Wahyu 12:11 - Porjanjian Boharu Torjomahan Baso Dilakng Soari-ari

¹¹ Boko somadikan kito udah mongalahannyo agatn darah Ana' Domba nantai, huatan agatn borito inyo bondar doi' Allah inyo sia' boritoan. Sia' sanggup mongurbatan diri sia' sampai mati.

Wahyu 12:11 ပူးပေါင်းရင်းမြစ်များ

Yohanes 16:33

Aku momadahan somuonyo nantai ko kaitn oca' hati kaitn ado sonang-asau obai kaitn bosatu agatn Aku. Kaitn paca'an mondorita' di dunia ni'in. Apo, pontokuhancam hati kaitn! Aku udah mongalahan kuaso di dunia ni'in!”

1 Yohanes 5:5

Sopo pan inyo ulih mongalahan dunia? Ongkah urakng inyo pocayo am obai Yesus nam Ana' Allah.

1 Korintus 15:57

Apo bosukurcam ko Allah obai dosa kinyo mongalahan kito agatn caro nantai. Allah bulah kito monang obai Yesus Kristus, Tuhatn inyo bokuaso di pucu' kito.

Wahyu 2:26

Ko boko urakng inyo monang, boko urakng inyo molabuhan kohonda'-Ku sampai ahir dunia, Aku paca'an moonju' ko sia' kuaso di pucu' boko banso.

Roma 16:20

Allah inyo moonji'i sonang-nyamanam tajahan copat molonyapan kuaso Rajo Sitatn inyo molawatn kaitn. Aku bodoa oca' Yesus, Tuhatn kito, hala monunju'an kasih-Nyo ko kaitn.

Kisah Boko Rasul 20:24

Apo aku co poduli. Biar pan aku dibunuh, aku totap co poduli. Tuhatn Yesus udah moonji'i tugas ko aku pakai' momboritoan Kabar Boi' obai Allah udah monyatoan koboi'an-Nyo ko monsio. Aku gola' monyolosaian tugasku nantai. Nianam inyo pontikng, bukainyo hidup aku.

1 Yohanes 4:4

Apo, boko poana'anku, kaitn boasal doi' Allah. Kaitn udah mongalahan boko nabi palsu nantai. Obai, Roh Allah inyo ado di dalapm diri kaitn lobih bokuaso daripado roh Musuh Kristus inyo ado di dalapm dunia.

Wahyu 3:5

Boko urakng inyo monang paca'an dikona'an pakai'an putih samo sama'an nantai. Aku co paca'an mohapus damo sia' doi' Buku Kohidupan. Aku paca'an moaku'i obai sia' nam umputn-Ku di hadapan Bopai-Ku ongko boko molekat-Nyo.

Wahyu 3:21

Boko urakng inyo monang, Aku paca'an moijitan sia' dudu' di tahta-Ku bosamo agatn Aku. Samo sama'an Aku siku' udah monang lalu dudu' di tahta Bopai-Ku momorintah bosamo agatn Sio.

Wahyu 3:12

Boko urakng inyo monang, Aku paca'an bulah sia' monjadi boko tihakng dalapm Rumah Allah-Ku. Sia' paca'an bodiapm di su'utan soumur hidupnyo. Aku pan paca'an monulis damo Allah-Ku dibukakng sia', damo kota Allah-Ku, ia'an nantai kota Yerusalem boharu inyo turutn doi' sorugo doi' Allah-Ku. Aku pan paca'an monulis damo-Ku inyo boharu di bukakng sia'.

Wahyu 2:7

Sopo pan inyo ulih mondinga', kohonda'nyo io momporhatian somuo pomandiran Roh Allah ko boko jomaat. Ko boko urakng inyo monang, Aku paca'an moijitan sia' makatn doi' kayu inyo moonji'i kohidupan inyo ado di kobutn Allah.”

Wahyu 20:4

Lalu, aku moniant boko tahta. Boko urakng inyo dudu' di pucu'nyo dionji'i kuaso pakai' mohakipi. Aku pan moniant boko jiwa sia' inyo diponggal kopala'nyo obai sia' bosasi mongona'i Yesus ongko momboritoan Pomandiran doi' Allah. Ia'an sia' inyo co monyombah bonatakng ongko lompatukng nantai, sia' inyo kinyo monorima' tando bonatakng nantai di koning huatan jarinyo. Sia' hidup agi' lalu momorintah sobagai rajo bosamo Kristus somanah soribu tohutn nantai.

Lukas 14:26

“Sotiap urakng inyo honda' tuyut Aku culih monjadi murid-Ku aman io lobih mongasihi urakng bukai daripado Aku, ia'an mongasihi indai, Bopai, bini, ana', somadikan apotolagi' dirinyo siku'.

Wahyu 11:7

Lopas sia' jadi monyampaian posatn doi' Allah, paca'an ado bonatakng inyo monjongal doi' Jurakng Maut. Bonatakng nantai paca'an monyorakng sia', mongalahan sia', lopasnyo mombunuh sia'.

Wahyu 1:2

Dalapm buku ni'in Yohanes monulis mongona'i Pomandiran Allah huatan mongona'i boko hal inyo Yesus Kristus nyatoan ko io, ia'an boko la'apo inyo Yohanes tiat dalapm poniant'an nantai.

Kisah Boko Rasul 21:13

Apo Paulus monimbas, “Jangan kaitn monangis, obai nantai bulah hatiku salu'! Aku udah siap ditangkap di Yerusalem. Malahan, aku udah siap mati sobagai murid Tuhatn Yesus.”

Wahyu 19:10

Aku lansukng tokorobah tokosungkapm di pohadapan kaki io pakai' monyombah io. Apo io bopandir ko aku, “Jangan monyombah aku! Aku bayo hulutn inyo molayati Allah, samo sama'an kolai huatan boko somadikan kolai, ia'an boko urakng inyo pocayo ko somuo inyo Yesus ajaran. Sombah Allah aja'am. Obai somuo inyo Yesus ajaran nianam pomandiran doi' Roh Allah.”

Wahyu 6:9

Lopas nian, Ana' Domba nantai mombuka' segel kolima'. Watu nantai, aku moniant banya' jiwa di babah mesbahAllah. Boko jiwa nantai ia'an boko urakng inyo udah dibunuh obai sia' momboritoan Pomandiran doi' Allah huatan obai sia' bosasi mongona'i Yesus.

Wahyu 2:17

Sopo pan inyo ulih mondinga', kohonda'nyo io momporhatian somuo pomandiran Roh Allah ko boko jomaat. Ko boko urakng inyo monang, Aku paca'an moonju' doi' pomakatn bodamoan manna inyo kinyo kotohuan di mono tompatnyo. Aku pan paca'an moonji'i sobuah batu putih ko sia' siku'-monyiku'. Di batu nantai totulis damo boharu, inyo kinyo dikotohu'i urakng bukai. Bayo urakng inyo monorima' batu nantaiam paca'an mongotohu'i damo nantai.”

Wahyu 2:13

Aku tohu obai kota kaitn ia'an tompat tahta Rajo Sitatn. Apo kaitn totap sotia ko aku. Somadikan Antipas momboritoan mongona'i Aku agatn sotia. Sio dibunuh di kota kaitn, ia'an nantai kota tompat kodiapan Rajo Sitatn. Biar pan ubo nantai, watu nantai kaitn totap moaku'i obai kaitn pocayo ko Aku.

Wahyu 1:9

Aku, Yohanes, somadikan kaitn inyo sonasib agatn kaitn, inyo bosamo ajab sonsaro agatn warga Koraja'an Allah, huatan bosamo botahatn mohadapi ajab sonsaro kapikng monantian Yesus. Aku udah momboritoan Pomandiran doi' Allah ongko boko hal inyo Yesus padahan ko aku. Obai nantaiam, aku dibuakan ko sobuah pulau inyo bodamoan Patmos.

Wahyu 12:17

Ongko, nago nantai monjadi kotakng godi ko botina' nantai. Io botula' boparakng molawatn koturutannyo inyo bukai, ia'an sia' inyo monaati boko porintah Allah huatan pocayo agatn kuat ko somuo inyo Yesus pandiran.