Titus 1:9 - Porjanjian Boharu Torjomahan Baso Dilakng Soari-ari

⁹ Io pan gola' bobondar pocayo Kabar Boi' inyo kito ajaran ko io, ia'an ajaran inyo bondar huatan ulih dipocayo. Io gola' bobondar pocayo tohadap ajaran nantai oca' io mampu momadahi ongko moonji'i somangant ko urakng bukai pakai' monaati ajaran inyo bondar nantai. Io gola' bobondar pocayo oca' io pan ulih monunju'an ko urakng inyo molawatn ajaran nantai, obai sia' salah.

Titus 1:9 ပူးပေါင်းရင်းမြစ်များ

2 Tesalonika 2:15

Obai nantai am, boko somadikan, totap pocayo agatn kuat ajaran inyo udah koi sampaian boi' molalu'i pomandiran damo pan molalu'i boko surat.

2 Timotius 1:13

Ajaran doi' aku ko kolai ia'an contoh ajaran inyo bondar. Jumpati cam ajaran nantai agatn totap hala pocayo ko Yesus huatan mongasihi urakng bukai di dalapm Kristus Yesus.

1 Timotius 6:3

Sopo pan urakng inyo mongajar ajaran inyo kinyo bondar, ajaran sia' songkayo doi' ajaran Yesus Kristus, Tuhatn inyo bokuaso. Ajaran sia' nantai kinyo monulukng urakng pakai' hidup sosuai agatn kohonda' Allah.

1 Timotius 1:10

Allah pan moonji'i Hukupm Torat pakai' mongomboi'i caro hidup boko urakng inyo tukakng bomporajoan, boko urakng bokohonda'an agatn sosamo lolaki, boko urakng inyo monjual hulutnnyo, boko urakng inyo monyampaian kosasian tumbukannyo dalapm sidakng di pongadilan, boko urakng bulah kotumbukan, huatan somuo urakng inyo bulah boko hal botontakan agatn ajaran inyo bondar.

Wahyu 3:3

Jadi, ingantcam ajaran inyo kaitn dinga' ongko torima' komai. Taat'icam nantai. Tongga'ancam kaitn bulah boko dosa lalu hidup monyonangan hati Allah. Aman kaitn co bojojago, Aku paca'an datakng mohukupm kaitn. Kaitn nononyo co kalo mongotohu'i sombilo watunyo Aku datakng samo sama'an siku' urakng pongolit.

1 Timotius 1:15

Pomandiran ni'in memang bondar huatan gola' dipocayo bobondar: Kristus Yesus udah datakng ko dunia ni'in pakai' monyolamant'an boko urakng bodosa. Di antaro boko urakng bodosa, aku ninam inyo kotakng jahat.

Titus 2:1

Apo kolai gola' mongajar ajaran inyo bondar ko boko urakng inyo pocayo.

Titus 1:11

Kolai gola' monongga'an sia'. Jangan molongahan sia' moajaran boko hal inyo sobondarnyo co ulih diajaran. Obai ajaran sia' udah bulah banya' koluarga disosatan. Sia' ngontumbuki urakng agatn ajaran sia', oca' sia' mondapat'an untukng.

2 Timotius 4:3

Obai paca'an datakng watunyo, boko urakng kinyo honda' monorima' ajaran inyo bondar. Sia' bayo monuruti kohonda' sia' siku' mo. Jadi, sia' paca'an mongumpulan boko guru inyo moajaran boko hal inyo nyamanam sia' dinga'.

1 Tesalonika 5:21

Apo ditoliti somuo hal apobai bondar-bondar doi' Allah kata'an cado. Kaitn gola' pocayo agatn boko hal inyo boi'.

Wahyu 3:11

Aku paca'an oca'mo datakng! Totap sotia pocayo ko aku oca' co nyiant ado urakng inyo ulih morampas hadiah komonangan kaitn.

Wahyu 2:25

Apo pas Aku datakng nononyo, honda'nyo kaitn totap moikuti la'apo inyo udah umputn kaitn.

Yudas 1:3

Boko somadikan inyo ku kasihi! Kito samo-samo disolamant'an huatan aku bondar-bondar honda' monulis ko kaitn mongona'i nantai. Apo, aku mooso gola' monulis ko kaitn pakai' monguat'an kopocaya'an kaitn. Agatn sama'an nian, aku honda' oca' kaitn totap bojuakng mompotahatan iman kito, ia'an boko ajaran bondar inyo udah disampaian ko boko urakng husus umputn Allah.

2 Timotius 2:25

Io gola' onsi' mongajar boko urakng inyo gala' molawatn. Sopo tohu Allah moonji'i kosompatan ko boko urakng inyo gala' molawatn nantai pakai' botongga' bulah dosa huatan tohu mongonal ajaran inyo bondar.

2 Timotius 2:2

Kolai udah mondinga' aku mongajar di hadapan urakng banya'. Jadi, ajarancam ajaran nantai ko boko urakng inyo ulih dipocayo huatan pandai mongajar urakng bukai.

1 Timotius 4:9

Porbaso nantai bondar. Soharusnyo somuo urakng pocayo hal nantai.

1 Timotius 1:19

Ado boko urakng inyo monula' saro hati sia' ongko ajaran inyo bondar. Baba'annyo, sia' kinyo bondar-bondar pocayo agi' agatn Yesus.

Kisah Boko Rasul 18:28

Io kotakan pandai botikakng agatn boko urakng Yahudi inyo kinyo pocayo agatn Yesus. Di hadapan urakng banya', io molawatn sia' agatn koras. Io hala mongalahan sia'. Io momakai Buku Suci pakai' mombutian obai Yesus nantai Rajo Inyo Dijanjian Allah.

1 Korintus 14:24

Umpamonyo, somuo kaitn inyo pocayo bokumpul di sobuti' tompat. Watu nantai, somuo kaitn monyampaian posatn-pontal doi' Allah. Lopas nian, ado urakng luar damo urakng inyo kinyo pocayo inyo mansu' ko dalapm tompat nantai. Somuo pomandiran kaitn paca'an monunju'an boko dosanyo ongko bulah io sadar paca'an boko dosanyo.

2 Timotius 3:14

Apo kolai gola' totap pocayo ko ajaran inyo udah kolai polajari. Kolai udah monjadi yakitn obai nantai ajaran inyo bondar. Kolai udah konal agatn koi inyo mongajar kolai. Kolai tohu obai koi ulih dipocayoan jadi, hala pocayo ajaran inyo bondar nantai.