Wahyu 1:1 - Porjanjian Boharu Torjomahan Baso Dilakng Soari-ari

¹ Yesus Kristus monyatoan mongona'i boko kojadian inyo paca'an tojadi. Allah momboritoan ko Yesus pakai' monyatoannyo ko boko urakng inyo molayati Sio. Yesus Kristus moutus molekat-Nyo pakai' monyatoan ko Yohanes, hulutn-Nyo.

Wahyu 1:1 ပူးပေါင်းရင်းမြစ်များ

Yohanes 12:49

Obai Aku kinyo monyampaian pomandiran doi' kohonda'-Ku siku', apo doi' kohonda' Allah Bopai inyo moutus Aku. Sionam inyo moonji'i porintah ko aku, pomandiran inyo gola' Ku sampaian.

Yohanes 15:15

Aku co ija' monyobut kaitn ‘hulutn’. Obai, hulutn co tohu la'apo inyo dikorojoan habakngnyo. Apo, Aku monyobut kaitn ‘kawal’. Obai, Aku udah momadahannyo ko kaitn boko la'apo pan inyo Kudinga' doi' Bopai-Ku.

Yohanes 17:8

Obai, Aku udah momadahannyo ko sia' somuo pomandiran inyo Duatn onju' ko aku. Lalu, sia' monorima' pomandiran Duatn nantai. Sia' tohu obai Aku bondar-bondar datakng doi' Duatn. Sia' pocayo obai Duatnnam inyo moutus Aku.

Yohanes 3:32

Sio momadahan mongona'i somuo inyo Sio tiat huatan Sio dinga'. Apo, conyiant ado urakng inyo pocayo agatn pomandiran-Nyo.

Yohanes 8:26

Ija' ado banya' hal mongona'i kaitn inyo honda' Ku padahan huatan inyo honda' Ku hakipi. Apo, Aku ongkah monyampaian ko kaitn di dunia ni'in, boko hal inyo Ku dinga' doi' Sio inyo moutus Aku, Sio nianam inyo bondar.”

Roma 16:25

Topujicam Allah! Io inyo bokuaso bulah kaitn kuat pocayo sosuai agatn Kabar Boi' mongona'i Yesus Kristus inyo ku boritoan. Kabar Boi' nantai momadahan mongona'i hajat Allah pakai' somuo banso. Somanah boabad-abad, conyiant monsio inyo mongotohu'i hajat Allah nantai.

Galatia 1:12

Obai aku co monorima' borito nantai doi' monsio. Co nyiant urakng inyo moajari aku mongona'i borito nantai. Yesus Kristus siku', inyo monyatoan Kabar Boi' nantai ko aku.

Efesus 3:3

Sio momboritoan ko aku roncana-Nyo inyo komai kinyo dikotohu'i monsio. Di pucu' Aku udah monulis socaro panda' ko kaitn mongona'i hal nantai.

Titus 1:1

Ko Titus: inyo bondar-bondar sama'an ana'ku dalapm Yesus obai kito sosamo pocayo ko Yesus. Salapm doi' aku, Paulus. Allah moutus aku monjadi polayatn-Nyo. Yesus Kristus moutus aku monjadi rasul-Nyo. Aku udah diutus pakai' monulukng boko urakng inyo dipilih Allah oca' mongkitn pocayo ko Yesus. Aku pan diutus pakai' mongajar ajaran inyo bondar oca' boko urakng inyo dipilih Allah nantai hidup sosuai agatn kohonda'-Nyo. Pondasi ajaran nantai ia'an pongharapan paca'an hidup somanah-manahnyo, inyo udah Sio janjian sobolupm dunia dipulah. Allah Ponyolamant kito, co mungkitn tumbukan. Pas watu inyo ditontuan-Nyo, Allah udah moonji'i pomandiran-Nyo molalu'i Kabar Boi' inyo udah dipocayoan ko aku pakai' kuboritoan. Aku bodoa oca' Allah Bopai kito ongko Kristus Yesus, Ponyolamant kito monunju'an kasih karunia-Nyo huatan moonji'i sonang-asau ko kolai.

Wahyu 1:19

Obai nantaiam, tuliscam somuo hal inyo ditiatan ko kolai, ia'an boko hal inyo tojadi watu ni'in ongko boko hal inyo tajahan tojadi nononyo.

Wahyu 1:9

Aku, Yohanes, somadikan kaitn inyo sonasib agatn kaitn, inyo bosamo ajab sonsaro agatn warga Koraja'an Allah, huatan bosamo botahatn mohadapi ajab sonsaro kapikng monantian Yesus. Aku udah momboritoan Pomandiran doi' Allah ongko boko hal inyo Yesus padahan ko aku. Obai nantaiam, aku dibuakan ko sobuah pulau inyo bodamoan Patmos.

Wahyu 17:1

Lopas nian, datakam salah siku' doi' kotujuh molekat inyo monjujut tujuh mangku' nantai. Io bopandir ko aku, “Mara! Aku paca'an monunju'an ko kolai hukupan inyo paca'an tojadi ko lahukng tokonal inyo dudu' di tompat agatn banya' ara'i.

Wahyu 19:10

Aku lansukng tokorobah tokosungkapm di pohadapan kaki io pakai' monyombah io. Apo io bopandir ko aku, “Jangan monyombah aku! Aku bayo hulutn inyo molayati Allah, samo sama'an kolai huatan boko somadikan kolai, ia'an boko urakng inyo pocayo ko somuo inyo Yesus ajaran. Sombah Allah aja'am. Obai somuo inyo Yesus ajaran nianam pomandiran doi' Roh Allah.”

Wahyu 19:9

Lalu, molekat nantai bopandir ko aku, “Tuliscam ni'in: Bahagiacam boko urakng inyo dihundakng ko pogai kawitn Ana' Domba nantai.” Molekat nantai jam bopandir ko aku, “Nantaiam boko pomandiran inyo bondar doi' Allah!”

Wahyu 21:2

Aku pan moniant kota inyo kudus, ia'an Yerusalem inyo boharu. Kota nantai turutn doi' sorugo, doi' Allah. Kota nantai boi' bondar samo sama'an pongantitn botina' inyo borias siap bosandikng agatn pongantitn lolaki.

Wahyu 21:9

Lopas nian, ado salah siku' doi' kotujuh molekat inyo monjujut mangku' inyo bisi agatn kotujuh malopotako toahir nantai. Sio datakng ko aku, lalu bopandir, “Mara! Aku paca'an monunju'an ko kolai Pongantitn Botina', bini Ana' Domba.”

Wahyu 22:1

Lalu, molekat nantai monunju'an ko aku sungai inyo ara'inyo moonji'i kohidupan. Sungai nantai joronih bondar tontu sama'an kristal, huatan mongalir doi' tahta Allah ongko doi' Ana' Domba nantai.

Wahyu 22:16

Yesus bopandir, “Aku udah moutus molekat-Ku pakai' momadahannyo ko kaitn mongona'i somuonyo ni'in. Nantai pakai' kopontikan boko jomaat. Aku ninam Koturutan doi' Rajo Daud. Aku ia'an Bintakng Timur inyo torakng nantai.”

Wahyu 22:6

Lopas nian, molekat nantai bopandir ko aku, “Boko pomandiran ni'in bondar huatan ulih dipocayo'i. Tuhatn Allah inyo moonju' Roh-Nyo ko boko nabi. Sio udah moutus molekat-Nyo pakai' monunju'an ko boko urakng inyo molayati Sio mongona'i boko hal inyo gola' paca'an tojadi.”

Wahyu 22:8

Aku, Yohanes, udah mondinga' huatan moniant somuonyo nantai. Lopas jadi aku mondinga' huatan moniantnyo, aku lansukng tokosungkapm di pohadapan kaki molekat inyo udah monunju'an somuonyo nantai ko aku. Aku bomasud pakai' monyombah io.

Wahyu 22:9

Apo io bopandir ko aku, “Jangan monyombah aku! Aku bayo hulutn inyo molayati Allah, samo sama'an kolai ongko boko somadikan kolai boko nabi ongko somuo urakng inyo monuruti somuo posatn dalapm buku ni'in. Sombah Allah aja'am.”

Wahyu 4:1

Lopas nantai, aku ado poniant'an agi'. Wah, ado sobuah lawakng tobuka' di sorugo. Aku mondinga' saro nantai inyo samo sobolupmnyo, saro sama'an bunyi trompet. Kato-Nyo ko aku, “Noi' cam kosi'itn. Aku paca'an monunju'an ko kolai boko hal inyo paca'an tojadi lopas ni'in.”

Wahyu 5:7

Ana' Domba nantai datakng, monorima' gulukan buku nantai doi' jari kanan Sio inyo dudu' di pucu' tahta nantai.