Roma 8:37 - Porjanjian Boharu Torjomahan Baso Dilakng Soari-ari

³⁷ Apo, somuonyo nantai culih mongalahan kito obai Kristus inyo mongasihi kito bulah kito bondar-bondar monang.

Roma 8:37 ပူးပေါင်းရင်းမြစ်များ

1 Korintus 15:57

Apo bosukurcam ko Allah obai dosa kinyo mongalahan kito agatn caro nantai. Allah bulah kito monang obai Yesus Kristus, Tuhatn inyo bokuaso di pucu' kito.

1 Yohanes 4:4

Apo, boko poana'anku, kaitn boasal doi' Allah. Kaitn udah mongalahan boko nabi palsu nantai. Obai, Roh Allah inyo ado di dalapm diri kaitn lobih bokuaso daripado roh Musuh Kristus inyo ado di dalapm dunia.

2 Korintus 2:14

Apo bosukur ko Allah! Sio moirikan koi dalapm pawai boko urakng inyo monang obai koi hidup di dalapm Kristus. Allah momakai koi pakai' monyampaian borito mongona'i Kristus di mono-mono, samo sama'an bou harupm.

Wahyu 21:7

Sotiap urakng inyo monang paca'an monorima' somuonyo nantai. Aku paca'an monjadi Allahnyo. Sio paca'an monjadi ana'-Ku.

Wahyu 12:11

Boko somadikan kito udah mongalahannyo agatn darah Ana' Domba nantai, huatan agatn borito inyo bondar doi' Allah inyo sia' boritoan. Sia' sanggup mongurbatan diri sia' sampai mati.

Yudas 1:24

Allah inyo satu-satunyo, bokuaso monjago kaitn oca' kaitn kinyo jatu' ko dalapm dosa. Sio bokuaso mombaba' kaitn ko hadapan-Nyo inyo mulia dalapm koadaan kaitn borosih doi' dosa. Timpu nantai, kaitn pan paca'an kotakan sonang-nyaman.

Galatia 2:20

Obai aku kinyo hidup agi' agatn caro sama'an komai. Ni'in, Kristus monontuan caro hidupku. Aku hidup di dunia ni'in agatn caro boharu obai aku pocayo ko Sio. Sio nantai Ana' Allah inyo kotakan mongasihi aku. Sio monyorahan diri-Nyo sampai mati sobagai kurbatn inyo monggonti'i aku.

2 Korintus 12:9

Apo Tuhatn co molabuhan nantai. Sio momandiran ko aku, “Aku monunju'an koboi'an ko kolai. Nantai cukup bagi kolai. Obai, timpu urakng lomah, justru watu nantai kuaso-Ku bondar-bondar ulih ditiat.” Nantaiam sobabnyo aku lobih sonang momuji diri mongona'i hal inyo monunju'an kolomahanku. Obai timpu lomah, Kristus monguat'anku agatn kuaso-Nyo.

Wahyu 17:14

Sia' paca'an boparakng molawatn Ana' Domba. Apo Ana' Domba paca'an mongalahan sia', obai Sionam Tuhatn inyo bokuaso dipucu' boko tuhatn, Rajo di pucu' somuo rajo bukai. Boko urakng inyo bosamo agatn Ana' Domba paca'an monang, ia'an sia' inyo ditingkau, inyo dipilih, inyo sotia ko Sio.”

Efesus 5:2

Kaitn gola' mongasihi urakng bukai samo sama'an Kristus udah mongasihi kaitn ia'an Sio monyorahan diri-Nyo monjadi kurbatn posombahan pakai' monanggukng hukupan dosa kito. Sio monjadi posombahan harupm inyo monyonangan Allah.

1 Yohanes 4:19

Kito gola' mongasihi, obai Allah lobih doholu mongasihi kito.

Yohanes 16:33

Aku momadahan somuonyo nantai ko kaitn oca' hati kaitn ado sonang-asau obai kaitn bosatu agatn Aku. Kaitn paca'an mondorita' di dunia ni'in. Apo, pontokuhancam hati kaitn! Aku udah mongalahan kuaso di dunia ni'in!”

Wahyu 1:5

Ongko doi' Yesus Kristus, inyo monyatoan kobondaran Allah agatn sotia. Hoyu' Sio nam urakng inyo hidup agi' doi' komatian. Sionam Rajo inyo bokuaso doi' somuo rajo di dunia. Topuji am Yesus inyo mongasihi kito. Sio mombebasan kito doi' dosa kito, obai Sio mombayar agatn darah-Nyo siku' timpu Sio mati di kayu salib.

1 Korintus 15:54

Watu bukakng-tubuh kito diubah sama'an nantai, ongko pomandiran ni'in inyo totulis dalapm Buku Suci paca'an tojadi, “Kuaso komatian udah dikalahan. Tuhatn udah monang.”

2 Tesalonika 2:16

Allah Bopai huatan Yesus Kristus, Tuhatn kito, mongasihi kito. Sio monguat'an hati kito somanah-manahnyo. Sio jam bulah kito kotakng yakitn obai Sio paca'an momonuhi somuo janji inyo boi' pakai' kito. Koi bodoa oca' Allah Bopai huatan Yesus Kristus, Tuhatn kito

Wahyu 3:9

Porhatiancam! Boko urakng nantai doi' umant Rajo Sitatn, sia' monyobut dirinyo urakng Yahudi. Apo sobondarnyo sia' bukainyo anggota umant Allah. Sia' tumbukan! Aku paca'an bulah sia' datakng tundu' monyungkapan di pohadapan kaki kaitn. Lalu, sia' paca'an tohu obai Aku mongasihi kaitn.

1 Yohanes 4:10

Ninam kasih nantai, bukainyo kito inyo udah mongasihi Allah, apo Allah inyo udah mongasihi kito: Sio moutus Ana'-Nyo pakai' mati oca' kito dapat dibebasan doi' hukupan dosa.

2 Korintus 12:19

Somanahan ni'in, kaitn bopikir obai koi bousaha mombela diri tohadap kaitn. Apo, boko somadikan inyo ku kasihi, sobondarnyo ninam tujuan koi: (Koi mongatoan ni'in di hadapan Allah ongko sobagai urakng inyo hidup di dalapm Kristus.) Somuo inyo koi labuhan ia'an pakai' monulukng kaitn somongkitn kuat pocayo agatn Tuhatn.

Roma 8:35

Conyiant ado la'apo pan inyo ulih monyongkayoan kito doi' kasih-Nyo. Aman kito mohadapi kosusahan damo ajab sonsaro, aman ado urakng inyo mondorako'i kito, aman kito conyiant pomakatn, conyiant ado pakai'an, aman kito mohadapi bohayo damo kito dibunuh, somuonyo nantai culih monyongkayoan kito doi' kasih Kristus.