Roma 8:9 - Porjanjian Boharu Torjomahan Baso Dilakng Soari-ari

⁹ Apo kaitn kinyo hidup monuruti kohonda' monsio. Kaitn tajahan hidup monuruti Roh Allah, aman Roh Allah ado di dalapm diri kaitn. Aman Roh Kristus kinyo diapm di dalapm diri monsio, rotinyo urakng nian bukainyo umputn Kristus.

Roma 8:9 ပူးပေါင်းရင်းမြစ်များ

Lukas 11:13

Biar pan kaitn urakng bodosa, kaitn pasti udah tohu moonji'i inyo boi' ko ana' kaitn. Apotolagi' Allah Bopai di sorugo! Aman urakng mominto Roh Allah, pasti Sio paca'an moonji'i ko urakng inyo mominto nantai.”

Yohanes 14:17

Ponulukng nantai ia'an Roh Allah inyo monunju'an somuo inyo bondar. Boko urakng di dunia inyo co pocayo, sia' kinyo ulih monorima' Roh Allah nantai, obai sia' co moniant Sio, co mongonal Sio. Apo, kaitn mongonal Sio obai Sio ado bosamo kaitn huatan nononyo Sio bodiapm dalapm hati kaitn.

Yohanes 14:23

Timbas Yesus ko io, “Urakng inyo mongasihi Aku, io paca'an monuruti pomandiran-Ku. Bopai-Ku paca'an mongasihi io. Bopai huatan Aku paca'an datakng ko io lalu bodiapm dalapm hati io.

Yohanes 3:34

Obai urakng inyo diutus Allah monyampaian boko pomandiran Allah, obai Roh Allah udah dionju' ko Sio soponuhnyo.

Yohanes 3:6

La'apo inyo dilahiran socaro jasmani bosipat jasmani huatan la'apo inyo dilahiran doi' Roh Allah bosipat Rohani.

Kisah Boko Rasul 16:7

Sia' pan tuntukng di porbatasan doerah Misia. Doi' su'utn, sia' honda' botula' ko doerah Bitinia. Apo, sokali agi' Roh Yesus morarakng sia'.

Roma 7:5

Komai, kito ija' hidup sosuai agatn boko kohonda' kito sobagai monsio. Hukupm Torat morarakng kito bodosa, apo justru nantai inyo mombulah boko kohonda' nantai lobih kuat agi'. Jadi, boko anggota bukakng kito monjumpati boko kohonda' jahat nantai sampai kito bodosa. Akibatnyo, kito soharusnyo dihukupm mati topisah doi' Allah.

Roma 8:1

Obai nianam, watu ni'in Allah kinyo mohukupm urakng inyo ado di dalapm Kristus Yesus.

Roma 8:11

Roh Allah udah bulah Yesus Kristus hidup agi' doi' komatian. Ongko nantaiam Roh inyo diapm di dalapm diri kaitn jam. Jadi, biar pan tubuh kaitn tajahan mati, Roh Allah tajahan bulah tubuh kaitn hidup agi'.

Roma 8:2

Obai, kuaso Roh Allah udah molopasan kaitn doi' kuaso dosa ongko hukupan mati nantai. Roh Allah moonji'i kaitn kohidupan inyo sobondarnyo di dalapm Kristus Yesus.

1 Korintus 15:23

Apo ado urutannyo. Potamo, Allah bulah Kristus bobali' hidup. Lopas nian, watu Kristus bobali' ko dunia ni'in, ongko Allah paca'an bulah boko urakng umputn Kristus bobali' hidup.

1 Korintus 3:16

Inyo gola' kaitn kotohu'i kaitn samo sama'an Rumah Allah huatan Roh Allah bodiapm di antaro kaitn somuo.

1 Korintus 6:17

Apo urakng inyo bosatu agatn Tuhatn Yesus, monjadi sobukakng-sotubuh agatn Sio dalapm roh.

1 Korintus 6:19

Co tohu bai kaitn aman bukakng-tubuh kaitn masikng-masikng samo sama'an rumah pakai' Roh Allah. Huatan Roh Allah udah moonji'i Roh-Nyo pakai' bodiapm dalapm kaitn. Rotinyo kaitn bukai umputn kaitn siku' agi'.

2 Korintus 10:7

Kaitn gola' bopikir boboi' mongona'i lapo inyo kaitn kotohu'i. Aman ado urakng inyo yakitn mongotohu'i obai io nam umputn Kristus, urakng nian gola' mongotohu'i ni'in: Koi pan umputn Kristus jam samo sama'an io jam.

2 Korintus 6:16

Co mungkitn Rumah Allah bohubukan agatn berhala. Allah hala ada'an di antaro kito. Jadi, kito samo sama'an Rumah umputn Allah inyo hidup. Samo sama'an pandir Allah inyo ditulis di Buku Suci, “Aku tajahan diapm di antaro sia'. Aku tajahan hidup bosamo-samo agatn sia'. Aku tajahan monjadi Allah sia'. Sia' tajahan monjadi umant-Ku.”

Galatia 4:6

Obai kito boko poana'an Allah, ongko Sio moutus Roh Ana'-Nyo ko kito. Roh-Nyo mansu' ko dalapm hati kito. Roh-Nyo bulah kito bodoa somombondarnyo agatn mongatoan, ‘Bopai, oi Bopaiku’.

Galatia 5:24

Boko urakng inyo monjadi pongikut Kristus Yesus, sia' udah monyaliban somuo napsu ongko kohonda' diri inyo jahat.

Efesus 1:13

Sama'an nian jam agatn kaitn. Kaitn udah mondinga' Kabar Boi' inyo bondar sampai kaitn pocayo ko Kristus huatan disolamant'an. Molalu'i Sio, Allah moonji'i tando obai kaitn pan monjadi umat-Nyo jam, ia'an Sio moonju' Roh-Nyo ko kaitn jam sosuai agatn janji-Nyo sobolupmnyo.

Efesus 2:22

Obai kaitn di dalapm Kristus, jadi kaitn pan monjadi bagian rumah nantai inyo ditinjakan monjadi kodiapan Allah, ia'an Roh-Nyo tinggal di dalapmnyo.

Efesus 3:17

Agatn sama'an nantai Kristus hala diapm dalapm hati kaitn obai kaitn pocayo ko Sio. Kasih-Nyo monjadi dasar kohidupan kaitn huatan mombulah kaitn mongkitn kuat.

Filipi 1:19

obai aku udah tohu ponuntukng somuo ni'in, ia'an agatn boko doa kaitn ongko agatn potulukan doi' Roh Yesus Kristus, jadi aku tajahan dibebasan.

2 Timotius 1:14

Kolai udah dipocayoan boko hal inyo borogo. Jagocam boko hal nantai agatn kokuatan doi' Roh Allah inyo ado di dalapm kito.

1 Petrus 1:11

Roh Kristus ado di dalapm sia'. Roh Kristus nantai momadahannyo ko sia' mongona'i pondorita'an inyo tajahan Kristus hadapi, apo lopas nian Sio tajahan dimuliaan. Jadi, boko nabi nantai monoliti ubo apo huatan sombilo kosolamant'an nantai paca'an tojadi.

1 Yohanes 3:24

Urakng inyo monuruti boko porintah-Nyo, io hidup bosatu agatn Allah, huatan Allah hidup bosatu agatn io. Kito tohu obai Allah hidup bosatu agatn kito obai ni'in: Sio udah moonju' Roh-Nyo ko kito.

1 Yohanes 4:13

Ninam caronyo kito tohu obai kito bosatu agatn Allah, huatan Allah bosatu agatn kito: Ia'an nantai obai Allah udah moonju' Roh-Nyo ko kito.

1 Yohanes 4:4

Apo, boko poana'anku, kaitn boasal doi' Allah. Kaitn udah mongalahan boko nabi palsu nantai. Obai, Roh Allah inyo ado di dalapm diri kaitn lobih bokuaso daripado roh Musuh Kristus inyo ado di dalapm dunia.

Wahyu 13:8

Io paca'an disombah ulih somuo urakng inyo bodiapm di bumi, ia'an somuo urakng inyo doi' mulo dunia dipulah damonyo co totulis dalapm Buku Kohidupan. Buku nantai umputn Ana' Domba inyo udah disombolih.