Roma 7:23 - Porjanjian Boharu Torjomahan Baso Dilakng Soari-ari

²³ Biar pan aku bopikir somuo hukupm nantai boi', aku kinyo mampu molabuhannyo, obai ado hukupm bukai dalapm diriku inyo molawatn poraturan Allah nantai, ia'an kuaso dosa. Kuaso dosa bokorojo dalapm boko anggota bukakngku sampai aku monjadi hulutn dosa.

Roma 7:23 ပူးပေါင်းရင်းမြစ်များ

Galatia 5:17

Kohonda' diri kaitn inyo jahat botontakan agatn kohonda' Roh Allah. Ongko kohonda' Roh Allah botontakan agatn kohonda' diri kaitn. Koduo kohonda' nantai hala bolawatan hinggatn kaitn kinyo hala molabuhan boko hal boi' inyo honda' dilabuhan.

Yakobus 4:1

Hibo kaitn hala bokolohi huatan hala botikakng agatn siku'-monyiku'? Nantai obai kaitn ado hawa napsu. Kaitn co honda' molabuhan boko hal inyo Allah kohonda'i. Jadi, sama'an ado poparakan dalapm diri kaitn.

Roma 8:2

Obai, kuaso Roh Allah udah molopasan kaitn doi' kuaso dosa ongko hukupan mati nantai. Roh Allah moonji'i kaitn kohidupan inyo sobondarnyo di dalapm Kristus Yesus.

Roma 6:19

(Aku tohu kaitn ija' manah mongoroti boko hal rohani. Jadi, aku momakai contoh ni'in mongona'i hulutn oca' kaitn lobih mudah mongoroti.) Komai kaitn monyorahan diri kaitn monjadi hulutn dosa. Boko anggota bukakng kaitn digunoan pakai' bulah boko hal inyo kotor huatan jahat. Apo watu ni'in kaitn gola' monyorahan diri kaitn monjadi hulutn Allah oca' boko anggota bukakng-tubuh kaitn ulih digunoan pakai' bulah boko hal inyo bondar huatan borosih doi' dosa.

1 Petrus 2:11

Boko somadikan inyo ku kasihi. Kaitn samo sama'an urakng asikng diapm somontaro mo di dunia ni'in. Jadi, aku bondar-bondar momuhun ko kaitn oca' jangan monuruti boko kohonda' bukakng-tubuh inyo jahat. Somuo kohonda' nantai boparakng molawatn hati kaitn.

Ibrani 12:4

Memang kaitn bojuakng molawatn dosa, apo bolupm kalo gola' sampai mati sama'an Yesus.

Roma 7:21

Kosimpulannyo, ado kobiasa'an ni'in inyo tojadi dalapm hidupku: Aku honda' bulah koboi'an, apo justru kojahatan inyo aku pulah.

Roma 7:5

Komai, kito ija' hidup sosuai agatn boko kohonda' kito sobagai monsio. Hukupm Torat morarakng kito bodosa, apo justru nantai inyo mombulah boko kohonda' nantai lobih kuat agi'. Jadi, boko anggota bukakng kito monjumpati boko kohonda' jahat nantai sampai kito bodosa. Akibatnyo, kito soharusnyo dihukupm mati topisah doi' Allah.

Roma 6:13

Jangan tundu' ko kuaso dosa huatan mombiaran dosa momakai boko anggota bukakng kaitn sama'an alat pakai' bulah kojahatan. Hidup kaitn inyo manah nantai udah mati. Watu ni'in, kaitn dionji'i hidup boharu. Jadi, tundu' ko kuaso Allah huatan mombiaran Sio momakai boko anggota bukakng kaitn sama'an alat pakai' bulah inyo bondar.

Roma 7:14

Kito tohu obai Hukupm Torat boasal doi' Roh Allah. Apo, aku ia'an monsio lomah. Aku culih molawatn kohonda'ku pakai' bodosa.

Yakobus 3:2

Obai, kito somuo molabuhan somuo macapm kosalahan. Apo soandainyo ado urakng inyo co mombulah kosalahan agatn pomandirannyo, io nam urakng inyo sompurna inyo ulih mongondalian bukakng-tubuhnyo.