Roma 8:10 - Porjanjian Boharu Torjomahan Baso Dilakng Soari-ari

¹⁰ Memang tubuh kito tajahannyo mati obai dosa. Apo, aman Kristus diapm di dalapm diri kaitn, Roh-Nyo tajahan moonji'i kaitn kohidupan kokal obai kaitn monjadi bondar di hadapan Allah.

Roma 8:10 ပူးပေါင်းရင်းမြစ်များ

Yohanes 14:23

Timbas Yesus ko io, “Urakng inyo mongasihi Aku, io paca'an monuruti pomandiran-Ku. Bopai-Ku paca'an mongasihi io. Bopai huatan Aku paca'an datakng ko io lalu bodiapm dalapm hati io.

Yohanes 15:5

Aku ninam kondukng anggur. Kaitn nam samo sama'an dahatnnyo. Urakng gola' totap bosatu agatn Aku, lalu Aku paca'an bosatu agatn io. Aman ubo nian, io paca'an bobuah lobat. Obai, aman kaitn co bosatu agatn Aku, jadi kaitn culih bulah la'apo pan inyo boi'.

Yohanes 17:23

Ia'an, Aku bosatu agatn sia' huatan Duatn bosatu agatn Aku. Nantai oca' sia' monyatu agatn sompurna. Agatn caro ubo nian, lalu boko urakng di dunia monjadi tohu obai Duatn nam inyo udah moutus Aku. Boko urakng di dunia pan monjadi tohu obai Duatn mongasihi boko urakng inyo pocayo agatn Aku, samo agatn Duatn mongasihi Aku.

Yohanes 4:14

Apo sotiap urakng inyo minum ara'i inyo Aku onju' ko io, io co paca'an korahakan agi' somanah-manahnyo. Obai, ara'i inyo paca'an Aku onju' ko io paca'an monjadi ubo mato ara'i di dalapm dirinyo. Ara'i nantai paca'an torus-norus mongalir huatan moonji'inyo hidup somanah-manahnyo.”

Yohanes 6:54

Sotiap urakng inyo bopua' isi-Ku huatan minum darah-Ku, sia' paca'an monorima' hidup somanah-manahnyo. Aku paca'an mombulah sia' hidup agi' watu ahir joman.

Yohanes 6:56

Sotiap urakng inyo bopua' isi-Ku huatan minum darah-Ku, sia' nam inyo bosatu agatn Aku huatan Aku bosatu agatn sia'.

Roma 5:12

Dosa mula'i ado di dunia ni'in obai siku' urakng, ia'an Adapm. Obai io bodosa, jadi io mati. Samo sama'an nantai, somuo urakng paca'an mati obai somuo urakng bodosa.

Roma 5:21

Komai, dosa inyo bokuaso. Jadi, somuo urakng gola' mati. Apo watu ni'in, pakai' kito inyo pocayo, koboi'an Allah inyo bokuaso. Yesus Kristus, Tuhatn inyo bokuaso dipucu' kito, mombulah kito monjadi bondar di hadapan Allah huatan moonji'i kito hidup inyo kokal.

Roma 8:11

Roh Allah udah bulah Yesus Kristus hidup agi' doi' komatian. Ongko nantaiam Roh inyo diapm di dalapm diri kaitn jam. Jadi, biar pan tubuh kaitn tajahan mati, Roh Allah tajahan bulah tubuh kaitn hidup agi'.

1 Korintus 15:45

Sama'an inyo totulis di dalapm Buku Suci, “Allah bulah monsio potamo, ia'an Adapm. Adapm monjadi hidup.” Adapm nantai disobut Adapm potamo. Apo Kristus disobut Adapm toahir. Sio nantai Roh inyo bokuaso moonji'i hidup inyo somombondarannyo.

2 Korintus 13:5

Uji bo diri kaitn siku' aman kaitn bondar-bondar hidup ubo urakng inyo pocayo agatn Kristus. Poriso'i cam diri kaitn! Pasti kaitn tohu obai Kristus Yesus ado di dalapm hati kaitn. Aman Sio kinyo ado di dalapm kaitn, rotinyo kaitn kinyo bondar-bondar pocayo.

2 Korintus 5:21

Kristus kinyo bodosa, apo Allah bulah Sio monanggukng hukupan dosa kito. Allah molabuhan nantai oca' di dalapm Kristus, kito ulih monjadi bondar di hadapan Allah.

Galatia 2:20

Obai aku kinyo hidup agi' agatn caro sama'an komai. Ni'in, Kristus monontuan caro hidupku. Aku hidup di dunia ni'in agatn caro boharu obai aku pocayo ko Sio. Sio nantai Ana' Allah inyo kotakan mongasihi aku. Sio monyorahan diri-Nyo sampai mati sobagai kurbatn inyo monggonti'i aku.

Efesus 3:17

Agatn sama'an nantai Kristus hala diapm dalapm hati kaitn obai kaitn pocayo ko Sio. Kasih-Nyo monjadi dasar kohidupan kaitn huatan mombulah kaitn mongkitn kuat.

Filipi 1:23

Aku ditari' di antaro koduo hal nantai! Aku honda' moninggalan dunia ni'in lalu diapm bosamo agatn Kristus. Memang nantai lobih boi' bagi ku.

Filipi 3:9

ongko oca' aku ulih bosatu agatn Sio. Aku monjadi bondar di hadapan Allah bukainyo obai usaha ku siku' monaati Hukupm Torat. Aku monjadi bondar obai aku pocayo agatn Kristus. Allah inyo molabuhan nantai. Sio mombulah monsio monjadi bondar di hadapan-Nyo aman sia' pocayo.

Kolose 1:27

Allah honda' momadahan ko sia' obai roncana-Nyo kotakan boi' pakai' boko banso inyo bukainyo banso Yahudi. Ni'innam roncana-Nyo: Kristus ulih hidup di dalapm diri kaitn urakng inyo bukainyo urakng Yahudi. Rotinyo, kaitn ulih yakitn moharap'an obai kaitn paca'an monorima' kohormatan doi' Allah.

1 Tesalonika 4:16

Nononyo, paca'an ado saro borakng inyo moonji'i porintah. Pomimpitn molekat paca'an mondorah. Trompet Allah paca'an bobunyi. Tuhatn Yesus paca'an turutn doi' sorugo. Watu nantai, urakng inyo pocayo ko Kristus inyo udah mati paca'an lobih doholu bobali' hidup.

Ibrani 12:23

Kaitn tuyut bokumpul agatn boko urakng inyo kotakng sonang-nyaman, ia'an poana'an Allah. Somuo sia' ia'an boko ana' kojula'an, inyo boko damo sia' udah tocatat dalapm daptar urakng inyo ulih mansu' sorugo. Kaitn datakng mohadapi Allah inyo mohakipi somuo urakng. Kaitn datakng ko tompat roh-roh boko urakng inyo bondar inyo udah mati. Sia' udah dijadian sompurna di hadapan Allah.

Ibrani 9:27

Allah udah monontuan monsio mati sokali mo. Lopas nantai, sia' dihakipi.

Wahyu 14:13

Lalu aku mondinga' saro doi' sorugo bopandir ko aku. Katonyo, “Tuliscam pomandiran ni'in: Mula'i watu ni'in, diborokatiam boko urakng inyo mati dalapm koadaan sotia pocayo ko Tuhatn Yesus.” Roh Allah pan sotuju. Kato-Nyo, “Au, bondar nantai. Sia' mati oca' sia' ulih torahat doi' jorih-uyuh pokoroja'an sia'. Sia' diborokati obai somuo porbuatan boi' sia' mombulah sia' cucu' mondapat'an upah di sorugo.”