'nyo, ‘Hingkascam doi' pohadapan-Ku, kaitn inyo dihukupm! Mansu' cam ko dalapm api inyo co kalo buta' ia'an nantai tompat inyo udah disiapan pakai' Rajo Sitatn huatan boko molekatnyo.

Matius 4:1

Lopas nantai, Roh Allah moirikan Yesus ko padakng pasir inyo langunt oca' dicubo'i Rajo Sitatn.

Matius 4:10

Apo Yesus bopandir ko io, “Oi Sitatn, jouhancam diri kolai doi' Aku! Obai, ado pomandiran Allah inyo ditulis dalapm Buku Suci, Sombahcam Tuhatn Allah kolai. Layati Sio ja'am.”

Matius 4:5

Lopas nantai Rajo Sitatn moirikan Yesus ko kota Yerusalem inyo suci nantai. Io monyiuh Yesus bodiritn di tompat inyo kotakan tinggi di pucu' hatap Rumah Allah.

Matius 4:8

Lopas nian Rajo Sitatn moirikan Yesus botula' ko pucu' bukit inyo kotakan tinggi. Rajo Sitatn monunju'an ko Sio somuo koraja'an di dunia agatn somuo kodampuannyo.

Lukas 10:18

Lalu kato Yesus ko sia', “Aku udah moniant Rajo Sitatn jatu' doi' langit sama'an kilat.

Lukas 13:16

Apo botina' ni'in koturutan Abrahapm banso inyo diborokati Allah. Huatan roh jahat, Rajo Sitatn udah bulah io sonsaro dolapatn bolas tohutn manahnyo. Io pasti jouh lobih dirogo'i Allah daripado sapi damo koledai. Cucu'am io dinyamani doi' sonsaro ponyakitnyo, biar pan ni'in Ari Sabat.”

Lukas 22:3

Lopas nian Rajo Sitatn momansu'i hati Yudas inyo disobut Iskariot, ia'an siku' urakng doi' koduo bolas rasul Yesus.

Lukas 22:31

Lopas nian Yesus bopandir ko Simon Petrus, “Simon, Simon! Dinga'anbo! Rajo Sitatn udah monuntut ko Allah oca' molalu'i kosusahan io ulih monyongkayoan rasul inyo sotia doi' inyo kinyo sotia, samo samaꞌan potani monyongkayoan gandupm doi' kopunyo. Allah udah moijitan Rajo Sitatn molabuhan hal nantai.

Lukas 8:12

Bonih inyo jatu' di jalatn nantai ubo boko urakng inyo monorima' pomandiran Allah. Apo lopas nian datakng Iblis, bulah sia' tongkolupatn agatn pomandiran Allah. Sampai hati sia' kinyo pocayo. Jadi sia' kinyo disolamant'an.

Yohanes 12:31

Watu ni'in udah gonapam watunyo dunia ni'in dihakipi. Watu ni'in jam, io inyo monguaso'i dunia ni'in, ia'an Rajo Sitatn, paca'an dikalahan.

Yohanes 14:30

Aku kinyo paca'an banya' bopandir agi' ko kaitn, obai io inyo monguaso'i dunia ni'in, ia'an Rajo Sitatn, tongahan datakng. Io kinyo bokuaso tohadap Aku,

Yohanes 16:11

Sio paca'an bulah sia' sadar mongona'i hukupan doi' Allah obai Rajo Sitatn inyo monguaso'i dunia ni'in udah dihukupam.

Yohanes 8:44

Kaitn ninam boko poana'an Rajo Sitatn! Io nam bopai kaitn nan. Kaitn honda' monuruti kohonda' bopai kaitn nantai. Doi' mulonyo io nam pombunuh. Io co kalo ado hubukan agatn boko hal inyo bondar obai conyiant ado inyo bondar di dalapm dirinyo. Pas io bulah kotumbukan, nantai wajar, obai sipatnyo ongkah bulah kotumbukan nam. Sio nianam bopai boko tumbukan.

Kisah Boko Rasul 26:18

Kolai paca'an monulukng sia' oca' mongoroti jadi sia' co hidup dalapm kopocaya'an inyo salah, apo bobali' pocayo inyo bondar. Kolai paca'an monulukng sia' oca' mongoroti jadi sia' kinyo hidup dibabah kuaso Iblis agi', apo bobali' ongko hidup di babah kuaso Allah. Agatn ubo nian, aman sia' pocayo agatn Aku, ongko boko dosa sia' paca'an diamputi. Sia' mondapat tompat di antaro umant Allah.’ Nanam pomandiran Yesus ko Aku.

Kisah Boko Rasul 5:3

Apo Petrus bopandir, “Ananias, kolai udah mombiaran Rajo Sitatn monguaso'i hati kolai! Kolai moncubo monipu Roh Allah. Kolai tumbukan mongona'i hasil monjual tanah kolai inyo sobondarnyo. Kolai monyimpatn sobagi'an pakai' diri kolai siku'.

Roma 16:18

Obai, boko urakng inyo molabuhan ubo nantai sobondarnyo co bokorojo molayati Kristus, Tuhatn kito. Sia' bayo honda' mongosihan kohonda' sia' siku'. Sia' momuji-muji agatn pomandiran inyo manis pakai' monipu urakng inyo co tohu tujuan sia' inyo jahat.

Roma 16:20

Allah inyo moonji'i sonang-nyamanam tajahan copat molonyapan kuaso Rajo Sitatn inyo molawatn kaitn. Aku bodoa oca' Yesus, Tuhatn kito, hala monunju'an kasih-Nyo ko kaitn.

2 Korintus 11:14

Hal nantai co mohiratan. Obai, Rajo Sitatn pan borubah ruponyo oca' bulah monsio bopikir io nam molekat torakng doi' Allah.

2 Korintus 11:3

Apo aku gola' kaitn paca'an ditipu, samo sama'an joman komai Hawa ditipu ular inyo licik nantai, ia'an Rajo Sitatn. Aman ubo nian, kaitn paca'an monjadi sosat huatan kinyo bobondar sotia ko Kristus.

2 Korintus 12:7

Tuhatn co honda' aku monjadi buhau obai boko poniant'an inyo luar biaso nantai. Nantaiam sobabnyo, aku dionji'i somacapm ponyakit sama'an duri di dalapm isiku. Ponyakit nantai ia'an alat Rajo Sitatn inyo mohontapmku oca' aku co monjadi buhau.

2 Korintus 2:11

Kito gola' moamputi oca' Rajo Sitatn kinyo mongacauan kito, obai kito tohu boko hajatnyo.

2 Korintus 4:4

ia'an boko urakng inyo kinyo honda' pocayo. Rajo Sitatn, inyo monguaso'i dunia ni'in, udah bulah sia' co mongoroti. Io bulah mato hati sia' monjadi buto oca' sia' co moniant cohayo, ia'an Kabar Boi' mongona'i Kristus inyo mulia, Kristus inyo nianam samo agatn rupo Allah.

Efesus 4:14

bukainyo sama'an boko bobia' agi' inyo mudah ditipu agatn somuo macapm ajaran inyo salah. Kito kinyo pocayo ko boko urakng licik nantai inyo honda' mombulah urakng monjadi sosat.

2 Tesalonika 2:3

Jangan kaitn pocayo huatan sampai disosatan ulih sopo pan agatn caro la'apo pan. Obai, sobolupm Yesus datakng, paca'an ado watunyo di mono banya' urakng monula' Allah. Ongko, Siku' urakng Rajo inyo jahat paca'an datakng. Yesus paca'an mombonasoan io.

1 Timotius 2:14

Solaitn nantai, bukainyo Adapm inyo ditipu ular. Hawa mo inyo ditipu sampai io bulah dosa.

2 Timotius 3:13

Sodakan boko urakng jahat huatan boko urakng inyo hala tumbukan, sia' paca'an mongkitn jahat. Sia' monyosat'an urakng bukai. Urakng bukai pan monyosat'an sia'.

Ibrani 2:14

Yesus monyobut'an boko urakng inyo pocayo ko Sio sobagai poana'an. Sia' ado bukakng-tubuh monsio inyo ulih mati, jadi Yesus monjadi monsio huatan moalapi koadaan samo sama'an sia'. Sio molabuhan nantai oca' watu Sio mati, Sio ulih mohancuran Rajo Sitatn. Rajo Sitatn bokuaso mombulah monsio mati.

1 Petrus 5:8

Apo kaitn gola' hala mongondalian diri kaitn, huatan hala bojojago. Rajo Sitatn nan musuh kaitn. Sitatn honda' mohancuran kopocaya'an kaitn. Sitatn nan samo sama'an singa inyo mondorah, bojalatn kolilikng-kolimbat bogoyap urakng inyo ulih ditolatnnyo.

1 Yohanes 5:19

Kito tohu obai kito boasal doi' Allah. Apo somuo urakng di dunia sia' ado di babah kuaso Rajo Sitatn inyo jahat.

Yudas 1:9

Mikhael ia'an pomimpitn molekat, apo io siku' kinyo mohayam sama'an sia'. Timpu, sio botikakng mulut agatn Rajo Sitatn mongona'i bangkai Musa, Mikhael kinyo bopikir io ado kuaso pakai' mohukupm Rajo Sitatn agatn mohayamnyo. Sobali'nyo, io bopandir, “Kironyo Tuhatn siku' paca'an mohukupm kolai!”

Wahyu 12:12

Obai nantai, sonang-asau cam sorugo huatan kaitn bodiapm di dalapmnyo! Apo bonasoam kaitn di bumi huatan lout! Obai Rajo Sitatn udah turutn ko kaitn. Io kotakan godi obai io tohu co manah agi' io kinyo paca'an bokuaso di dunia.”

Wahyu 12:3

Lalu ado tando bukai inyo kotiat'an di langit: Wah, ado siku' nago mirah inyo bosar bondar. Nago nantai bokopala' tujuh huatan botandu' sopuluh. Di sotiap kopala'nyo ado mahkota kocit.

Wahyu 12:7

Lopas nian, ado poparakan di sorugo. Molekat Mikhael huatan boko molekat inyo bosamo agatn io boparakng molawatn nago nantai. Nago nantai huatan somuo molekat inyo bosamo io boparakng molawatn Mikhael huatan boko molekatnyo.

Wahyu 12:8

Apo nago nantai dikalahan! Nago huatan boko molekatnyo culih bodiapm di sorugo agi'.

Wahyu 13:14

Io mombulah boko tando nantai di pohadapan mato bonatakng inyo potamo. Agatn boko tando nantai, io monyosat'an boko urakng inyo bodiapm di bumi. Io monyiuh sia' pakai' moninjakan lompatukng dalapm rupo bonatakng inyo potamo, bonatakng inyo udah diluko'i podakng apo hidup.

Wahyu 16:14

Sia' ia'an kotigo roh jahat nantai inyo mombulah boko bomacapm tando ajaib. Sia' botula' mongumpulan somuo rajo di somuo dunia pakai' boparakng watu Ari Bosar, ia'an Ari Allah Inyo Maho Kuaso mongalahan somuo la'apo pan inyo molawatn Sio.

Wahyu 18:2

Molekat nantai mondongkakng-mondorah agatn saro kotakng borakng. Katonyo, “Kota Babel udah rontap! Kota bosar nantai udah rontap! Kota nantai udah monjadi sayakng pakai' boko roh jahat, tompat pontapuan boko roh campah tompat pontapuan somuo burukng campah huatan kobonci' urakng.

Wahyu 18:23

Randai pompolitoan co paca'an borandai agi' di dalapm kolai. Saro rindakng-ramai doi' mompelai lolaki ongko pongantitn botina' co paca'an kodinga'an agi' di dalapm kolai. Obai boko podagakng kolai ia'an boko urakng pontikng di dunia. Kolai jam monipu somuo banso agatn ilmu sihir kolai.”

Wahyu 19:20

Bonatakng nantai ditangkap bosamo-samo agatn nabi palsu nantai, ia'an io inyo bulah boko mujisat nantai di hadapan mato bonatakng nantai. Agatn boko mujisat nantai, io monipu boko urakng inyo ado tando bonatakng nantai, boko urakng inyo monyombah lompatukng bonatakng nantai. Jadi, bonatakng huatan nabi palsu nantai dibuakan hidup-hidup ko dalapm loutan api inyo tongahan bonyalo agatn bolerang.

Wahyu 2:13

Aku tohu obai kota kaitn ia'an tompat tahta Rajo Sitatn. Apo kaitn totap sotia ko aku. Somadikan Antipas momboritoan mongona'i Aku agatn sotia. Sio dibunuh di kota kaitn, ia'an nantai kota tompat kodiapan Rajo Sitatn. Biar pan ubo nantai, watu nantai kaitn totap moaku'i obai kaitn pocayo ko Aku.

Wahyu 2:24

Apo ko boko urakng bukai di Tiatira, kaitn inyo co tuyut ajaran jahat nantai, kaitn inyo monula' ajaran nantai inyo disobut pongotohuan doi' Rajo Sitatn, ko kaitn Aku bopandir: Aku cuku paca'an monambahi bobatn bukainyo ko kolai.

Wahyu 2:9

Aku tohu obai kaitn didorako'i obai pocayo ko Aku. Aku tohu obai kaitn jaro, apo ingant cam obai sobondarnyo kaitn dampu! Aku tohu obai kaitn dipojahat ulih boko urakng inyo monyobut dirinyo urakng Yahudi. Apo sobondarnyo sia' bukainyo anggota umant Allah. Sia' anggota umant Rajo Sitatn!

Wahyu 20:10

Rajo Sitatn inyo monipu sia' nantai, paca'an ditikapan ko dalapm loutan api ongko bolerang, tompat bonatakng ongko nabi palsu nantai. Sia' somuo paca'an disiksa siakng-malapm pakai' somanah-manahnyo.

Wahyu 20:8

Io paca'an botula' ko soluruh dunia, monipu boko banso, ia'an Gog huatan Magog. Rajo Sitatn mongumpulan sia' pakai' boparakng molawatn boko urakng inyo pocayo. Jumlah sia' kotakan banya' sama'an pasir di lout.

Wahyu 3:9

Porhatiancam! Boko urakng nantai doi' umant Rajo Sitatn, sia' monyobut dirinyo urakng Yahudi. Apo sobondarnyo sia' bukainyo anggota umant Allah. Sia' tumbukan! Aku paca'an bulah sia' datakng tundu' monyungkapan di pohadapan kaki kaitn. Lalu, sia' paca'an tohu obai Aku mongasihi kaitn.

Wahyu 9:1

Lopas nantai, molekat inyo kolima' moniup trompetnyo. Pas nian, aku moniant sobuah bintakng jatu' doi' langit ko bumi. Bintakng nantai dionji'i kunci Jurakng Maut.

Wahyu 9:20

Apo boko urakng bukai, inyo co mati ulih boncana nantai, sia' totap co honda' botongga' monyombah boko lompatukng inyo sia' pulah agatn jarinyo sikuꞌ. Sia' totap monyombah boko roh jahat huatan boko berhala inyo dipulah doi' omas, pira', tombago, batu, kayu; ia'an boko berhala inyo co ulih moniant huatan mondinga' huatan bojalatn.