Roma 9:30 - Porjanjian Boharu Torjomahan Baso Dilakng Soari-ari

³⁰ Aman ubo nian, la'apo inyo ulih kito padahan? Kito ulih monyimpulan ni'in: Boko urakng bukainyo urakng Yahudi kinyo bousaha monjadi bondar di hadapan Allah. Apo, sia' monjadi bondar obai sia' pocayoagatn Kristus.

Roma 9:30 ပူးပေါင်းရင်းမြစ်များ

Roma 10:10

Obai agatn hatinyo urakng pocayo, lalu io monjadi bondar di pohadapan Allah. Urakng mongaku'i agatn mulutnyo lalu io disolamant'an.

Roma 10:20

Solaitn nantai pan, nabi Yesaya borani momadahan pomandiran Allah ni'in, “Aku mombulah oca' boko urakng inyo kinyo monggoyapi Aku udah mongonal Aku. Boko monsio inyo kinyo botakutn mongona'i sopo Aku, Aku udah moniant'an diri-Ku ko sia'.”

Roma 10:6

Apo mongona'i caro urakng bokomboi'an agatn Allah agatn pocayo ko Allah, Buku Suci momandiran dinga'an ni'in, “Jangan kolai katoan di dalapm hati kolai, ‘Sopo bai inyo paca'an noi' ko Sorugo?’ (rotinyo mombaba' Kristus turutn),

Roma 3:5

Apo sama'an apo aman ado urakng inyo monggunoan pomikiran monsio, ongko bopandir sama'an ni'in, “Timpu kito jahat, hal nantai monunju'an obai Allah bondar. Jadi, aman Allah mohukupm kito, rotinyo Allah kinyo adil, pan?”

Roma 4:11

Sunant nantai ia'an tando inyo mombutian obai io udah monjadi bondar obai io pocayo. Io monjadi bondar di hadapan Allah sobolupm io disunant. Sama'an nian jam, Abrahapm ulih dianggap monjadi angki-bayatn somuo urakng bukai Yahudi inyo pocayo, biar pan sia' kinyo bosunant. Samo sama'an Abrahapm, sia' monjadi bondar obai sia' pocayo.

Roma 4:13

Allah bojanji pakai' moonju' dunia ko Abrahapm huatan koturutannyo. Allah mombulah janji nantai bukai obai Abrahapm monaati Hukupm Torat, apo obai Abrahapm pocayo huatan monjadi bondar di hadapan-Nyo.

Roma 4:22

Nantaiam alasan Abrahapm ulih monjadi bondar di hadapan Allah.

Roma 4:9

Apobai pomandiran Daud nantai boroti ongkah urakng Yahudi inyo bosunant mondapat borokat nantai? Samo sokali cado! Urakng bukai Yahudi inyo kinyo bosunant mondapat borokat nantai jam! Obai, udah koi pandiran Abrahapm monjadi bondar obai io pocayo.

Roma 5:1

Watu ni'in, kito udah monjadi bondar obai kito pocayo ko Yesus. Jadi, kito ado damai agatn Allah. Nantai tojadi obai apo inyo Tuhatn Yesus Kristus labuhan pakai' kito.

Roma 9:14

Aman ubo nian, la'apo inyo ulih kito padahan? Kata'an Allah kinyo adil bai? Pasti Allah adil!

Roma 9:31

Apo, boko urakng Israel bousaha monaati Hukupm Torat pakai' monjadi bondar di pohadapan Allah. Apo nantai kinyo bohasil.

Galatia 2:16

Sokomai koi bopikir sama'an nantai jam. Apo ni'in koi udah mongotohu'i obai co nyiant urakng dipohitukan bondar di hadapan Allah obai sia' monaati Hukupm Torat. Urakng dipohitukan bondar di hadapan Allah bayo obai sia' pocayo agatn Yesus. Nanam alasan koi udah pocayo agatn Kristus Yesus. Koi dipohitukan bondar di hadapan Allah obai koi pocayo agatn Kristus, bukainyo obai koi monaati Hukupm Torat. Hal nantai udah totulis dalapm Buku Suci, “Jadi co nyiant siku' urakng pan inyo dipohitukan bondar dihadapan Allah” agatn caro monaati Hukupm Torat.

Galatia 3:24

Jadi, Allah moonji'i Hukupm Torat pakai' monjago kito sampai Kristus datakng, ia'an Yesus, Rajo Inyo Dijanjian Allah. Nantai tojadi oca' kito monjadi bondar di hadapan Allah obai kito pocayo ko Yesus.

Galatia 3:8

Doi' komai, Allah ado hajat pakai' urakng bukainyo Yahudi. Aman sia' pocayo, jadi sia' dianggap bondar di hadapan Allah. Allah momboritoan Kabar Boi' nantai ko Abrahapm jouh-jouh ari sobolupmnyo. Kabar Boi' nantai totulis dalapm Buku Suci:, “Somuo banso paca'an diborokati molalu'i kolai.”

Galatia 5:5

Apo kito pocayo ko Yesus huatan Roh Allah monulukng kito. Aman ubo nian, kito monantian agatn yakitn huatan moharap watunyo Allah moanggap kito bondar.

Efesus 2:12

Watu nantai, kaitn bolupm mongonal Kristus. Kaitn ia'an urakng asikng, bukainyo warga banso Israel inyo dipilih Allah. Kaitn bukainyo urakng inyo bodapat la'apo pan inyo dijanjian Allah. Jadi, kaitn co nyiant harapan. Kaitn hidup di dunia ni'in kinyo mongonal Allah.

Filipi 3:9

ongko oca' aku ulih bosatu agatn Sio. Aku monjadi bondar di hadapan Allah bukainyo obai usaha ku siku' monaati Hukupm Torat. Aku monjadi bondar obai aku pocayo agatn Kristus. Allah inyo molabuhan nantai. Sio mombulah monsio monjadi bondar di hadapan-Nyo aman sia' pocayo.

1 Timotius 6:11

Apo kolai, Timotius, jangan molabuhan boko porbuatan inyo jahat sama'an nantai. Kolai polayatn Allah. Kolai gola' bousaha hidup bondar di hadapan Allah, hidup sosuai agatn kohonda' Allah, pagutn sotia ko Allah, huatan mongasihi urakng bukai, botahatn mohadapi ajab sonsaro, bosikap lomah-lombut.

Ibrani 11:7

Obai Nuh pocayo, jadi io monaati Allah. Timpu nantai, Allah monohu'i io mongona'i malopotako inyo tajahan tojadi nononyo inyo bolupm ulih ditiatnyo. Nuh monaati Allah sampai io mombulah porohu bosar inyo monyolamant'an io ongko koluarganyo. Agatn sama'an nantai, dunia dihukupm apo Nuh monjadi bondar di hadapan Allah obai io pocayo.

1 Petrus 4:3

Komainyo, kaitn udah cukup manah monuruti kohonda' dunia ubo urakng inyo co mongonal Allah, ia'an kaitn molabuhan porbuatan kinyo sonunuh. Kaitn momuasan kohonda' diri kaitn inyo jahat. Kaitn gala' komabu'an, bopesta pora, bopesta minuman koras. Kaitn molawatn porintah Allah agatn monyombah boko lompatukng.